លុះត្រាជួបទៀត
ដំណើរត្រឡប់ទៅផ្ទះវិញ
អ្នកនិពន្ធរស់នៅក្នុងរដ្ឋ យូថាហ៍ ស.រ.អា. ។
នៅពេលយើងមិនដឹងថាត្រូវបែរទៅផ្លូវណា នោះព្រះយេស៊ូវបង្ហាញផ្លូវដល់យើង ។
ការជិះលើរថយន្តក្រុងពីកន្លែងធ្វើការត្រឡប់ទៅផ្ទះរបស់ខ្ញុំវិញ គឺដដែលជាដដែល ។ ក្នុងរយៈពេលប្រាំនាទី ខ្ញុំបានផ្អែកក្បាលរបស់ខ្ញុំនឹងបង្អួច ហើយមិនយូរប៉ុន្មានការឈប់ និងចាប់ផ្ដើមនៃរថយន្តក្រុងនោះបានអង្រួនខ្ញុំឲ្យដេក ។ ខ្ញុំកំពុងតែសម្របខ្លួននឹងទំនួលខុសត្រូវថ្មីៗដែលកើតមានជាមួយនឹងការរៀបការថ្មីថ្មោងរបស់ខ្ញុំ ខណៈដែលខ្ញុំធ្វើការ និងរៀនពេញម៉ោងនោះ ។ ថ្ងៃខ្លះ ខ្ញុំបានដេកនៅរថយន្តក្រុងរហូតចាប់តាំងពីពេលជិះទៅធ្វើការ ហើយត្រឡប់ពីធ្វើការវិញ ។
នៅពេលខ្ញុំដេកលក់ស្លុង ខ្ញុំបានឮសំឡេងប្រាប់ថាខុសផ្លូវហើយ ។ រំពេចនោះ ខ្ញុំបានដឹងថា អ្នកបើករថយន្តក្រុងថ្មីត្រូវការការប្រាប់ផ្លូវដែលមានចម្ងាយ 80 គ.ម. ។
ដោយដឹងថាវាប្រហែលជាចំណាយពេលមួយម៉ោងកន្លះលើសធម្មតា ដើម្បីទៅដល់ផ្ទះ នោះខ្ញុំបានចាប់ផ្ដើមមានចិត្តមួរម៉ៅ ។ គំនិតមិនល្អចំពោះសមត្ថភាពរបស់អ្នកបើករថយន្តនោះបានកើតមានពេញក្នុងគំនិតរបស់ខ្ញុំ ។ សំឡេងប្រាប់ថាខុសផ្លូវហើយបានបន្តរំខានដល់ការដេករបស់ខ្ញុំ ។
ប៉ុន្តែមិនយូរប៉ុន្មាន ខ្ញុំបានសង្កេតឃើញថាការស្រែកនោះបានឈប់ ។ ខ្ញុំបានងើបមុខឡើងឃើញស្ត្រីម្នាក់បានប្រាប់ផ្លូវដល់អ្នកបើករថយន្តក្រុងនោះ ដោយទន់ភ្លន់ពីកន្លែងអង្គុយរបស់នាង គឺនៅពីរជួរពីមុខខ្ញុំ ។ ខ្ញុំបានមើល នៅពេលគាត់ប្រាប់ផ្លូវដល់បុរសនោះដោយទន់ភ្លន់ផ្អែមល្ហែម ពីមុនឈប់នៅត្រង់កន្លែងរបស់គាត់ គាត់បានប្រាប់បុរសនោះពីចំណុចបន្ទាប់មួយចំនួនទៀតដែលឡាននោះត្រូវឈប់ ។ ក្រោយមកខ្ញុំបានមកដល់ផ្ទះ ខ្ញុំមានចិត្តរសាប់រសល់ដោយសារតែទង្វើរិះគន់របស់ខ្ញុំ ដោយប្រៀបធៀបនឹងការណែនាំដ៏គួរឲ្យស្រឡាញ់របស់ស្ត្រីនោះ ។
ខ្ញុំបានដឹងថា ខ្ញុំដូចជាអ្នកបើករថយន្តក្រុងនោះដែរ—ខ្ញុំមិនបានស្គាល់ផ្លូវនៅក្នុងជីវិតរបស់ខ្ញុំប្រសើរជាងអ្នកបើករថយន្តក្រុងនោះបានដឹងពីផ្លូវថ្មីរបស់គាត់ឡើយ ។ យើងទាំងពីរនាក់គឺស្ថិតនៅលើផ្លូវដែលពុំធ្លាប់ស្គាល់ ។ ខ្ញុំជឿយ៉ាងប្រាកដថា គាត់មានអំណរគុណដែលមានមនុស្សម្នាក់ ដែលធ្លាប់ជិះតាមផ្លូវនោះពីមុន មានឆន្ទៈប្រាប់ផ្លូវដែលនៅខាងមុខដោយអត់ធ្មត់ ។
ព្រះគ្រីស្ទធ្វើដូចគ្នានេះសម្រាប់យើង ។ នៅពេលយើងមិនដឹងត្រូវបានបែរតាមផ្លូវណា នោះគំរូរបស់ទ្រង់បង្ហាញផ្លូវដល់យើង ។ នៅពេលយើងមានសំណួរ ទ្រង់ផ្ដល់ចម្លើយដោយសេចក្ដីស្រឡាញ់ ។ តើប៉ុន្មានដងហើយដែលទ្រង់បាននឿយហត់ បន្ទាប់ពីធ្វើដំណើរលើផ្លូវដ៏វែងឆ្ងាយ ខិតខំបំពេញសេចក្ដីត្រូវការរបស់មនុស្សដទៃនោះ ?
ចាប់តាំងពីថ្ងៃនោះមក យើងបានមានអ្នកបើករថយន្តក្រុងថ្មីពីរបីនាក់ ។ ម្ដងម្កាល ពួកគេត្រូវការការប្រាប់ផ្លូវខ្លះៗ ហើយអរគុណចំពោះគំរូដែលបានបង្ហាញខ្ញុំដោយស្ត្រីម្នាក់ និងព្រះអង្គសង្គ្រោះរបស់យើងដែលគួរឲ្យស្រឡាញ់ ខ្ញុំបានមានឆន្ទៈដើម្បីប្រាប់ផ្លូវដល់ពួកគេ ។