Au Sega ni Via Duatani!
E vakaitikotiko mai Utah, Amerika, o koya e vola.
“Sa ka talei ena mata ni Kalou na yalo ni tamata” (Vunau kei na Veiyalayalati 18:10).
E dau nanamaki tu ga o Mika ki na kalasi ni danisi. E dau taleitaka okoya na vakarorogo ki na sereivakatagi. E dau taleitaka okoya me vakatovotovotaka nona butterfly skip ka me cakava vinaka sara. Ka dau taleitaka vakabibi okoya ni ra dau toso vata na kalasi taucoko. Ni ra cakava oya, e vaka ga ni ra sa tautauvata kece na dau danisi. E vaka ni sega walega ni okoya e tauvi Down syndrome tiko.
Nikua era vulica tiko kina e dua na ivukivuki ni danisi vou. A saravi nona qasenivuli o Mika ni lade i macawa. A saravi ira na vo ni goneyalewa ni ra vakatovolea. Eso era taura vakatotolo sara. Eso era vakatovolea vakavica. A tovolea vakavica o Mika ka vakavica tale, ia sa sega ga ni cakava rawa vakavinaka okoya.
“Qasenivuli, e rawa beka ni o vukei au?” A taroga o Mika.
A vakaraici Mika na goneyalewa ka toka tikivi koya. Qai vuki yani vua na nona itokani. A vakasolokakana okoya “Na cava e dau vosa tu kina va oya okoya?” Erau vuki ruarua na goneyalewa ka vakaraici Mika.
Ena ilakolako i vale mai na kalasi, e a galu tu ga o Mika ena gauna kece oya.
Ni rau yaco ki vale, e a buli falawa tiko o Na e valenikuro. A tauvi falawa toka na baluna. E dau vakadredrei Mika oya ena so na gauna. Ia nikua a botolaka ga yani okoya nona kato ena fuloa ka dabe sobu ena idabedabe ena teveli.
E vakacava na danisi? A taroga o Na.
“Sa ca dina,” a kaya o Mika. “Au a kere veivuke, a qai kaya e dua na goneyalewa ni lasa na noqu ivosavosa. Qai vakawadravi au tu okoya.” A rai sobu o Mika. “Au sega tale vakadua ni via lako i danisi.”
“Isa, Mika!” A kaya o Na. “Au sa luvuci sara. Keirau dau taleitaka kei Ta na saravi iko ni o danisi. Keirau rui doka na gumatua ni nomu sasaga!”
A vakila o Mika ni sa tekivu drodro na wainimatana. “Au sega ni taleitaka na Down syndrome ka tiko vei au. Au sega ni taleitaka ni duatani na mataqu. Au diva me a kua so ni dredre vei au me vulica na veika vou. Qo au vakatovotovo tale mada ga ena vosa!”
A dabe sobu o Ta e yasai Mika ka taubeni koya ena ligana. “Mika, keirau lomani iko vakalevu sara. Keirau na sega ni veisautaka e dua ga na ka baleti iko.”
Ia a kuretaki ulu ga o Mika ka tabonaka na matana ena ligana. “Au sega ni via duatani tu. Au vinakata me kau tani vei au na noqu Down syndrome!”
Erau a vagagalu mada vakalailai o Na kei Ta.
“E dua na noqu nanuma,” a kaya o Na. A vakairoiro mai o Mika mai na ligana. “Vakacava mo masu ka tarogi Tamada Vakalomalagi ena Nona nanuma baleti iko?”
A vakasamataka oya o Mika. E dau taleitaka okoya na cabo masu. A mai deguvacu yani vakamalua okoya. “E rawa beka ni o vola na taro meu nanuma kina na ka meu taroga?”
E a vola sara na taro o Na. A qai taura na pepa o Mika ka lako ki na nona rumu me laki masu.
Ni lako mai o koya ki valenikuro ni oti e vica na miniti, e a serau tu na mata i Mika me vaka e dua na matanicina. “E a sauma mai o Tamada Vakalomalagi!” a kaya o koya.
“Na cava e a kaya o Koya?” A taroga o Na.
“E a kaya o Koya, ‘Mika, au lomani iko ena kemu ituvaki saraga oqori,’” a kaya o koya. “Ka kaya oqori o Koya ena domo LEVU!”
Ena danisi ena macawa tarava, a sega ni qai leqataka o Mika na nodra nanuma na goneyalewa baleta na nona Down syndrome. Ia me isosomi, a raica o koya e dua tale na goneyalewa, o Sara, ni yalorarawa toka. A sotava tale tikoga o Sara e dua na gauna dredre me vulica na ivukivuki vou eso.
Ni yaco i vale o Mika, a navuca o koya me vola e dua na ivola vei Sara. A droinitaka okoya e vuqa na uto. A vukei koya o Na ena veitikinivosa.
“Kivei Sara,” a vola o Mika. Ko sa dua na daudanisi totoka. Au vinakata meu nomu itokani. Au marau ni o lewe ni noqu kalasi ni danisi.”
A sega ni wawa rawa o Mika me solia na ivola vei Sara. E a vinakata okoya me marau ka lomani talega o Sara ena danisi.