Sega ni Rere me Wasea na Dina
Ni sa vakaiyaragi tu ena ivakadinadina ni kosipeli kei na kena veivakalougatataki, e sega ni tarovi Fabian me vaka ni se cauravou lailai me lewenilotu daukaulotu kaukauwa, ka sega ni rere.
Sa laki dromu toka na siga mai Las Tomas, e dua na itikotiko veiwekani e toka ena veinuku uataletale e delai Antofagasta. E ra, sa tekivu me ra waqa mai na veicina ni sa mai bogi toka na siti oqo ni ikelekele ni waqa ni vualiku kei Chile.
E sa bogi ni Vakarauwai, ka sa rawa vei Fabian yabaki 13 me laki wavoki vata kei ira na nona itokani. Ia o Fabian, ka se qai lewe ni Lotu vou, a digitaka me vakayagataka na yakavi o ya vata kei rau na daukaulotu. Sa kena gauna “me veivuke ena sokumuni i Isireli.”1
Mai vei ira kece sara na lewenilotu daukaulotu yalodina rau a cakacaka vata kina o Kellen VanNatter kei Jordan Shelton ena nodrau kaulotu tiko e Chile, sa uasivi cake vei ira kece o Fabian.
“Ena gauna e galala kina, e dau gole vata kei keirau ena cakacaka ni kaulotu,” e kaya o Kellen. “Ni dau cava na gade ni vulai katakata, e dau rarawa sara o koya sega walega ni baleta me sa lesu ki vuli ia sa baleta talega ni lailai sara na gauna ni nona lako vata kei keirau.”
E vakuria o Jordan, na itokani nei Kellen ena vica na vula, ni “A rairai va se lima na gauna a gole vata kina kei keirau o Fabian ena dua na macawa—ena veimacawa—ni keitou veiqaravi vata tiko mai Antofagasta. E a dua na lewenilotu daukaulotu vinaka duadua keirau se bau cakacaka vata kaya vakadua.”
Na cava e vakavuna e dua na cauravou me lomana dina sara me cakava na cakacaka ni kaulotu dina ga ni vakalewai mai vei ira na lewenikalasi ka vakawaleni mai vei ira na tani? Vei Fabian, sa kena isau na veivakalougatataki e sa ciqoma o koya kei na nona vuvale me tekivu mai na nona a ciqoma kina na kosipeli—na kalougata e vinakata me wasea vei ira na tamata.
“Reki Sega ni Vakamacalataki Rawa”
A tekivu tauri lesoni ni kaulotu o Fabian ni oti toka ga vakalailai na nodrau a mai tukituki e vale na daukaulotu. E se nanuma tikoga na imatai ni nona soqoni ni sakaramede.
“Au a sega ni kila rawa e dua niu curu yani e valenilotu, kau a yalolailai kina vakalailai,” a kaya. “Ia au a vakila e dua na ka totoka. Au a vakila ni sa vaka meu lewena tu na Lotu ena vica vata na vula se yabaki.”
Ni sa papitaiso ni oti toka e vica na macawa, “Au a vakila e dua na reki sega ni vakamacalataki rawa niu sa tabadromuci e wai ka lamata cake tale mai. Au vakila niu sa vaka e dua na tamata vou, niu kila niu sa na muri Jisu Karisito ka cakava na noqu vinaka taucoko meu maroroya na Nona ivakaro.”
Ni rau sa mai tomani Fabian na nona itubutubu rau se bera ni vakamau o Leonardo kei Angela ena gauna ni lesoni ni kaulotu, rau a vulica kina na vakamau e valetabu kei na vuvale tawamudu. “Ni oti e dua na macawa, sa lokuca o tamaqu na tikinisiga me rau sa vakamau kina,” a kaya o Fabian. “Sa dua na ka na marau nei tinaqu.”
Ni oti e va na vula ni sa mai lewena o Fabian na Lotu, a muri koya o Angela ki na wai ni papitaiso. “O ya sa dua na veivakalougatataki totoka dina,” a kaya.
Sa veimuri totolo sara mai na kalougata tale eso. A papitaiso o Leonardo ni se cauravou lailai, ka sa lesu tale oqo ki Lotu. Sa yaco na vulici ni kosipeli me veisemati tiko ena nodratou itikotiko. Era sa veivolekati sara na lewe ni matavuvale. Sa kunea o Leonardo na cakacaka tudei. Sa ciqoma sara o Fabian na Matabete i Eroni.
“Au taleitaka meu dua na matabete meu rawa ni vota yani na sakaramede vei ira na lewenilotu ni tabana ka vukei ira mera vakavoutaka na nodra veiyalayalati,” e kaya o Fabian. “Au dau marautaka vakabibi meu vota yani ki na noqu matavuvale kei ira na italatala qase era a vakavulici au. Ni dau raici au o tamaqu ena cecekia niu sa vota tiko na sakaramede au dau marau sara ga kina vakalevu.”
