សំណួរ និង ចម្លើយ
« តើខ្ញុំទប់ទល់នឹងការល្បួងដោយរបៀបណា ? »
វាចម្លែកណាស់ដែលថាការល្បួងគឺជាការចាំបាច់សម្រាប់ការរីកលូតលាស់ខាងវិញ្ញាណរបស់យើង ។ ប្រសិនបើយើងមិនត្រូវបានល្បួងទេ នោះយើងនឹងមិនអាចជ្រើសរើសរវាងសេចក្ដីល្អ និងសេចក្ដីអាក្រក់បានឡើយ ( សូមមើល គ. និង ស. 29:39 ) ។ ហើយប្រសិនបើយើងមិនអាចជ្រើសរើសសេចក្ដីល្អ នៅពេលបានផ្ដល់ឲ្យនូវជម្រើសផ្សេងទេ នោះយើងមិនអាចលូតលាស់ខាងវិញ្ញាណឡើយ ( សូមមើល នីហ្វៃទី 2 2:11–30 ) ។
គន្លឹះមួយដើម្បីទប់ទល់នឹងការល្បួងគឺជាការគោរប្រតិបត្តិឲ្យបានទៀងទាត់ ។ នៅពេលខ្លះ ប្រសិនបើអ្នកចុះញ៉ម នោះការល្បួងគឺពិបាកនឹងទប់ទល់ជាងនៅពេលអនាគត ។ ប្រសិនបើអ្នកទប់ទល់ជាទៀងទាត់ នោះអ្នកកាន់តែរឹងមាំ ហើយងាយដើម្បីទប់ទល់នាពេលអនាគត ។ កម្លាំងទប់ទល់ដ៏ខ្លាំងកើតចេញពីដង្វាយធួនរបស់ព្រះអង្គសង្គ្រោះធ្វើការនៅក្នុងជីវិតរបស់អ្នក ។ នៅពេលអ្នកធ្វើឲ្យអស់ពីលទ្ធភាពរបស់អ្នកដើម្បីរៀនពីការបង្រៀនរបស់ព្រះអង្គសង្គ្រោះ ហើយធ្វើតាមការបង្រៀនទាំងនោះ ព្រះអម្ចាស់ពង្រឹងអ្នកឲ្យទប់ទល់នឹងការល្បួង ។
ព្រះគម្ពីរបង្រៀនពីរបៀបផ្សេងទៀតដើម្បីទប់ទល់នឹងការល្បួង ៖
« ចូរអធិស្ឋានជានិច្ច ប្រយោជន៍ឲ្យអ្នកអាចក្លាយទៅជាអ្នកជំនះបាន មែនហើយប្រយោជន៍ អ្នកអាចយកឈ្នះលើអារក្សសាតាំងបាន » ( គ. និង ស. 10:5 ) ។
« អស់អ្នកណាដែលប្រុងស្ដាប់តាមព្រះបន្ទូលនៃព្រះ ហើយតោងជាប់តាមព្រះបន្ទូលនៃព្រះ នោះនឹងមិនត្រូវវិនាសឡើយ សូម្បីតែការល្បួងទាំងឡាយ និងព្រួញភ្លើងទាំងឡាយរបស់មារសត្រូវក៏មិនអាចឈ្នះលើពួកគេដែរ » ( នីហ្វៃទី 1 15:24 ) ។
« តស៊ូនឹងអារក្សវិញចុះ នោះវានឹងរត់ចេញពីអ្នករាល់គ្នាទៅ ។ ត្រូវចូលទៅជិតព្រះ នោះទ្រង់នឹងចូលមកជិតអ្នករាល់គ្នាដែរ » ( យ៉ាកុប 4:7–8 ) ។
