Na Veivakalougatataki ni Dua na Bonisi

iVakatakilakila

man holding bags of food

Droini maivei Ale + Ale, Morgan Gaynin

Se qai sucu oti toka na neirau ulumatua kei watiqu o Carmen ena gauna au sa kacivi kina meu bisopi ni neitou tabanalevu. Ena gauna o ya, a dredre sara na neitou bula vakailavo. Au a lomaocaoca sara meu qarava na noqu vuvale ka vakakina ena gauna vata oqori meu na raica ka qaravi ira na lewenilotu ni neimami tabanalevu.

Dua na Sigatabu, au a raica e dua na tinani gone sega ni vakawati kei na va na luvena ena soqoni ni sakaramede. A dabe toka o koya ena iotioti ni idabedabe e valenilotu ka saga nona vinaka taucoko me ratou tiko vakamalua na luvena. Au a kila ni dredre talega na nodratou bula vakailavo, ia a sega ni bau kerea me vukei. Toso tiko na veimacawa, e ratou gole mai vakaveitinani ena vei Sigatabu ki lotu.

Dua na siga, au a taura na kequ isau. Au a kalougata niu a taura e dua na bonisi, kau sa via vakayagataka sara na ikuri ni ilavo oqo meu volia na iyaya me vakavinakataki na noqu vale sa ca sara tiko. Ia niu sa gole tiko ki na sitoa, au a vakasamataka sara na sisita oqo kei iratou na luvena. Sa lomaqu sara meu vakayagataka na ikuri ni ilavo oqo meu volia na kedratou kakana. Au a qiriti Carmen sara ka kaya vua na ka au sa gadreva meu cakava. A vakadonuya mai.

Niu sa volivoli tiko, au a raica sara eso na bisikete kamica. Au nanuma ni rairai ratou na taleitaka na gone eso na bisikete kamica. Au a vakasinaita e rua na taga kakana ka gole yani ki na vale nei sisita oqo.

Au a tukituki vakavica ena katuba-kau sa vuca tu. Niu sa vakarau lesu tale, sa qai dola mai na katuba. “Bisopi,” a kaya mai o sisita, “Au kurabui niu raici iko eke.” Vakasauri ga, e ratou sa cici mai dakuna na luvena.

“Au kauta mai eso na kemudou kakana,” au a kaya.

Dua na luvena yalewa a raica na bisikete kamica ka kailavaka, “Cookies!” E ratou a maqusa mai e yasana na ganena kei na tacina. A mokoti au sara mai e dua na luvena yalewa yabaki vitu. “Vinaka vakalevu, Bisopi!” a kaya mai.

Au a raica yani na loma ni nodratou vale ka raica ni o sisita oqo e savaisulu tiko ena dua na tavuteke ena vuloa. Na vuvale oqo e sega na nodratou teveli ka ratou moce ena meteresi ena vuloa. Au sa raica rawa na levu ni veika e ratou gadreva. Au sa veivosakitaka sara me raici me dua na nodratou teveli ka me ratou na yadua na loga.

Na ka au sotava oqo a vukea meu kila kina ni Turaga sa dau dusimaka ka vakalougatataki ira na Nona italai. E sega ni gadrevi me dua na noda veikacivi cecere sara meda qai laki vukei ira na tacida kei na ganeda. Sa gadrevi ga meda lomavata tiko kei na Yalo, ka kila rawa o cei e gadreva na noda veivuke, ka me lomada sara meda iyaya ni cakacaka ena liga ni Turaga.