សារលិខិតការបង្រៀនសួរសុខទុក្ខ
បេសកកម្មដ៏ទេវភាពរបស់ព្រះយេស៊ូវគ្រីស្ទ ៖ បុត្រាបង្កើតតែមួយគត់
សូមសិក្សាឯកសារនេះ ហើយស្វែងរកដើម្បីបានដឹងនូវអ្វីដែលត្រូវចែកចាយប្រកបដោយការអធិស្ឋាន ។ តើការយល់ដឹងពីឆាកជីវិត និង បេសកកម្មរបស់ព្រះអង្គសង្គ្រោះ នឹងពង្រឹងដល់សេចក្ដីជំនឿរបស់អ្នកលើទ្រង់ ហើយប្រទានពរដល់ជន ដែលមើលថែតាមរយៈការបង្រៀនតាមផ្ទះដោយរបៀបណា ? ចំពោះព័ត៌មានបន្ថែម សូមចូលទៅ reliefsociety.lds.org ។
ព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ត្រូវបានហៅថាជាបុត្រាបង្កើតតែមួយគត់ ដោយសារទ្រង់គឺជាអង្គតែម្នាក់គត់នៅលើផែនដី ដែលប្រសូតពីម្ដាយដែលមានជីវិតរមែងស្លាប់ និង ព្រះវរបិតាដែលមានជីវិតអមតៈ ។ ទ្រង់បានគ្រងអំណាចដ៏ទេវភាពពីព្រះ ជាព្រះវរបិតាទ្រង់ ។ ពីមាតាទ្រង់ ម៉ារា ទ្រង់បានទទួលមរតកជាជីវិតរមែងស្លាប់ ហើយទទួលរងនូវការស្រេកឃ្លាន ការនឿយហត់ ការឈឺចាប់ និង សេចក្តីស្លាប់ ។1
ដោយសារព្រះយេស៊ូវគ្រីស្ទជាបុត្រតែមួយគត់របស់ព្រះវរបិតា ទ្រង់អាចដាក់ជីវិតរបស់ទ្រង់ចុះ ហើយអាចយកវាត្រឡប់មកវិញម្ដងទៀត ។ ព្រះគម្ពីរបង្រៀនថា « តាមរយៈដង្វាយធួននៃព្រះគ្រីស្ទ » យើង « ទទួលដំណើររស់ឡើងវិញ » ( យ៉ាកុប 4:11 ) ។ យើងក៏រៀនផងដែរថា មនុស្សទាំងអស់ « អាចបានប្រោសពីអមតភាពទៅរកជីវិតដ៏នៅអស់កល្បជានិច្ច » ប្រសិនបើយើង « នឹងជឿ » ( គ. និង ស. 29:43 ) ។
នៅពេលយើងបានយល់ទាំងស្រុងពីហេតុផល ដែលព្រះយេស៊ូវបានក្លាយជាបុត្រាបង្កើតតែមួយគត់ នៃព្រះវរបិតា នោះសេចក្ដីជំនឿរបស់យើងលើព្រះគ្រីស្ទនឹងកើនឡើង ។ អែលឌើរ ឌី ថត គ្រីស្តូហ្វឺសិន នៃកូរ៉ុមនៃពួកសាវកដប់ពីរនាក់បានមានប្រសាសន៍ថា « សេចក្ដីជំនឿលើព្រះយេស៊ូវគ្រីស្ទ គឺជាការជឿស៊ប់ និង ការបញ្ជាក់ពី (1) ឋានៈរបស់ទ្រង់ក្នុងនាមជាបុត្រាបង្កើតតែមួយគត់របស់ព្រះ (2) ដង្វាយធួនដ៏គ្មានទីបញ្ចប់របស់ទ្រង់ និង (3) ការរស់ឡើងវិញដ៏ពិតប្រាកដរបស់ទ្រង់ » ។2 ពួកព្យាការីសម័យទំនើបបានថ្លែងទីបន្ទាល់ថា៖ « [ ព្រះយេស៊ូវគ្រីស្ទ ] គឺជា … បុត្រាបង្កើតតែមួយគត់ខាងសាច់ឈាម ជាព្រះអង្គប្រោសលោះនៃពិភពលោក » ។3
ដកស្រង់ចេញពីព្រះគម្ពីរ
យ៉ូហាន 3:16, គោលលទ្ធិ និង សេចក្ដីសញ្ញា 20:21–24, ម៉ូសេ 5:6–9
ដកស្រង់ចេញពីប្រវត្តិសាស្ត្ររបស់យើង
នៅក្នុងព្រះគម្ពីរសញ្ញាថ្មី យើងបានអានពីដំណើររឿងរបស់ស្ត្រី ទាំងមានឈ្មោះ និង ពុំស្គាល់ឈ្មោះ ដែលបានអនុវត្តសេចក្ដីជំនឿលើព្រះយេស៊ូវគ្រីស្ទ បានរៀន ហើយបានរស់នៅតាមការបង្រៀនរបស់ទ្រង់ ហើយបានថ្លែងទីបន្ទាល់ពីការបម្រើ អព្ភូតហេតុ និង ភាពអស្ចារ្យរបស់ទ្រង់ ។ ស្ត្រីទាំងនេះបានក្លាយជាពួកសិស្សដ៏គំរូ និង ជាសាក្សីដ៏ពិសេសនៅក្នុងកិច្ចការនៃសេចក្ដីសង្គ្រោះ ។
ឧទាហរណ៍ ម៉ាថា បានថ្លែងទីបន្ទាល់ដ៏រឹងមាំពីទេវភាពរបស់ព្រះអង្គសង្គ្រោះ នៅពេលគាត់បាននិយាយទៅកាន់ទ្រង់ថា « ខ្ញុំម្ចាស់ជឿហើយថា ទ្រង់ជាព្រះគ្រីស្ទ គឺជាព្រះរាជបុត្រានៃព្រះ ដែលត្រូវយាងមកក្នុងលោកិយមែន » ( យ៉ូហាន 11:27 ) ។
ពួកអ្នកសាក្សីនៃទេវភាពរបស់ព្រះអង្គសង្គ្រោះ មុនគេបង្អស់មួយចំនួនមានមាតារបស់ទ្រង់ ម៉ារា និង បងប្អូនជីដូនមួយរបស់គាត់ អេលីសាបិត ។ មិនយូរប៉ុន្មានបន្ទាប់ពីទេវត កាព្រីយ៉ែល បានទៅជួបនឹង ម៉ារា នាងបានទៅជួបនឹង អេលីសាបិត ។ រំពេចដែលអេលីសាបិតបានឮពាក្យជំរាបសួររបស់ ម៉ារា ភ្លាម គាត់ « បានពេញជាព្រះវិញ្ញាណបរិសុទ្ធ » ( លូកា 1:41 ) ហើយបានថ្លែងទីបន្ទាល់ថា ម៉ារា នឹងក្លាយទៅជាមាតានៃព្រះរាជបុត្រានៃព្រះ ។
កុំពាល់ខ្ញុំ ដោយ មិនើវ៉ា ធិកឈើត ទទួលបានសិទ្ធិអនុញ្ញាតជាផ្លូវការពីសារមន្ទីរវិចិត្រសិល្បៈនៅសាកលវិទ្យាល័យ ព្រិកហាំយ៉ង់ ។