Mo Vakakina se mo a Vakakina: Oqori me Tarogi

E kalouca, ni da dau vakatoka eso na yaca ni da tukuni ira tiko na tani. Me vaka, eda rawa ni tukuna eso na ka me vaka na:

• “E dua na daukaulotu vucesa o Elder Brown.” E dodonu beka me da kaya, “E sega soti ni cakacaka tiko vakaukauwa o Elder Brown ena dua na gauna lekaleka oqo, au vakabauta ni rawa ni vinaka cake o koya.”

• “E sega ni tamata lotu o Mary.” Kena veibasai, e rawa ni da kaya vaqo, “E sega soti ni taleitaka o Mary na lotu, ia e rawa ni vakila na Yalo kevaka au wasea vua na noqu ivakadinadina.”

Ni da kaya ni dua na tamata e dua na ka, e rawa ni da vakatokai koya ena dua na yaca se vakatauvatani koya kei na dua na ka, vakalelewa ka sega ni solia na galala me yaco na veisau se me vinaka cake. Ia ni da kaya ni a vakakina, eda tukuna tiko ni da vakabauta ni rawa na tubu kei na toso.

E levu na ivakadewa ni iVolatabu e solia na ivakadewa oqo ni dua na nona ivakavuvuli na iVakabula: “Dou kakua ni dau lelewa, de dou lewai” (Maciu 7:1). Ia na iVakadewa nei Josefa Simici e vakamatatataka: “Kakua ni lelewa vakatawadodonu … , ia mo lewa ena lewa dodonu” (ena Maciu 7:1, ivakamacala e ra a; vakaikuritaki).

Ena ciqomi dina—ka namaki sara mada ga—me da qai vakatulewa ni da sa dikeva, wasewasea, ka raica na ituvaki qai vakatauca na lewa. Ka sa bibi sara me da vakatulewa vakadodonu ni da veimaliwai kei ira na tamata.

Kena ivakaraitaki, sa dodonu me da vakasamataka vakamalua o cei me da vakawatitaka, vakayagataka na yalo ni kila na duidui mo kila kina na nona inaki e dua, se kalasitaka nona rawata e dua na tamata me qarava nona itavi vakacakacaka saumi.

E dodonu me da dau veidutaitaka nodra ivalavala na tamata se nodra itovonibula ena Nona itagede ni Turaga, me vaka e tu ena ivolanikalou kei na nodra vosa na parofita. Me kena ilutua, me da vakadeitaka ni noda vakatulewa ena sega ni segata me tukuna vakaca, vakatauvatana totolo, se vakatoka vakaveitalia e dua na yaca vua e dua.

Ena tawadodonu noda vakatulewa ni da vakatayaloyalotaki ira vakatani eso, vakabibi kevaka eda nanuma ni ra na sega ni rawa ni veisau. Ena noda veimaliwai kece sara kei ira tale eso, e dodonu me da nanuma ni ena nona isoro ni veivakaduavatataki na Turaga, sa rawa kina vei keda kecega me da vinaka cake. Vakasamataka mada na ivakaraitaki eso oqo ni iVakabula:

• E kaya o Koya vua na yalewa ka a tobo ni dautagane, “Lako, ka kakua ni ivalavala ca tale” (Joni 8:11).

• A tukuna o Koya vua e dua na turaga ka vakoti toka e Yasana, “Edaidai ga daru na tiko vata mai parataisi” (Luke 23:43).

• Ni sa vakaturi cake tale mai na mate, a tomana tiko nona kauwaitaka na vunilagi nei Pita ka uqeti koya, e dina ga ni sa cakitaki Koya oti vakatolu ko Pita (raica na Maciu 26:34 kei na Joni 21:15–17).

• E tukuna vei Saula, ka a dau vakacacani ira na Yalododonu, me veivutuni. A talairawarawa kina ko Saula, ka qai yaco me Paula, ka yaco me tamata dodonu. (Raica na Cakacaka 9:3–6.)

NaTuraga ko Jisu Karisito na jabeni ni tovolea tale mada vakarua—vakatolu ka vakava talega. A vakavulica vei keda o Koya me da vosota me “vakavitusagavulu na vitu” (Maciu 18:22). O Koya duadua ga na tamata a taucoko sara Nona vinaka ena nona mai bula e vuravura, ia ena vuku ni Nona bula, Nona ivakavuvuli, Nona isoro ni veivakaduavatataki, kei na Nona Tucaketale mai na mate, vakakina ena veicakacaka vakalotu ni Nona kosipeli, ena rawa kina me taucoko talega noda vinaka ena dua na siga. Noda raici ira na tacida kei na ganeda ena ivakarau ka tukuna na noda sega ni vakabauta ni rawa ni ra veisau sa tukuna tale tikoga na noda sega ni vakabauta na kaukauwa mana ni iVakabula kei na Nona Veisorovaki.

