Mai na Dauveivakasaurarataki ki na Papitaiso

iVakatakilakila

young men tempting Hugo to smoke

Droini mai vei Brooke Smart

Niu a se yabaki 17 kina, au dau sotava na veivakayarayarataki kaukauwa vakaveitokani ena noqu koronivuli torocake. O ira na noqu itokani oqo era sega ni duavata ki na noqu yavunibula. Keimami dau cakava vata vakaveitokani e vuqa na itaviqaravi vinaka me vaka na qito basketbol se soka. Ia era dau gunu yaqona ni valagi ka vakatavako—e rua na ivakarau au sega ni cakava vata kei ira.

Dua na siga eso vei keitou era a tiko e tautuba ni koronivuli mera vuli lesoni mera vakarau veitarogi ena caka tiko ena yakavi o ya. Rau a tu vata kei au e rua na noqu itokani voleka, o Juan kei Francisco ( sa veisau na yacadrau). Oti o ya, e dua sa taura sara mai e dua na masese kei na tavako. Au sa nanuma sara ni ratou sa vucesa na noqu itokani ena vuli lesoni ka sa guilecava niu tu e kea. Au kila sara niu a cala ni rau sa vuki mai ka kaya, “Sa gauna oqo vei Hugo me vulica na kana tavako.”

Ni bera mada ga niu kaya e dua na ka, rau sa kalawa mai o Juan kei Francisco ka taura na ligaqu, ka rau yadua na yasaqu. Rau a dreta sobu na ligaqu ka sosomaka e dua na tavako e gusuqu. Sa sega sara ga ni vinakata na yagoqu na ka oqo, kau kasivita laivi na tavako ki ra, vakayawa mai vei au. Ni oti o ya, au a vakila e dua na ivacu sa tau ki galegalequ. Rau a qai vakarerei au, ka kaya, “Keirau na waqara tale na tavako, mo na vulica sara mo kania na tavako. Mo kakua ni kolotaka e ra. Kevaka o na cakava, ena sega ni yaco na ka vinaka.”

Ena gauna o ya, au sa kila kina niu sa na leqa. Au a bobo ka cavuta vakatotolo e dua na masu ka kerea meu vukei. Ni oti ga na noqu masu, sa yaco sara mai na motoka nei neimami qasenivuli ka kele volekati keitou sara. Sa sobu mai o neimami qasenivuli ka taroga na cava keitou cakava tiko. Rau sa qai sereki au na noqu itokani. “Keitou sa vakavakarau tiko ki na veitarogi,” rau a vakadeitaka vei qasenivuli. Keitou a gole yani ki koronivuli ka veitarogi sara, ka sa mai tini e kea.

Dina ga ni a kaukauwa sara na ka au a sotava, au a vosoti rau na noqu itokani ena ka rau a cakava. Au kila ni rau sega ni kila na noqu ivakatagedegede kei na noqu lewa meu bulataka na Vosa ni Vuku, kau sa vosoti rau kina ka sa lomaqu meu kua ni yalocataki rau. Ni sa oti na vuli, au sa laki kaulotu sara ia au a veitaratara tikoga vei Juan kei Francisco. Au dau volavola vakawasoma vei rau ka wasea vei rau na kosipeli kei na noqu ivakadinadina baleti Jisu Karisito. Au a sureti rau me rau veivutuni ka gole ki lotu. Au a kurabui, ni dua vei rau sa gole sara ki lotu.

E liu au a dau sureti ira na noqu itokani ki na soqoni ni Sigatabu, ia a sega ni dua a vakaio kina ia sa yaco oqo. E dina ga niu sega ni rawa ni laki lotu vata kei Juan, e ratou sa tu e kea o taciqu kei tamaqu me ratou vukei koya ka vakaitokanitaki koya vakalotu. E ratou sa ciqomi Juan na noqu vuvale, ka sa kune vakacegu o koya ena lotu. Sa tekivu me veisau vakalalai o koya me yacova sara ni sa lomana me papitaiso. Au a marautaki koya vakalevu ka vakalevu cake ni a tukuna vei au ni sa vulica me lomani Jisu Karisito ena vuku ni noqu ivola. Niu sa lesu mai vale mai na noqu kaulotu, au a laki tiko volekati Francisco talega, ka oti toka e dua na gauna, rau a papitaiso talega vakaveiwatini. Nikua, rau se noqu itokani voleka tikoga o Juan kei Francisco.

Na veika a yaco oqo sa ivakatakilakila ni noqu bula. Au a vulica ni sala vinaka duadua me uqeti na bula ni tamata o ya mo bula dodonu, lomani ira na tamata, ka veivuke yani. Na ivolalailai Me iSakisaki ni iTabagone e tukuna, “Ni gadrevi mo vakaitokani vinaka, mo dua na itokani vinaka. Vakaraitaka ni ko dauveikauwaitaki dina sara; mo matadredredre ka vakaraitaka vei ira ni ko kauwaitaki ira.”¹ Oqo na ka a vukei au kina na Turaga meu cakava vei Juan kei Francisco. Ena vuku ni ka oqo, sa rua oqo na noqu itokani cecere sara au se qai bau kila, ka keitou sa cakacaka vata tiko nikua me tokoni na matanitu ni Kalou ni keitou sa lewe ni Lotu.

Mo dau tutaka tiko na ivakatagedegede ni Lotu, ena gauna mada ga o sotava kina na veituvaki dredre me vakataki au. E vakasalataka naMe iSakisaki ni iTabagone “Ni o saga mo dua na itokani vei ira tale eso, kakua ni veidabuitaka na nomu ivakatagedegede.” Kevaka era saga o ira na nomu itokani mo vakayacora na veika ca, mo dua mo na tutaka na dina”². Ena gauna mada ga ni sa vaka mera cakava na tamata kecega na veika e veisaqasaqa ki na ivakaro, mo tu kaukauwa baleta ni nomu ivakaraitaki e ka kaukauwa. Mo mataqali ivakaraitaki era na nanuma na nomu itokani ena nodra gauna ni leqa. Ena so na gauna me vakataki au, na nomu veitokani sa na rairai koya sara ga na ka ena vukei ira mera vuli mai kina, veivutuni, ka veisau.