Ena Monalivaliva Ga: iSausau Vou
Noqu Vulica na Veika Meu Cakava ni sa Vakaraitaka mai e Dua ni Sotava tiko na Veivakatotogani ni Yaloyalo Vakasisila
E vakaitikotiko mai Utah, Amerika, o koya e vola.
Ena vica na vula au sa vakila ni dua na ka e yaco tiko, ia oqo sa qai mai vakaraitaka votu vei au ko noqu i tau na dina: ena nona tovolea tiko me biuta na saravi ni yaloyalo vakasisila ena vica vata na yabaki, tekivu mai na gauna keirau veikilai kina.
Ena noqu dabe tiko e loma ni motoka ka rogoca tiko nona vakatutusa, sa dua na ka noqu vakavinavinaka. Kua ni cala nomu nanuma—sa mosi dina noqu kila nona vakatotogani tiko mai vakabalavu kau lecava tu—ia au marau niu a tiko ena dua na vanua ka rawa meu raici koya ena loloma ka sega ena daulelewa.
Na Tawa Loloma ena Sega sara ni Vakadonui
Ena so na gauna na noda kila ni ca na iyaloyalo vakasisila e rawa ni vaka buwawataka na noda rai baleti ira na tani. Au sa kila ni a yaco vei au ena dua na gauna. Niu a se gone, au dau rogoca baleti ira na tamata ka vesuki ena sara iyaloyalo vakasisila ka dau basika e lomaqu na yalo ni cudru kei na noqu sega ni taleitaka. Ia ena nona tukuna vei au ko noqu i tau yalewa na ka e sotava, Au sa tiko ena dua na vanua e vinaka cake meu vakacegui koya baleta niu sa tubu ena bula ni noqu kila noqui valavala ca kei na malumalumu ena veiyabaki sa oti.
Au sa kila oqo ni tawa loloma ena sega sara ni vakadonui. Ko Jisu Karisito, na noda ivakaraitaki vinaka, a vakasaqarai ira era cati mai vei ira na tani. A vosa vei ira na kai Samaria kei ira nai valavala ca. O Karisito, ka sega ni rawa ni “raica na ivalavala ca ka vakadonuya mada ga vakalailai” (Vunau kei na Veiyalayalati 1:31), e raici “keda, ena levu ni malumalumu e tu vei keda, ka sega ni kino ena domobula se rarawa.”1 Ena veivosaki bibi keirau vakayacora kei noqui tau, au tovolea meu vakasamataka na ka ena vakayacora ko Jisu. Nai talanoa ni yalewa ka kunei ni dautagane e vukei au meu kila na ka meu vakayacora.
Veisotavi ena Yalololoma
O ira na vunivola kei na Farisi era bulataka na lawa vaka-Mosese ena gauna ni veiqaravi nei Jisu a sega ni tu vakalevu vei ira na yalololoma. E dau tiko eso nai totogi, ka vakavuqa ni daumosimosi sara, ka dau i sau ni caka cala, ka ra dau vakaviriki kina ena vatu ko ira era veidauci. Ia ni sa kau mai vei Jisu na yalewa dautagane, A sega ni vukitani—A vakaraitaka vua na yalololoma. E a sega ni vakacaucautaki ira na veibeitaki ena nodra toboka edua ni kitaka tiko nai valavala ca, ia e a vakananumi ira ga ena nodra i valavala ca (raica Joni 8:3–7). Me isoqoni ni veika kece, “Ni sai valavala ca ko ira kecega na tamata ka sega ni yacova na ka e vakarokorokotaki kina na Kalou” (Roma 3:23). Ko Karisito e a sega ni cudruva na tamata e cala, ka sega talega ni dodonu meda vakayacora vakakina (raica na Joni 13:34–35).
Ni ra sa vakanadaku na veibeitaki, ni sa beitaki ira na nodra lewa e loma sa qai vosa na Karisito vua na yalewa. E a lekaleka ga na nona vosa ia e tara sara ga na yalo. A taroga e liu na yalewa ka kaya, “Yalewa sa ivei ko ira oqori, sa sega e dua sa lewai iko mo cudruvi, ne?” Ni sauma na taro ka kaya ni ra sa gole, sa qai kaya ko Koya, “Au sa sega talega ni lewai iko mo cudruvi: mo lako, ka mo kakua ni valavala ca tale” (Joni 8:10–11).
Na dau lelewa ena sega ni rawa ni a vukea na yalewa me veisau, ia na iVakabula e kila ni loloma e rawata.
Lako, Kakua Ni Valavala Ca Tale
Na loloma sa imatai ni kalawa rawarawa ni nona vukei edua me tarovi koya mai na sara iyaloyalo vakasisila. Na veivakacokotaki ena duidui kina vei tamata yadua, ia e tiko eso nai kalawa rawarawa sara era rawa ni taura ko ira na sotava tiko na leqa oqo. Vakauqeti ira me ra sota kei ira nodra bisopi; o koya ka tu vua nai vurevure kei nai yaragi ni veivukei. Ena gauna e veiganiti, vukei ira mera kila na nodra ivakasaribariba ka navuca e dua nai tuvatuva me vukei ira mera levea. Vakauqeti ira mera qara na veivuke vei ira na kenadau se mera lewena e dua nai soqosoqo ni veitokoni. Ka tomana tiko na nomu lomani ira ka tokoni ira ena vei ikalawa kece era cavuta.
O Karisito e a vakaraitaka na nona lomana na yalewa ka qarauna sara me kila ni o Koya e sega ni vinakata me tomana tiko nona bula ivalavala ca. Na loloma dina e sega ni kena ibalebale meda raica baleta na nodra caka cala na tani; ia, e vakavuna vei keda meda raica na kedra ituvaki dina ka da uqeti kina me vukei ira mera toso ki liu.
E Dua na i Lakolako ni Vakabauta.
Au dau lomana na noqu itokani, ia oqo sa qai tubu cake sara ni oti nona wasea nona veika vuni. Se mani vakacava na levu ni ka o iko se dua o lomana e sa cakava, “Ena sega ga ni rawa vei iko mo lutudromu sivita na rarama tawa vakaiyalayala ni Veisorovaki iKarisito.”2
Kevaka o kila e dua e sotava tiko na leqa ni sara iyaloyalo vakasisila, kakua ni biuti ira! Dodoliga yani ena loloma kei na yalololoma me vaka ga na ka ena vakayacora nai Vakabula. Ena dredre toka; ia na vei bolebole oqo ena sega ni takali yani ena dua ga na bogi. Mo yalo vosota vei ira ko lomana ka vaka kina vei iko sara mada ga vakai iko. Noda vulica meda lomana ka kila na veika dredre vakaoqo ka lako curuma e dua e sega ni dau totoka se rawarawa. Ia au nuitaka ni loloma taucoko eda solia ena sega ni ka wale, vetalia na kena balavu se na itinitini ni nodra ilakolako o ira eda dau lomana.