Eratou Bucina e Yaloqu e Dua na Sorenikau

iVakatakilakila

heart-shaped wreath of leaves with seed in middle

iVakaraitaki mai vei Rafael López

Au a lako mai vei? Na cava au cakava tiko eke? Eda na lako kivei ni sa cava na bula oqo?

Niu yabaki 29, era dau lesu tikoga mai vei au na taro eso oqo. Erau sa takali na noqu itubutubu. Au a lolositaka nona sa mai yali noqu ulumatua tagane. E tolu tale na luvequ meu susuga kei na bula sinai tu ena bolebole.

Sa tekivu sauma noqu masu na Turaga ena nona tuberi rau mai e rua na cauravou daukaulotu ki na noqu vale. Niu kidavaki rau mai ki loma, erau taroga kevaka au vakila ni dua na ka e yali tiko ena noqu bula. Au tukuna vei rau me baleti rau noqu itubutubu kei na luvequ tagane. Au tukuna vei rau niu nanuma ni sega ni donu me da vakaluveni ka tauyavutaka na matavuvale kevaka ena yaco ga ena mate na ka kecega. Au taroga kevaka au na raici rau tale na noqu itubutubu kei na luvequ tagane.

“Marta,” erau kaya, “e rawa ni nomu me tawamudu na nomu matavuvale.”

A vakasinaiti ena marau na yaloqu. Au vinakata meu kila e levu tale na ka. Ena nodrau veisiko mai ka tarava, erau a vakavulica vei au eso tale na ka me baleta na kosipeli i Jisu Karisito. Erau solia vei au e dua na iVola i Momani ka bolei au meu wilika ka taroga na Kalou kevaka e Nona vosa. Au ciqoma nodrau bolebole. Niu masu, e matata mai me vaka na cilanisiga na kena isau mai vua na Kalou. Au kila e yaloqu ni dina.

Ka ni rarawa, niu taura e dua na cakacaka vou, a mani sega ni rawa niu veitaratara kei rau na daukaulotu. Ena veivula e tarava, sa mai oti noqu bula vakawati kau tovolea meu tekivuna e dua na bula vou kei ira na luvequ.

Au mani qai vakawati tale. Ena dua na siga a kaya na watiqu ni sa calata dina ni yali tiko na Kalou ena nona bula. Keirau sa mani nanuma me keirau lako ki na lotu e dau lotu tu kina e liu. Ni keirau curu yani, au raica e dua na iVola i Momani ena dua na teveli ena varada. Sai koya ga oqo na lotu au a sa vakaveikilaitaki oti kina e liu! Au taleitaka vakalevu na yalo au a vakila e kea. Ni keirau lesu, au taroga na watiqu meu na papitaiso vakacava.

“O na gadreva me rau vakavulici iko na daukaulotu,” a kaya mai o koya.

“Au a vakavulici ena lima na yabaki sa oti!” Au sauma lesu.

Keitou a vakavulici ena lesoni vata kei iratou na luvequ. Na neitou siga ni papitaiso na siga marautaki duadua ena neitou bula.

Ena vica vata na yabaki e muri, au nanuma ni dodonu meu tukuna vei rau na goneyalewa erau a vakavulici au taumada niu sa lewena na Lotu. Au a raica ena ivolamata e dua na ilala lesu mai na kaulotu mai na Tabana ni Kaulotu na Brazil Santa Maria. E tiko kina e dua vei rau na daukaulotu erau a vakavulici au. Au vakauta vua e dua na kerekere me keirau veitokani kau tukuni au vua, na noqu sa mai lewena na Lotu, ni sa vauci ena valetabu na neitou matavuvale, ni sa veiqaravi tiko vakadaukaulotu tudei na luvequ tagane. Au tukuna vua ni rawa na ka oqo baleta ni rau a bucina o koya kei na nona itokani na sore ni kosipeli vakalesui mai ki yaloqu.