Ko ha Fakaʻohovale Faka-Kilisimasi
ʻOku nofo ʻa e tokotaha naʻá ne faʻú ʻi Kololato, USA.
“Ke ke maʻu ha Kilisimasi fiefia! … ʻĀkilotoa ʻaki koe e ʻofá” (Children’s Songbook, 51).
Ne loto-mamahi ʻa ʻAná ʻi heʻene hū atu ki he lokí ʻo mamata ki he fuʻu ʻakau Kilisimasí. Ne pā ʻa e mīsini fakamāfana vai ʻi honau falé, pea naʻe tāfea e vaí he falikí. Naʻe kei feinga e Tangataʻeikí ke holo mātuʻu e vaí. Naʻe pīponu ha ʻū meʻaʻofa ʻi he lalo ʻakaú.
Naʻe toʻo ʻe ʻAna mo hono ongo tuongaʻane īkí ha ʻū taueli pea feinga ke holo mātuʻu e ʻū meʻaʻofá. Ka naʻe ʻikai ke fuʻu ʻaonga ia. Ne ʻosi palapala ia.
Naʻe lolotonga foua ʻe he fāmili ʻo ʻAná ha taimi faingataʻa. Naʻe ʻikai ha ngāue maʻuʻanga paʻanga ʻa ʻene tamaí. Naʻe teu ke fāʻeleʻi mai ʻe heʻene fineʻeikí ha pēpē, pea naʻe lahi ʻene faʻa puké. Pea ko ʻeni, he ʻikai ke nau maʻu ha ʻū meʻaʻofa ki he Kilisimasí.
ʻI he teuteu ʻa ʻAna ke mohe ʻi he pō ko iá, naʻá ne fanongo ki he talanoa ʻa ʻene ongomātuʻá ʻi he peitó.
“Ko e hā e meʻa te ta faí?” Ko e fehuʻi ange ia ʻa e Fineʻeikí. Naʻe ongo ʻo hangē ʻokú ne tangí. “ʻOku ʻikai haʻata paʻanga feʻunga ke totongi ʻaki e falé, pea ko ʻeni ʻoku ʻikai ke toe ʻi ai haʻata ʻū meʻaʻofa maʻá e fānaú.” Naʻe ongoʻi manavahē mo tailiili ʻa ʻAna.
Naʻe pehē ange ʻe he Tangataʻeikí, “Te ta toki fakakaukauʻi pē ha meʻa.”
Ne lue atu ʻa ʻAna ki peito. Ne kakapa atu ʻa e Fineʻeikí ʻo fāʻofua kiate ia. ʻI he fāʻofua ʻa ʻAna ki he kete ʻa e Fineʻeikí, naʻá ne ongoʻi ʻoku ngaue e pēpeé. Naʻá ne malimali. “ʻOku mei haʻu ʻetau pēpē foʻoú. ʻOkú ke faʻa talamai maʻu pē ko e pēpeé ko ha mana ia.”
Ne malimali atu e Fineʻeikí. “ʻOku tonu ia. ʻOku lahi e ngaahi meʻa ke tau houngaʻia ai.”
Ne pehē atu e Tangataʻeikí, “ʻOku tau ʻi heni kotoa pē.” Naʻá ne ʻuma ki he ʻulu ʻo ʻAná. “ʻE sai pē ia.”
ʻI he foki ʻa ʻAna ki hono lokí, naʻá ne fanongo atu ʻoku fetāngihi ʻa hono ongo tuongaʻané. Naʻá ne tangutu hifo ʻi he mohenga ʻo Tēvitá.
Ne pehē ange leʻo siʻi ʻe Tēvita, “ʻOku loto-mamahi e tokotaha kotoa.”
Naʻe mihimihi pē ʻa Lopi mo pehē ange, “Pea he ʻikai ke toe ʻi ai haʻatau meʻaofa.”
Ne toe pehē atu pē ʻa ʻAna, “ʻE sai pē ia. Te ke toki ʻiloʻi pē.”
Kimuʻa pea tokoto ʻa ʻAna ki hono mohengá, naʻá ne tūʻulutui ʻo kole ki he Tamai Hēvaní pe ko e hā ha meʻa te ne lava ʻo fai maʻa hono fāmilí. Naʻe ʻikai ke ʻi ai haʻane paʻanga ke fakatau mai ʻaki ha ʻū meʻaʻofa, ka naʻá ne kei ongoʻi pē ha ongo māfana mo fiemālie ʻi hono lotó.
ʻI he pongipongi haké, naʻá ne tokoto pē ʻi hono mohengá ʻo fakakaukau ʻi ha ngaahi miniti siʻi kimuʻa peá ne teuteu ki he akó. Naʻe haʻu ha foʻi fakakaukau kiate ia! Naʻá ne fakavave atu ki ