លើសពីដៃគូ
តើអ្នកគិតថានៅពេលអ្នកទៅបង្រៀនតាមផ្ទះ គឺអ្នកគ្រាន់តែរួមដំណើរនឹងមនុស្សម្នាក់ដើម្បីទៅសួរសុខទុក្ខមែនទេ ? សូមគិតម្ដងទៀត ។
អ្នកធ្លាប់បានឃើញការណ៍នេះនៅក្នុងប្រលោមលោក និងខ្សែវីដេអូជាច្រើនមកហើយ ។ មានបញ្ហាធំមួយគួរឲ្យភ័យខ្លាចកំពុងកើតមានដូចជាពពកខ្មៅងងឹតពីចម្ងាយ ។ គ្រោះមហន្តរាយហាក់ដូចជាជៀសមិនរួច ។ បន្ទាប់មកក៏មានវីរៈបុរសបានមានជំនះលើឧបសគ្គ ហើយបានដោះស្រាយបញ្ហានោះ ។
ពួកវីរៈបុរសបែបនេះជារឿយៗបានរួមដំណើរដោយដៃគូម្នាក់ ។ តួអង្គនេះជាធម្មតាមានជំនាញមូលដ្ឋានបន្តិចបន្តួច ប៉ុន្តែដើរតួយ៉ាងសំខាន់ដើម្បីជួយដល់វីរៈបុរសរូបនោះពេលខ្មាំងសត្រូវវាយសម្រុកមកលើគាត់ ។
ក្នុងនាមជាដៃគូបង្រៀនតាមផ្ទះវ័យក្មេងម្នាក់ វាអាចនឹងត្រូវបានល្បួងឲ្យគិតថាខ្លួនអ្នកជាដៃគូម្នាក់នឹងដៃគូរៀមច្បង ។ ទោះជាយ៉ាងណាក្ដី ដៃគូរបស់អ្នកដែលមានអាយុច្រើនជាង ធ្លាប់បានឆ្លងកាត់នូវបទពិសោធន៍ច្រើនជាងអ្នក ។ ដូច្នេះវាគឺអាស្រ័យទៅលើគាត់ដើម្បីដោះស្រាយបញ្ហា តើត្រឹមត្រូវទេ ?
មិនពិតនោះទេ ។
ចំពោះការបង្រៀនតាមផ្ទះ គឺគ្មានមហាវីរៈបុរស ( ដៃគូវ័យចំណាស់របស់អ្នក ) និងដៃគូរបស់គាត់ ( អ្នក ) នោះទេ—គឺមានតែមហាវីរៈបុរសពីរនាក់ដែលអាចផ្លាស់ប្ដូរពិភពលោកនេះរួមគ្នាតែប៉ុណ្ណោះ ។
មិនថាអ្នកជានរណា ហើយបទពិសោធន៍របស់អ្នកជាអ្វីនោះទេ អ្នកផ្ទាល់មាននូវអ្វីដែលត្រូវការដើម្បីធ្វើឲ្យមានការផ្លាស់ប្តូរដ៏ធំមួយ នៅក្នុងជីវិតរបស់មនុស្សដែលអ្នកបានទៅសួរសុខទុក្ខ ។
គ្មានការហៅណាធំជាងនេះឡើយ
ប្រធាន អ៊ែសរ៉ា ថាហ្វ ប៊ែនសឹន ( 1899–1994 ) បានមានប្រសាសន៍ថា « គ្មានការហៅក្នុងសាសនាចក្រណាមួយដែលធំជាងការធ្វើជាគ្រូបង្រៀនតាមផ្ទះម្នាក់ឡើយ » ។1
ពួកគ្រូបង្រៀនតាមផ្ទះធ្វើលើសពីការចែកចាយសារលិខិតមួយខាងវិញ្ញាណទៅទៀត ។ ពួកគេជួយគ្រួសារនីមួយៗឲ្យដឹងថា ពួកគេមានមិត្តដែលពួកគេអាចពឹងពាក់បាន ។