វាក៏ជាការសំខាន់ផងដែរដើម្បីដឹងថា ការដែលត្រូវបានល្បួងពុំមែនជារឿងខុសឆ្គងនោះឡើយ ។ សូម្បីតែព្រះយេស៊ូវក៏ត្រូវបានល្បួងដែរ ។ « ទ្រង់បានរងទុក្ខសេចក្ដីល្បួងទាំងឡាយ ប៉ុន្តែមិនបានរវីរវល់ដល់សេចក្ដីទាំងនោះឡើយ » ( គ. និង ស. 20:22 ) ។ អ្នកអាចមើលពីគំរូរបស់ទ្រង់—និងគំរូនៃមនុស្សជាច្រើននាក់ផ្សេងទៀតនៅក្នុងព្រះគម្ពីរ—ដើម្បីជួយអ្នក ។
អធិស្ឋានសុំកម្លាំង
ដើម្បីទប់ទល់នឹងសេចក្ដីល្បួង ដំបូងយើងត្រូវការឆន្ទៈ និងបំណងប្រាថ្នាដ៏ស្មោះត្រង់ដើម្បីជ្រើសរើសផ្លូវត្រូវ ។ វាជួយខ្ញុំយ៉ាងច្រើន ប្រសិនបើខ្ញុំស្រមៃពីស្ថានភាពមួយទុកជាមុន រួចហើយជ្រើសរើសផ្លូវត្រូវនោះ ។ រឿងមួយទៀតដែលជួយខ្ញុំគឺការអធិស្ឋាន ។ ប្រសិនបើយើងអធិស្ឋានសុំកម្លាំង ស្វែងរកការចិញ្ចឹមបីបាច់ខាងវិញ្ញាណ ហើយជ្រើសរើសដោយប្រុងប្រយ័ត្នពីទីកន្លែងដែលយើងចេញទៅដើរលេងនៅខាងក្រៅ នោះព្រះវិញ្ញាណបរិសុទ្ធអាចក្លាយដៃគូដ៏ខ្ជាប់ខ្ជួនរបស់យើង ដើម្បីគង់នៅជាមួយនឹងយើង និងដើម្បីព្រមានដល់យើង ។
អេសធើរ ជី អាយុ 18 ឆ្នាំ ឡូវើរ សាហ្សក់នី ប្រទេស អាល្លឺម៉ង់
គាំទ្រគ្នាទៅវិញទៅមក
ខ្ញុំគិតថា តាមរយៈការអានព្រះគម្ពីរ ការអធិស្ឋាន ការអនុវត្តការគ្រប់គ្រងលើខ្លួនឯង និងការធ្វើតាមប្រសាសន៍របស់ព្យាការីប្រចាំថ្ងៃ នោះយើងអាចទប់ទល់នឹងការល្បួងបាន ។ ការទប់ទល់នឹងការល្បួងពង្រឹងសេចក្ដីជំនឿរបស់អ្នក ហើយបង្ហាញពីការតាំងចិត្តរបស់អ្នកចំពោះព្រះវរបិតាសួគ៌ ដើម្បីរក្សាសេចក្ដីសញ្ញាទាំងឡាយដែលអ្នកបានធ្វើ ។ ការមានមិត្តនៅក្នុងសាសនាចក្រក៏អាចជួយយើងផងដែរ ពីព្រោះយើងអាចគាំទ្រគ្នាទៅវិញទៅមក ។ វាត្រូវការសេចក្ដីក្លាហានច្រើនដើម្បីនិយាយពាក្យថាទេ ។ សូមចងចាំថា « ត្បិតព្រះទ្រង់មិនបានប្រទានឲ្យយើងមានវិញ្ញាណដែលតែងតែខ្លាចឡើយ គឺឲ្យមានវិញ្ញាណដ៏មានអំណាច សេចក្ដីស្រឡាញ់ និងប្រាជ្ញានឹងធឹងវិញ » ( ធីម៉ូថេទី 2 1:7 ) ។ នៅពេលយើងយកឈ្នះការល្បួង នោះយើងខិតកាន់តែជិតនឹងព្រះយេស៊ូវគ្រីស្ទ ហើយនឹងព្រះវរបិតាសួគ៌របស់យើង ។
ណាន់ស៊ី អេស អាយុ 19 ឆ្នាំ តុលទីតឡាន់ ប្រទេស ម៉ិចស៊ិក
