Na Veivakananumi ni Masu

iVakatakilakila

Just a Prayer Away

E a mata cake mai na imocemoce ena kidacala o Prodi. E a tavatukituki na nona uto.

E a bisa na delanivale na uca ni dabe toka okoya ena butobuto. E a rogoca rawa okoya na tuturu ni wai mai na vu ni lolo ni Aferika ena tautuba ni nona katubaleka, ka vakila ni drakidrakita ka katakata na cagi. E a taura e dua na icegu levu o Prodi ka tovolea me vakadodo. Oya e a dua walega na tadra.

E a qasi mai ra ena imocemoce ka iro yani ki na rumu ni nona itubutubu. E rau a moce lutu koto o Nana kei Tata. Na ganena lailai, o Célia, e a lokini tale toka ga ena nona imocemoce. E a daumaka tu na veika kece. E a maroroi vinaka tu na nona matavuvale.

E a kaba lesu ki na imocemoce o Prodi ka tovolea me moce tale. E a veivukiyaki okoya, ka se baci veivukiyaki tale vakavica. E a kila okoya ni sega ni dina na nona tadra, ia e a rui veivakarerei sara! Dina ga ni sa wawale okoya, ia sa rere ga me moce lutu tale. Vakacava ke yacovi koya tale e dua na tadraca?

E a davo vakatadraicake o Prodi ka raica cake tu na dokanivale. E a tovolea okoya me vakananuma e so na vakanananu ni marau. “Tamaqu mai Lagi, ni rogoci au? Mo ni rogoca nodra masu na gone?” E a yacovi Prodi mai e dua na ua ni veivakacegui ni vakasamataka okoya na qaqa ni nona sere ni Lalai taleitaki. E a vakatavulica vei ira o Sister Kioska ni Tamada Vakalomalagi e dau wanonovi ira e veigauna kece. E rawa ni ra masu Vua ena dua ga na gauna, ena vanua cava ga.

E a kila o Prodi na veika me cakava. E a siro mai ena imocemoce ka tekiduru me masu.

“Tamai Keimami Vakalomalagi,” a masu okoya, “au sa rere vakaidina sara. Yalovinaka ni taqomaka na noqu matavuvale. Ka mo ni vukei au me’u moce ka me kua ni’u tatadra ca tale.”

E a tinia nona masu o Prodi ka lade tale ki na imocemoce. A malumu na yagona, ka vakila na vakacegu ki na lomana. Sega ni dede sa moce lutu okoya.

Ni kida na mataka, a yadra cake o Prodi ki na katakata ni siga ni cila curuma na katubaleka. E a rogoca rawa okoya na tamela ni kuro e valenikuro ka mata cake me lai raici Nana. E a kana tavioka bulase tiko o Célia ena teveli. E a vakatakata‑taka tiko eso o Nana me kana talega okoya.

“Yadra,” a kaya o Nana. “Vakacava nomu moce?”

“E a yacovi au e dua na tadraca rerevaki sara,” a kaya o Prodi. “Ia au a qai cabora e dua na masu. E a vukei au me’u yalo vakacegu na Tamada Vakalomalagi.”

“Sa ca sara ni yacovi iko e dua na tadraca,” a kaya o Nana. E a mokoti Prodi voleka okoya ka sega ni laivi koya me dua na gauna balavu. “Ia au sa marau ga ni o a cabora e dua na masu. E vaka ni a vukei iko dina na Tamada Vakalomalagi.”

“E a cakava dina oKoya,” a kaya o Prodi. “Au a rawa ni moce lutu tale, ka sega ni qai yacovi au tale na tatadra ca.” A mokoti Nana matua o Prodi. E a marau okoya me kila ni veitalia na rere a vakila okoya, sa dau voleka sara na Tamada Vakalomalagi ena veivakananumi ni masu.