ប្រធានថូម៉ាស អេស ម៉នសុន បានមានប្រសាសន៍ថា « មិត្តម្នាក់ធ្វើលើសពីការសួរសុខមួយដោយយកចិត្តទុកដាក់មួយជារៀងរាល់ខែទៅទៀត » ។ …មិត្តម្នាក់ត្រូវចេះខ្វាយខ្វល់ ។ មិត្តម្នាក់ត្រូវចេះស្រឡាញ់ ។ មិត្តម្នាក់ត្រូវចេះស្ដាប់ ។ ហើយមិត្តម្នាក់ត្រូវចេះជួយយកអាសារ » ។2
ពិតណាស់ មិត្តភាពដ៏អស្ចារ្យទាំងឡាយអាចត្រូវបានបង្កើតឡើងនៅគ្រប់វ័យទាំងអស់ ។
ការបម្រើជាមិត្តម្នាក់
ស្សន ស៊ី អាយុ 16 ឆ្នាំ មកពីរដ្ឋ យូថាហ៍ ភាគខាងត្បូង ស.រ.អា. ស្គាល់ពីរបៀបដើម្បីធ្វើជាមិត្តម្នាក់ ក៏ដូចជាគ្រូបង្រៀនតាមផ្ទះផងដែរ ។ ស្សន មានចំណាប់អារម្មណ៍ជាច្រើនផ្សេងៗពីគ្នា ដែល រួមបញ្ចូលទាំងការប្រកួតជិះសេះ ការបោកចំបាប់ ការថែទាំហ្វូងគោ និងការជួសជុលរថយន្ត ។ គាត់ក៏ស្រឡាញ់ការបង្កើតមិត្តភាពជាមួយនឹងមនុស្ស ដែលគាត់ទៅបង្រៀនតាមផ្ទះផងដែរ ។
ស្សននិយាយថា « ខ្ញុំចូលចិត្តនិយាយនឹងមនុស្សទូទៅ ហើយមើលពីអ្វីដែលខ្ញុំអាចធ្វើដើម្បីជួយពួកគេ » ។
ដៃគូបង្រៀនតាមផ្ទះរបស់គាត់គឺជាប៊ីស្សពនៃវួដរបស់ពួកគេ ។ នៅផ្ទះមួយដែលពួកគេទៅសួរសុខទុក្ខ ស្ត្រីជាភរិយាគឺជាសមាជិកនៃសាសនាចក្រ ប៉ុន្តែស្វាមីពុំមែនជាសមាជិកនោះទេ ។ ស្សន បានមានទំនាក់ទំនងល្អនឹងស្វាមីឈ្មោះ ភ្លយ នៅពេលពួកគេទៅសួរសុខទុក្ខជាលើកដំបូង ។ នៅពេលភ្លយបានចាប់ផ្ដើមនិយាយពីរថយន្ត Jeep របស់គាត់ ស្សន បានមានការចាប់អារម្មណ៍ភ្លាម ។ ស្សននិយាយថា « យើងមានចំណាប់អារម្មណ៍ដូចគ្នា » ។
នៅក្នុងឆ្នាំដែលស្សន និងប៊ីស្សពបានទៅសួរសុខទុក្ខភ្លយ និងភរិយារបស់គាត់ ស្សនបានពង្រឹងមិត្តភាពទាំងនោះ—រួមទាំងការជួយភ្លយធ្វើការផ្នែកម៉ាស៊ីនពីមួយគ្រាទៅមួយគ្រា ។
ខគម្ពីរមួយដែលស្សនចូលចិត្តគឺពីការបម្រើ ៖ « កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ( ម៉ូសាយ 2:17 ) ។
ស្សនពន្យល់ថា « មនុស្សគ្រប់រូបត្រូវសម្លឹងមើលរកវិធីដើម្បីបម្រើ » ។
អំណោយទានខាងវិញ្ញាណរបស់អ្នក
