O Ira na iTokani Era A Wasea Vei Au na Nodra Rarama

Au a vakaitikotiko vata kei tinaqu ena dua na taoni lailai mai Mexico ka keimami veikilai kece sara kina vakayadua. Au sa kila na dodonu mai na ka cala, ia au se veilecayaki ga niu goneyalewa duadua ga e lotu tiko ena taoni taucoko.

Au sa vinakata meu okati, kau sa qai cakava e dua na ka e vakaibalebale cake na gauna o ya: me dua na noqu itau cauravou. Oqo e dua ga vei ira na imatai ni cala au sa tekivu cakava. Au sa vagolei vakarawarawa mai na nodra idre na itokani kau sa vakabauta niu sa matua cake meu vakatulewa ga vakai au, sa kena ibalebale niu sa na goneyalewa sega ni laki lotu sa bula voli ena butobuto.

Au a bula voli ena butobuto me dua na yabaki, ka sa butobuto cake tikoga na veisiga yadua. Na noqu vakatulewa dravudravua sa yaco meu veiba kina e vale, kau kila niu sa sega ni rawa meu tiko vata tale kei iratou. Ia na gauna a mai mate kina e dua na itokani voleka Yalododonu Edaidai au sa qai kila kina ni yali tiko e dua na ka. E ka ni rarawa, niu sa beitaka na Kalou kei na kosipeli. Au sa sega tale ni vakabauta ni veivakalougatataki o ya e yaco ga ena talairawarawa. Au sa qai kila kevaka au na sega ni tekivu bulataka na kosipeli, au na vakanadakuya tikoga na kequ isema ki na Lotu kau na bula voli ga vakavuravura.

Au a dabe buto toka ena noqu loga, kau tagicaki au sara niu sa kila niu sa rere—au rere niu sa tiko duadua ka sega e dua me keirau veivosaki vata, au rere niu na sega ni vakavinakataka rawa na cala au sa cakava, kau rere ni sega e dua me na vosoti au, vakabibi na Kalou.

Ni oti oya, au sa toki ki Minnesota, e Amerika, vata kei buqu kei tukaqu, e rau sega ni lewe ni Lotu. A vuka vata kei au o tamaqu vakacabecabe, ka keitou a laki lotu ena imatai ni noqu Sigatabu e kea, ia ena soqoni ga ni sakaramede. Ni sa oti na soqoni, au sa tucake meu sa biuta na valenilotu, ia au kurabui, ni keitou gole tiko ki na neitou motoka, keitou raici bisopi ni sa cici tiko mai. A vakatarogi keitou vakalailai ka sureti keitou ki na Sigatabu e tarava—ka keitou a cakava.

Ena Sigatabu e tarava, ni sa vakarau cava tiko na soqoni ni sakaramede, ni bera niu tucake, era sa wavokiti au na goneyalewa ni tabanalevu o ya—ira na goneyalewa era na vukei au meu veisautaka na noqu bula.

iVakatakilakila

young woman by a path leading to a church in the distance

Droini mai vei Alberto Ruggieri

Au sa curuma oqo e dua na vuravura e duatani vakadua: e dua na vuravura e tiko na kena bisopi kei koya na peresitedi ni Goneyalewa a kauwaitaki au, vakabibi, o ira na goneyalewa era saga mera bulataka na kosipeli e veisiga, era saga mera bula voli ena itagede cecere ka tutaka na dodonu. Era sa rarama sara ka rawa mera vakararamataka na sala sa tu e mataqu.

Au sa qai kila e kea na cava meu na cakava: “Me caudre vakakina na [noqu] rarama e na matadra na tamata, me ra raica na [noqu] ivalavala vinaka, ka vakarokorokotaka na [Tamaqu] sa tiko mai lomalagi” (raica na Maciu 5:16). Au sa qai tekivu ena noqu gole yani ki lotu kei na Muavata ena veimacawa, wilika na iVola i Momani ka masu e veisiga, vakaisulu rakorako, cavuta na vosa savasava, gole ki valetabu, ka vakarautaki au meu ciqoma na noqu veivakalougatataki vakapeteriaki.

Au sa veisau vakadua, ia au sega tiko ni kila oqo me yacova ena dua na gauna ni keba ni Goneyalewa, niu a vakila kina na Yalo Tabu ka kunea kina ni sa dua na noqu ivakadinadina—na ivakadinadina ena tukuna tikoga vei au ni Kalou e lomani au, ni sa tiko na Nona ituvatuva me baleti au, ka sega ni vinakata meu na bula galili voli. Na ivakadinadina e ramase sara ka kaukauwa sa mai veisautaki au. Na ivakadinadina me wasei yani ka sega walega ni vakararamataka na noqu salatu ia vei ira talega na tani’. Na ivakadinadina e sega ni rere me ramase yani ena butobuto.