ចែកចាយជំនឿរបស់អ្នក
នៅវិទ្យាល័យ មិត្តរួមថ្នាក់របស់ខ្ញុំភាគច្រើនបានអញ្ជើញខ្ញុំឲ្យផឹកស្រា ហើយមើលរឿងអាសគ្រាម ។ ខ្ញុំតែងតែនិយាយថាទេ ដោយសារខ្ញុំធ្វើអ្វីដែលព្រះអង្គសង្គ្រោះសព្វព្រះឫទ័យចង់ឲ្យខ្ញុំធ្វើ ។ ខ្ញុំចងចាំទ្រង់ ហើយរក្សាសេចក្ដីសញ្ញាទាំងឡាយរបស់ខ្ញុំ ។ ពេលខ្លះមិត្ត និងមិត្តរួមថ្នាក់របស់ខ្ញុំមិនបានល្បួងខ្ញុំឡើយ ដោយសារពួកគេបានដឹងពីសាសនារបស់ខ្ញុំ ។ ការចែកចាយជំនឿ និងទីបន្ទាល់របស់យើងជាមួយនឹងអ្នកដទៃ—ជាពិសេសជាមួយនឹងមិត្ត មិត្តរួមថ្នាក់ អ្នកជិតខាង និងគ្រួសារ—នឹងកាត់បន្ថយនូវការល្បួងនៅក្នុងមជ្ឈដ្ឋានជុំវិញយើង ។ ខ្ញុំដឹងថា តាមរយៈការរស់នៅតាមដំណឹងល្អ យើងអាចយកឈ្នះលើការល្បួងទាំងឡាយនៅក្នុងជីវិតរបស់យើង ។
រ៉ូមេអូ ប៉េ អាយុ 19 ឆ្នាំ នេហ្គ្រូស ប៉ែកបស្ចិម ប្រទេស ហ្វីលីពីន
ចូរស្តាប់តាមព្រះវិញ្ញាណបរិសុទ្ធ
ខ្ញុំបានរកឃើញថា នៅពេលសេចក្ដីល្បួងកើតឡើង នោះព្រះវិញ្ញាណបរិសុទ្ធបានព្យាយាមព្រមានដល់ខ្ញុំឲ្យជ្រើសរើសផ្លូវត្រូវ ។ សូមធ្វើរឿងទាំងឡាយ—ដូចជាការអធិស្ឋាន និងការអានព្រះគម្ពីររបស់អ្នក—ដើម្បីរក្សាព្រះវិញ្ញាណឲ្យគង់ជាមួយនឹងអ្នក ហើយជៀសវាងពីទីកន្លែងដែលព្រះវិញ្ញាណបរិសុទ្ធមិនអាចយាងមកបាន ។
រ៉ាជែល អូ អាយុ 13 ឆ្នាំ រដ្ឋ ផេនស៊ីលវេញ៉ា ស.រ.អា.
ឈរនៅក្នុងទីបរិសុទ្ធ
បងប្រុសរបស់ខ្ញុំតែងតែប្រាប់ខ្ញុំឲ្យ « ឈរនៅក្នុងទីបរិសុទ្ធ » ។ ខ្ញុំបានរកឃើញថា ឃ្លានេះមានន័យថាឈរនៅទីកន្លែងដែលសេចក្ដីល្បួងទាំងឡាយមានតិចតួច ឬ មិនធ្ងន់ធ្ងរ ។ ប្រធានស្តេករបស់ខ្ញុំបាននិយាយថា « កុំគ្រាន់តែទប់ទល់នឹងការល្បួង—ប៉ុន្តែត្រូវជៀសវាងពីការល្បួងផង » ។ នឹងមានពេលដែលអ្នកត្រូវទប់ទល់នឹងសេចក្ដីល្បួងនឹងកើតមាន ប៉ុន្តែវាកាន់តែងាយស្រួលដើម្បីរស់នៅតាមដំណឹងល្អនៅពេលសេចក្ដីល្បួងមិនបាននៅទីនោះដើម្បីល្បួងអ្នក ។
អើរ៉ុន អិល អាយុ 18 ឆ្នាំ រដ្ឋ យូថាហ៍ ស.រ.អា.