យើងទាំងអស់គ្នាមាននូវអំណោយទានខាងវិញ្ញាណ និងទេពកោសល្យ ។ ជាងនេះទៀត យើងមាននូវចំណាប់អារម្មណ៍ និងកិច្ចការកំសាន្តដែលប្លែកពីគេ ។ យើងម្នាក់ៗមានអ្វីមួយពិសេសដើម្បីផ្ដល់ឲ្យ ដែលគ្មាននរណាម្នាក់ផ្សេងទៀតអាចធ្វើតាមរបៀបដូចគ្នាបាននោះឡើយ ។
ប្រធាន ហិនរី ប៊ី អាវរិង ទីប្រឹក្សាទីមួយនៅក្នុងគណៈប្រធានទីមួយ បានបង្រៀនថា « មនុស្សគ្រប់គ្នាគឺខុសពីគ្នា ហើយមានការបរិច្ចាគផ្សេងៗពីគ្នា » ។ « គ្មាននរណាម្នាក់ត្រូវបានកំណត់ឲ្យបរាជ័យនោះទេ » ។3 ការបង្រៀនតាមផ្ទះអាចជាឱកាសមួយសម្រាប់អ្នក ដើម្បីប្រើអំណោយទានទាំងនោះដើម្បីជាប្រយោជន៍ដល់មនុស្សដទៃទៀត ។
ឧទាហរណ៍ នៅពេលវេនរបស់អ្នកដើម្បីចែកចាយសារលិខិតខាងវិញ្ញាណមួយ អ្នកគប្បីគិតពិចារណាដើម្បីធ្វើការអធិស្ឋានទុកជាមុនពីអ្វីដែលអ្នកអាចនិយាយ ដែលវានឹងផ្ដល់ជាប្រយោជន៍យ៉ាងច្រើនដល់មនុស្សដែលអ្នកទៅសួរសុខទុក្ខ ។
ជារឿយៗ អ្នកនឹងមានបទពិសោធន៍ផ្ទាល់ខ្លួនមួយទាក់ទងនឹងប្រធានបទដែលលើកឡើង ដែលអ្នកអាចប្រាប់ទៅគ្រួសារនោះ ។ ចូរធ្វើឲ្យពន្លឺរបស់អ្នកបានភ្លឺឡើង ! សូមចែកចាយអ្វីដែលអ្នកដឹង ។
អ្នកក៏អាចស្វែងរករបៀបដ៏ច្នៃប្រឌិត ហើយមានអត្ថន័យដើម្បីបម្រើដល់ក្រុមគ្រួសារដែលអ្នកទៅសួរសុខទុក្ខ ។ ឧទាហរណ៍ ឧបមាថាមានមនុស្សម្នាក់នៅក្នុងគ្រួសារមួយ ដែលអ្នកបង្រៀនចង់រៀនលេងហ្គីតា ។ ចៃដន្យអី អ្នកចេះលេងហ្គីតាជាយូរមកហើយ ។ នៅក្នុងស្ថានភាពនេះ គន្លឹះតន្ត្រីមួយចំនួនពីមួយគ្រាទៅមួយគ្រាអាចមានអត្ថប្រយោជន៍ ដូចជាការចូកព្រិលចេញពីផ្លូវរបស់ពួកគេ ឬកាត់តម្រឹមដើមឈើរបស់ពួកគេផងដែរ ។
នៅពេលនិយាយពីការបង្រៀនតាមផ្ទះ ដៃគូរៀមច្បងរបស់អ្នកអាចជាមនុស្សមានជំហរខាងវិញ្ញាណយ៉ាងរឹងមាំម្នាក់ ។ ប៉ុន្តែកុំយល់ខុសឲ្យសោះ ។ អ្នកជាកូនចៅនៃព្រះ ហើយមានសមត្ថភាពដើម្បីបំពេញតួនាទីរបស់អ្នកជាគ្រូបង្រៀនតាមផ្ទះ ។
អ្នកនឹងតែងតែមានអ្វីដែលមួយអស្ចារ្យដើម្បីបន្ថែមបង្គ្រប់ពីលើនោះ ។
មេរៀនថ្ងៃអាទិត្យ
ប្រធានបទសម្រាប់ខែនេះ ៖ ការស្ថាបនានគរព្រះនៅថ្ងៃចុងក្រោយ