Na Vatu iVakadei ni Noda Vakabauta

Ena veivaletabu yadua e dau vakayacori na kena soqo ni vakasobuduru e salavata ki na kena ivakarau tudei vakatekivu sara mai na gauna makawa. Ni bera ni kena mai vakayagataki raraba na simede, sa dau biu na vatu lelevu me yavu ni lalaga ni vale. Ena dau keli e dua na qara, ka biu yani na vatu me kena yavu e ra. Sa na tekivu ena dua na tutuna, me tuvai yani na lalaga ni kena yavu ena dua na yasana me yacova na vatu ivakadei; tarava sara me mua na tutuna ka tuvai tale na lalaga ki na tutuna e tarava; ka biu tale kina e dua na vatu, me tuvai tale na lalaga ki na tutuna e tarava, me laki yaco tale ki na kena itekivu. … Na iotioti ni vatu sa dau vakatokai tu me vatu ivakadei, ni gauna e vakatikori kina sa na yaco kina e dua na veivakamarautaki levu. Ni sa toka donu na vatu ivakadei oqo, sa tu vakarau na yavu me sa tara kina na valececere. Oqo na vosa vakatautauvata nei Paula ni vakamacalataka tiko na Lotu dina:

“O koya oqo dou sa qai sega tiko ni vulagi kina se kai tani, dou sa koro vata ga kei ira era sa lotu, ka dou sa lewe ni vale ni Kalou;

“Ka dou sa tara cake ena nodra yavu na iapositolo kei na parofita, ia sai koya ko Jisu Karisito sa kena vakadei ena tutu ni vale;

“O koya sa sema vata kina na vale taucoko a sa tubu cake kina me valetabu ni sa tu vata kei na Turaga” (Efeso 2:19–21).

Sa tu vei keda na veivatu ivakadei taumada sa mai tauyavutaka ka tara kina na Turaga na Lotu cecere edaidai oqo, mera sa “sema vata kina.” Era sa ka bibi sara vakaidina ki na cakacaka oqo, na yavu sara ga, sa mai kena inuinui me tu kina. … [Ia] au vakamacalataka tiko na vatu ivakadei, eda sa mai kila ka doka sai koya na Turaga o Jisu Karisito. …

Sai Koya na vatu ivakadei ni Lotu sa mai vakayacani Vua, o ya na Lotu i Jisu Karisito ni Yalododonu Edaidai. Sa sega tale ni dua na yaca sa soli vei keda na tamata me rawa ni da bula kina (raica na Cakacaka 4:12). Sai koya sa vakatekivuna na noda vakabulai, sa solia na bula tawamudu (raica na Iperiu 5:9). Sa sega e dua me tautauvata kei Koya. A sega mada ni se bau dua. Ena sega vakadua me dua tale. Me vakavinavinakataki na Kalou ena vuku ni isolisoli ni Luvena Lomani, a solia na Nona bula me da bula rawa kina, ka sa ikoya na vatu itutu dei duadua ga ni noda vakabauta vakakina na Nona Lotu.”