Qaravi Turaga vakaSipeni

iVakatakilakila

Serving the Lord in Spanish

Vakasamataka ni solia vei iko nomu itokani na ivola vinaka duadua e sa bau wilika okoya. Ni o cega na waqana … qai raica ni o sega ni rawa ni wilika na ivola. E duatani tu na kena vosa! Na cava beka mo na cakava?

Ni se qai tekivu vou na Lotu, na iVola i Momani e a tabaki ga vakaValagi. E a kaciva e rua na daukaulotu o Peresitedi Brigham Young me vunautaka na kosipeli e Mexico ka vakadewataka na iVola i Momani vakaSipeni. Ia e rau a gadreva vakalevu sara na veivuke. E rau sega ni kila ni mai na wasa kadua, e a sa vakarautaka na Kalou e dua na tagane ka na rawa ni solia vei rau na veivuke saraga rau gadreva.

O Meliton Gonzalez Trejo e lako mai na dua na matavuvale vutuniyau e Sipeni. E a vuli vagumatua e koronivuli ka yaco me dua na turaganivalu ena mataivalu ni Sipeni. E a dau taleitaka okoya na lotu, ia a sega ni kunea rawa na kena e donu vei koya. Ena dua na siga a rogoca ni talanoataka e dua tale na turaganivalu baleta e dua na ilawalawa ka vakatokai ira mera “Yalododonu.” Era lewena na Lotu i Jisu Karisito ni Yalododonu Edaidai, ka a liutaki ira e dua na parofita ni Kalou ki na Rocky Mountains e Amerika. A vakila o Meliton e dua na gagadre kaukauwa me sotavi ira. A lewena okoya ena dua na ilakolako vakamataivalu ki na Filipaini, ka nuitaka ni na vukei koya emuri me dewa yani ki Amerika. Ia a osooso sara o Meliton ena cakacaka ka sa sega so ni bibi na sikovi ira na Yalododonu.

A qai mani tauvimate bibi sara o Meliton. A nanuma okoya na vu ni nona lako mai ki na Filipaini ka masuta na Kalou baleta na ka me cakava. Ena bogi oya, a yacovi Meliton e dua na tadra duatani. E a kila okoya ni a dodonu me lako ki na Rocky Mountains.

Ena nona bula ga mai na tauvimate, a tomana sara nona ilakolako o Meliton ki Amerika. E a yaco okoya e California ena ika 4 ni Jiulai, 1874, ka gole sara ki Salt Lake City.

Ni yaco yani ki Salt Lake o Meliton, e a sotava e dua na leqa: okoya e rawa ni wiliwili vakaValagi ia se sega vakadua ni vosataka. A sega ni rawa ni veitalanoa kei dua okoya! A qai lewa kevaka e sega ni rawa ni vosa vei dua,ena vauqeti ira okoya ena dua tale na sala mera malele vua. A tokara o Meliton na nona isulu ni mataivalu ni Sipeni ka tayabe yani ena vei sala ni siti. Me vaka a nuitaka, e lewevuqa era a raici koya! Sa qai raici koya e dua na lewe ni Lotu a yacana o Brother Blanchard, e a parofesa ni univesiti ka dau vosa vakaSipeni. A vukei Meliton o Brother Blanchard me vakaitikotiko e Salt Lake ka vakavulica vua na kosipeli. Sega ni dede sa papitaiso o Meliton.

A vakatakilaitaki Meliton talega o Brother Blanchard vei Peresitedi Brigham Young. A tukuna o Meliton vei Peresitedi Young ni mai na veika kece sara, e vinakata okoya me vakadewataka vakaSipeni na iVola i Momani.

A kerei Meliton o Peresitedi Young me vukei rau na daukaulotu ka rau na lako tiko ki Mexico me vakadewataka vakaSipeni na veitiki eso ni iVola i Momani. A vakavakadewa tiko o Meliton mai na vosa vakaValagi ki na kena vakaSipeni me vuqa na macawa. Ena veibogi yadua a railesuva okoya na nona vakavakadewa vata kei rau na daukaulotu. Erau dau vosa vakaSipeni vakalailai ia rau vakila ni vakavakadewa bibi oqo e gadreva e dua na kenadau. Erau a kila ni o Meliton e sa isau ni nodra masu. Na ivakadewa a qai tabaki ena 1875. E a vakatokai na Trozos Selectos del Libro de Mormon (iWase Digitaki Eso mai na iVola i Momani).

Erau sa qai vakarau oqo na daukaulotu me lako ki Mexico. Erau a vakavodoka ena ose e 1,500 na ilavelave ni ivolanikalou vakadewataki ka gole yani nodrau ilakolako. Sa qai vakadua, mera qai rawa ni wilika na iVola i Momani na dauvosa vakaSipeni ena nodra vosa ga! Dina ga ni a bula tu o Meliton ena udolu vaka udolu na maile mai Sipeni, e a tuberi koya na Tamada Vakalomalagi ki na vanua donu sara ga e gadrevi me tu kina. Baleta na nona yaloqaqa kei na vakabauta o Meliton, e a vukea okoya na kau ni vosa ni Kalou kivei ira na tamata e tawa‑wili rawa.