Dua na iSala Vulavula vei Florence

iVakatakilakila

A White Cap for Florence

A yacova yani nona vanua matau ena makete‑e‑tautuba osooso e Onitsha, Nigeria o Florence Onyejekwe, yabaki tinikatolu. A vutucoqa na gaunisala vei ira na dauvolivolitaki era kaci tiko yani vei ira na volivoli. Era colata na marama nodra ioloolo e buradeladra ni ra taubale voli. E se qai sereki ga na vuli, ka kila o Florence ni ra marautaka tiko nodra cegu mai na kalasi na nona itokani. Ia a vakayagataka o Florence nona sereki ena volitaki kakana draudrau na bitterleaf ena makete. E sala duadua ga vua me rawa ilavo kina me baleta nona icurucuru ni vuli.

Ia, a sega ni bau vosa kudrukudru o Florence. Dina sara, o tinana e dau tu vakabalavu sara ena makete e veisiga ena volitaki uvi me voli kakana kina me baleta na matavuvale. E a cakacaka vakaukauwa sara o Mama. Erau vakakina ruarua na nona itubutubu. Ia ni sega so na vuli vinaka, e lailai ga na ka erau rawa ni cakava. E sa voleka ni cava nona vuli o Florence ena vatagedegede e ra. E rairai kevaka e tomana nona vuli okoya, ena rawa ni rawata e dua na cakacaka sau-vinaka ka vukea nona matavuvale.

Ni lesu ki vale okoya, e a tarogi rau nona itubutubu o Florence, “Drau nanuma beka niu rawa ni lako ki na koronivuli torocake? Ki na univesiti sara beka?”

A raici Nnam (ta) ga o Mama ka kurea na uluna. “E levu sara na isau ni univesiti mai na ka e tu vei keirau,” a kaya o Nnam. A raica sobu o Florence na nona ivava. A sega ni vinakata okoya me raica o Mama kei Nnam na nona lomabibi.

Ni oti e vica na siga, a mai tao o Florence e valenibula me kauta eso na wainimate. E via osooso sara na valenibula me vaka na makete, ia sega ga ni vaka na kena kosakosa. A vakawadravi ira na nasi o Florence ena nodra isala vulavula, yayani vinaka. A raitayaloyalotaki koya ni tokara tu e dua na unifomu va oya, vukei ira tiko na tauvimate ka qaravi ira na peipei ena dua na valenibula levu. De rairai ena yaco okoya me dua na nasi.

A kila o Florence ni rau dina na nona itubutubu—na rawati ni vuli ena dredre. Ia a kila o Florence na ivakarau ni cakacaka vakaukauwa. A mani lewa okoya me tovolea.

Se vakacava na levu ni nona itavi ena dua na siga, o Florence e dau vakarautaka na gauna me vuli kina. A rawata okoya na veitarogi ni vuli torocake, ka a dinautaka o Nnam na ilavo e ganita me lako kina okoya. A qai kila emuri okoya ni na veivuke na matanitu ena sausaumi ki na koronivuli ni nasi. Sa na rawa ni yaco na nona tatadra!

Ia ni yaco mai na gauna me tekivu na vuli nasi, a via vakatitiqa vakalailai o Florence. Vakacava ke sa rui dredre? Vakacava ke galili okoya? A cuva o Florence ka masu, “Noqu Kalou lomani, kerea mo ni solia vei au na kaukauwa meu lako ki vuli nasi ka cakacaka vakaukauwa.”

E koronivuli ni nasi, a vulica o Florence na ivakarau ni soli wainimate kei na maroroi ni iyaya‑ni‑cakacaka mai na manumanu‑ni‑mate. So na gauna era bula vinaka mai na nona tauvimate, ia so na gauna e sega. A dau masu wasoma o Florence me vakaukauwataki. Ni oti e tolu na yabaki balavu, a tauri ivola o Florence kei na icocovi ni gonevuli vinaka duadua ena nona kalasi. Sa qai yaco dina na nona tatadra! Sa qai tokara okoya na isala vulavula ni nasi, ka rawa ni rawaka me vukea nona matavuvale.

Vuqa na yabaki emuri, a sikova o Florence e dua na tabana lailai ena Tabana ni Kaulotu mai Ghana Accra. E a peresitedi ni tabana ni kaulotu ekea na watina, o Christopher Chukwurah. A sotava o Florence eso na gone ena tabana era sega ni rawa ni dau lako ki vuli. Era sega ni kila na ka era na cakava ena nodra gauna mai muri. Era vakananumi Florence ni a se gone okoya. “Na cava au rawa ni kaya meu vukei ira kina?” A masu lo o Florence.

A qai vakila okoya e dua na veivauqeti matata: Tukuna vei ira me baleta na nomu bula.

A vakananuma o Florence me baleta na nona bula. A sa cakacaka okoya ena vei valenibula eso e Nigeria kei Amerika. A vakawati okoya kei na dua na tagane vinaka, ka rau a kunea vata na Lotu i Jisu Karisito ni Yalododonu Edaidai. A yaco okoya me dua na tina. Ia oqo sa vukei ira tiko na daukaulotu okoya mera tiko bulabula ka cakacaka vakaukauwa. E a vukei koya na Tamada Vakalomalagi me yaco me dua na nasi. A vukei koya me rawaka vakalevu cake sara mai na veika e sa bau vakanananutaka okoya. E rawa ni vakayacora talega vakakina oKoya vei ira na gone oqo.

A raici ira na gone o Florence ka matadredredre. “O ni kila na isala vulavula era dau tokara na nasi? Au a raica e dua na isala va oya ka lomaqu meu nasi …”