Domodra na Yalododonu Edaidai
Tuberi Vei Monica
Rosana Soares
Utah, Amerika
Droini mai vei Stan Fellows
Niu vakaitikotiko voli mai São Paulo, Brazil, keirau a veikilai kei na dua na marama taleitaki na yacana o Graça. Qo e dua na marama dauloloma ka yaloyalo vinaka ka itokani ni tamata kecega.
O Graça na noqu itokani ni veisiko. O koya e tinadratou e lewe tolu na gone, cakacaka vagauna, ka sega nona motoka se talevoni, ia e sega ni tarova nona veiqaravi na veika oqo.
Mai na noqu varada, au rawa ni raica ga e dua na katubaleka ni nona vale. Ena gauna e galala kina, ena dau biuta o Graça e dua na tikinisulu damudamu ena katubaleka oya me sikinalataka ni sa vakarau tu me laki veisiko. E sega vakadua ni dau kunea e dua na iulubale me sega kina ni veisiko. Au dau vakasamataka vakalevu na sikinala nei Graça kei na nona ivakaraitaki uasivi ni veiqaravi yalodina ka rawarawa.
E dua na ka e matata tu ena noqu vakasama. Keirau a vakavakarau ka masu ni se bera ni keirau laki sikova e dua na taci keirau. Ni keirau volekata yani nona vale, keirau qai kila ni keirau a lako ki na nona vale e duatani na marama! Keirau a lesi me keirau sikova na marama oqo, na tinadrau e rua na gonelalai ka luluqa tu vakalotu, ia keirau a sega ni nakita me keirau sikovi koya ena siga oya. Ni keirau sa tu e kea, keirau a tukituki, ka sega ni dua e dola mai.
Keirau mani lewa me keirau wawa vakalailai. A mani qai lako mai na marama oya, o Monica, ka tukuna vei keirau ni osooso. Keirau raica rawa ni oca ka voleka sara tu ni tagi. Ni keirau tukuna ni keirau mai veivuke, a vakatara me keirau curu yani. A tagitagi tiko na luvena lailai, keirau mani kaya vua me qarava mada na gonelailai ni keirau wawa tiko. Ni lako cake o Monica kei na gone lailai, keirau sa tekivu cakacaka, keirau samaka e vica na rumu ka lobika na isulu kecega keirau rawa ni raica.
Ni raica o Monica na rairai vinaka ni nona vale, sa tekivu me tagi, dolava vei keirau na yalona, ka wasea eso na nona bolebole. Keirau yalataka ni keirau na veivuke, ka keirau laki tukutuku vua na peresitedi ni iSoqosoqo ni Veivukei me baleta na veika e bolei tu kina. Ena Sigatabu ka tarava, sa mai lotu o Monica.
Sa yaco o Monica me dua na marama mamarau ka bulabula vakalotu, ka keirau tomana na neirau veiqaravi vua ena loloma kei na veikauwaitaki. Se tiko ga na veibolebole oqori, ia sa rawa vua me sotavi ira ena vakabauta kei na yaloqaqa ena vuku ni nona sa bulabula tu ena Lotu.
Au vakavinavinakata na ivakaraitaki nei Graça ni keirau veiqaravi vata. Keirau a masuta me keirau tuberi, ka kauti keirau na Kalou vei Monica.