យើងត្រូវតែសម្រេចចិត្តជានិច្ច
អំណោយទាននៃព្រះវិញ្ញាណបរិសុទ្ធជួយយើងឲ្យស្គាល់ពីភាពខុសគ្នារវាងសេចក្ដីល្អ និងសេចក្ដីអាក្រក់ ហើយជួយយើងឲ្យដឹងពីពេលដែលយើងនឹងត្រូវបានល្បួង ។ យើងគួរចងចាំថា សេចក្ដីល្បួងទាំងឡាយគឺជាការសាកល្បងដែលជួយយើងឲ្យដឹងពេលយើងធ្វើរឿងត្រឹមត្រូវ និងពេលយើងធ្វើរឿងខុសឆ្គង ហើយយើងគួរដឹងថា ប្រសិនបើយើងធ្វើតាមព្រះអម្ចាស់ នោះទ្រង់នឹងពុំអនុញ្ញាតឲ្យយើងត្រូវបានល្បួងលើសពីអ្វីដែលយើងអាចទប់ទល់បានឡើយ ( សូមមើល កូរិនថូសទី 1 10:13 ) ។ យើងត្រូវតែធ្វើការសម្រេចចិត្តជានិច្ច មិនថាត្រូវជ្រើសរើសផ្លូវត្រូវ ជំនួសឲ្យផ្លូវខុសមួយនោះឡើយ ។
ជួន ធី អាយុ 19 ឆ្នាំ ម៉ុងតេវីដេអូ ប្រទេស អ៊ុយរូហ្គាយ
ការសម្ដែងជ្រើសរើសផ្លូវត្រូវ
ខ្ញុំគិតថា វាជាការសំខាន់ ដើម្បីសម្រេចចិត្តទុកជាមុនពីការជ្រើសរើសដែលខ្ញុំនឹងប្រឈមមុខ ។ ដោយពុំបានដឹងទុកជាមុន ខ្ញុំបានជួបនឹងស្ថានភាពដ៏លំបាកមួយ ហើយលទ្ធផលមានភាពវិជ្ជមាន ដោយសារខ្ញុំបានគិតរួចស្រេចហើយថា ខ្ញុំនឹងមិនបន្ទាបបទដ្ឋានរបស់ខ្ញុំឡើយ ។ ទោះជាពេលខ្លះខ្ញុំមិនស្រណុកនៅក្នុងចិត្តក្ដី គ្រួសាររបស់ខ្ញុំបានហាត់នូវការដើរតួដើម្បីឲ្យខ្ញុំដឹងពីអ្វីដែលត្រូវនិយាយ ឬធ្វើនៅពេលជួបនឹងសេចក្ដីល្បួងទាំងឡាយ ។
អេមេលីន ភី អាយុ 14 ឆ្នាំ រដ្ឋ វ៉ាយអូម៉ីង ស.រ.អា.
មានមិត្តភក្ដិល្អ
ការមានមិត្តភក្ដិល្អដែលជ្រើសរើសផ្លូវត្រូវ គឺជាអ្វីមួយដែលអ្នកអាចធ្វើដើម្បីទប់ទល់នឹងសេចក្ដីល្បួង ។ ពួកគេធ្វើគំរូល្អមួយ ។ អ្នកអាចហៅពួកគេ ប្រសិនបើអ្នកត្រូវបានល្បួង ។ ពួកគេនឹងជួយអ្នកឲ្យរើសផ្លូវត្រូវ ។ មិត្តល្អអាចរំឭកអ្នកឲ្យអធិស្ឋាន អានព្រះគម្ពីរ ហើយគោរពប្រតិបត្តិ ។
សែម អ៊ី អាយុ 17 ឆ្នាំ រដ្ឋ វ៉ាស៊ីងតោន ស.រ.អា.