Na Bolebole ni Valetabu
Mai vei Sister Joy D. Jones
Peresitedi Raraba ni Lalai
“Ka na gole na lomadra na gone vei ira na nodra qase” (Vunau kei na Veiyalayalati 2:2).
Ena dua na Sigatabu keitou a tiko kei rau na noqu daunivakasala ena dua na soqoni ni Lotu. Keitou a vunautaka me baleta na valetabu kei na veika duatani e yaco kina. Ni oti na soqoni, a lako mai vei au e dua na gonetagane yabaki 12 a yacana o Colby ka keirau lululu. Keirau a veitalanoa me baleta na valetabu. Au a qai bolei koya me vakaraica e dua na yaca ni matavuvale me kauta i valetabu.
Ena dua na gauna lekaleka emuri, au a taura e dua na ivola mai vei Colby. Oqo na ka a tukuna vei au o Colby:
“Au a lako i vale ka kunea e dua na yaca vou. A yaco ni’u a kunea rawa na tukaqu-vakatolu!
“Oti oya au a lako ki na valetabu ka’u a papitaisotaki ena vukuna. E a duatani sara baleta ni a papitaisotaki au o tuakaqu ka vakadeitaki au o tamaqu ena vukuna.
“Au a vakila ni vaka e raragi na lomaqu ka kauta mai na vakacegu. Au vakila ni ka au a cakava me baleti tukaqu e vinaka dina baleta qo sa na rawa ni lako o koya ki na matanitu selesitieli me bula vata kei na nona matavuvale. Ena vo ni siga taucoko oya, Au vakila na yalo vinaka ni lomaqu.
“Au a raica talega ni sega ni dua e kilai rau na itubutubu nei tukaqu-vakatolu, ia au sa na rawa ni vakaraica na yacadrau ka kauta talega ki na valetabu!”
Sa dua dina na ivakaraitaki vinaka o Colby! Se vakacava na nomu yabaki,e rawa mo ivakaraitaki ki na nomu matavuvale kei na itokani. Sa rawa mo wasea na kosipeli vei ira kecega o kila—o ira sara mada ga na nomu qase eliu!