Dodonu Beka Meu Wiliwili Tikoga?
Ena yabaki sa oti au a taura mai e dua na ivola ena vale‑ni‑wilivola baleta e dua na goneyalewa ka a tekivuna e dua na buloqi. Au nanuma ni na dua na ivola taleitaki baleta na dauniivola e keirau yabaki vata, ka dua na dau‑ni‑buloqi o tinaqu. Ka’u nanuma ni na dua na ivola au rawa ni vakayagataka.
Au se qai wilika ga e vica na taba ni ivola sa tekivu cavuta walega na yaca ni Turaga na goneyalewa oya. Au sega ni yalovinaka ni oti noqu wilika na tikina oya. Ia au a wiliwili tikoga, ka nuitaka tiko ni oya e ka yaco vakavudua ga. Au wilika e vica tale na tabana, ka baci cavuta tale okoya.
Au a lako ka tukuna vei tinaqu baleta na ka au raica. Au sega ni kila meu wiliwili tikoga se sega. A tukuna vei au o tinaqu ni oqori na noqu digidigi. Ia a duavata okoya ni rairai sega so ni ka vinaka meu wiliwili tikoga ke kaya tiko o goneyalewa na veika eda kila ni cala. A kaya o tinaqu ni ca vakabibi sara ke cavuta walega na yaca ni Turaga okoya.
Au a nanuma meu raica kevaka ena yaco tale, au mani vacega yani na ivola. Au a raica ni cavuti walega na yaca ni Turaga e sa ivakarau matau ni nona ivosavosa na goneyalewa oqo. Au a lewa meu kua ni qai wiliwili tale ka vakasuka na ivola ki na vale‑ni‑wilivola.
Au a lomabibi ni cavuta walega na yaca ni Turaga o koya a vola na ivola. Ia niu vakasuka oti na ivola ki na vale‑ni‑wilivola, au a marau niu a digidigi donu. Au kila niu a muria tiko na “Noqu Yavu ena Kosipeli” mai na noqu ivola Vakabauta na Kalou ka kaya, “Au na wilika ka sarava ga na veika e taleitaki vei Tamada Vakalomalagi.” Au kila ni dodonu meda cavuta ga na yacadrau na Tamada Vakalomalagi kei Jisu ena vakarokoroko kei na veidokai.