“Ena Totoka Sara Qori”
A tekivu lewenilotu daukaulotu o Fabian ni se bera mada ga ni papitaiso.
“Au a tukuna vei iratou e tolu na noqu itokani niu sa na papitaiso tiko. E rua a qai lako mai,” a kaya. “Au gadreva meu wasea na kosipeli me ratou kila na noqu itokani na veika eda vakabauta kei na veika eda cakava tiko e valenilotu me rawa ni ra vulica na kosipeli, papitaiso, ka mua yani ena bula marau vakalevu cake. Au na marau vakalevu cake ke dua vei iratou mena papitaiso ka me mai lewena na noqu kuoramu. Ena totoka sara qori.”
Sa dau tiko vei Fabian e dua na iVola i Momani e koronivuli, ka kauta voli na tikidua ni kaulotu me solia vei ira na nona itokani. Sa dau marau me sauma na vakatataro me baleta na Lotu ka sureti ira na itokani ki na soqoni ni Sigatabu kei na bogi ni itaviqaravi ni itabagone. Ka sega ni rere me vosa vei ira na tamata e gaunisala ka me vaka rau a vakavulici koya kina na daukaulotu, e dau sureti ira mera vulica na veika e baleta na Lotu ka vakavakarau ki na papitaiso.
“E sega ni kauwaitaka o Fabian ke dua e kaya ni lialia ni wasea tiko na nona ivakadinadina,” e kaya o Kellen. “Sa kila tu o koya ni sa cakava tiko na ka dodonu. E kila o koya ni veika vakayalo sa ka bibi cake mai na veika cava ga.”
Ni dau wasea o Fabian na nona ivakadinadina, e kaya o Jordan, e dau vagolea mai na kaukauwa ni nona saumaki vou, nona lomana na kosipeli, kei na nona kalougata.
“Sa raica o koya na kalougata sa yaco ki na nona vuvale, sa vakauqeti koya kina me yaloqaqa cake ka doudou me wasea na kosipeli vei ira na nona itokani,” e kaya o Jordan. “Dua na gauna a vakadinadinataka tiko o koya vua e dua na dauvakadidike me baleta na kalougata levu vei rau na nona itubutubu ni rau sa vakamau ia a dredre vua me wawa me va na vula ni oti na nona papitaiso me na papitaiso o tinana. Sa luluvu sara na lomana, ka turu kina na wai ni matana. A qai vakadinadinataka ni kevaka meda na maroroya na ivakaro, ena taqomaki keda na Kalou.”
Na ivakadinadina nei Fabian sa yaco kina me dua na lewenilotu daukaulotu kaukauwa, e tomana o Kellen.
“E sega ni vakataki ira era kaya, ‘Io, au a rogoca e dua ena lotu ni a kaya oqo.’ Ia, sa dau wasea ga na veika e dau sotava—me vakataka na veika e vakila ni gole yani ki lotu ena imatai ni gauna kei na nona nanuma ni dau wilika na iVola i Momani. Era sa ka dodonu taucoko ka dina sara.”
“Au Dau Lomavinaka Cake Kina”
Kivei Fabian, na wasei ni kosipeli e dau kauta mai e dua tale na kalougata.
“Eso na gauna e dau yaco vei au na ka ca e koronivuli, ia ni rau dau mai tukituki na daukaulotu ena noqu katuba ka kerea meu vukei rau ena veivakavulici,” a kaya. “Niu dau gole vata yani kei rau, e vaka meu vakila ni sega tu na noqu leqa. Au dau lomavinaka niu gole vata kei rau, wilika vata kei rau na ivolanikalou, ka vukei rau me wasei na kosipeli. Niu wasea na kosipeli kei na italanoa ni noqu saumaki mai e vaqaqacotaka na noqu ivakadinadina. Kei na vakavulica na kosipeli e solia vei au na madigi meu ivakaraitaki kivei ira na tamata, oka kina o ganequ lailai.”
E sega ni kurabuitaki ni dua na lalawa cecere nei Fabian o ya me laki kaulotu tudei ni oti nona qeretueti mai koronivuli torocake.
“Au vinakata meu wasea na dina kivei ira era sega tu ni kila,” a kaya. “Au vinakata meu sureti ira mera savata laivi na nodra ivalavala ca. Au vinakata meu vakavulica vei ira na sala mera dua na vuvale tawamudu. Au vinakata meu sureti ira mera marau ena gauna oqo ka bula voli ena ituvaki ni marau tawa cava rawa ni oti na bula oqo.”