E dua na ka dina ni bula sai koya ni da dau vakalelewa (ka vakalewai) taumada ena keda irairai. E rawa ni da lelewa vakatawadodonu, ni da yavutaka noda lewa taumada ena irairai ka sega ni dikeva mada na nona itovo dina ni bula e dua.

“Ni sa sega ni raica ko Jiova me vaka sa raica ko ira na tamata; ni sa raica na ka esau ko ira na tamata, ia sa raica na yalo ko Jiova” (1 Samuela 16:7). A cavuti ira na dauveivakaisini ena Nona gauna ko Jisu me ra “ibulubulu boro vulavula, ka sa rairai vinaka e taudaku, ia e loma sa sinai … ena ka kecega sa velavela” (Maciu 23:27).

A sega ni vakatavulica na iVakabula ni sega ni ka vinaka na irairai vinaka ka maqosa e taudaku, ia ni bibi cake sara na nona ivakarau ni bula e loma (ituvaki ni savasava vakayalo) e dua na turaga se marama. Vakasamataka mada noda valetabu vakaturaga—e totoka na kena lomanibai ia me vakatayaloyalotaka na veicakacaka vakalotu bibi sara e dau vakayacori e loma.

O ira talega na daukaulotu e dau gadrevi me ra maroroya na itagede ni vakaisulu kei na maqosa ni kedra irairai. Ena nodra savasava, vakaisulu rakorako, ka ivosavosa vinaka, era sa ivakaraitaki vinaka kina vei ira era na vakaveikilaitaki ki na kosipeli i Jisu Karisito mai na veika era raica ka rogoca mai vei ira na daukaulotu.

Ni da segata me da vakatulewa vakadodonu, sa ka bibi mo vakayagataka na kilaka vakayalo. E kaya na iDusidusi Vakaivolanikalou na kilaka vakayalo sai koya “nomu kila e dua na ka mai na mana ni Yalo. … E oka kina nomu raica rawa na itovonibula ni tamata kei na ivurevure kei na ibalebale ni ivakatakila vakayalo” (“Discernment, Gift of”).

Ena so na gauna eso na tamata ka tu e lomadra na ca era dau vakayagataka na irairai vakavuravura me ra coriti keda me da nanuma ni dodonu me da vakatotomuri ira. Era sa “nanumi ira ni ra sa vuku ka vakasami ira ni ra sa yaloqaseqase” (Aisea 5:21; 2 Nifai 15:21). A rawa vua na iVakabula me raibaleta na matavulo oqori, ka rawa Vua me kila na itovonibula qaqa kei na inaki dodonu ni yalo vei ira sara mada na tamata yalomalumalumu ka lolovira.

A vakayagataka o Alama na kilaka vakayalo ena nona vosa vei ira era a “beci mai vei ira na tamata kecega me baleta na nodra dravudravua” ia era a vakalougatataki baleta ni ra sa yalomalumalumu ka “yalo lokomi” (raica na Alama 32:5–8).

Sa dodonu me da nanuma ni “veika ni yalo ni Kalou … sa kilai vakayalo ga” (1 Korinica 2:14). Ni da raici ira na tani me vaka Nona raici ira na Tamada mai Lomalagi, na kilaka vakayalo ena rawa kina vei keda me da vakatulewa vakadodonu.

Ena veisiga kece ni noda bula eda na vakatulewa ena noda wasewasea, dikeva, ka kila vakayalo. Sa namaka kivei keda na Turaga me da cakava vakadodonu. Ni da tisaipeli i Jisu Karisito, e dodonu me vakaraitaka na noda vosa kei na noda ivalavala ni da dau loloma, ka tuvakarau me veivuke.

Ni da daulelewa vakadodonu, ena gadrevi me da vakadeitaka ni da na kauwai vakalevu ena itovo ni nona bula e dua na tamata ka sega ena kena irairai. Ena gauna vata oqori, sa dodonu me da nanuma tiko ni ena veisiga eda na solia na imatai ni keda itukutuku mai na keda irairai kei na vosa eda vakayagataka. E levu na tamata ena dreta na yalodra me ra kila vakavinaka cake na itovo ni noda bula kei na itukutuku ni kosipeli kevaka e vakaraitaka na keda irairai na yaga cecere ni noda itukutuku.

Na noda Turaga ka noda iVakabula, o Jisu Karisito, sa vakaraitaka vei keda na ivakatakarakara uasivi sara me da muria ni da segata me da vakatulewa vakadodonu. Sa dodonu vei keda—me vakataki Koya—veidutaitaka na veika eda raica e taudaku kei na veika e yaco tiko ena loma ni tamata yadua.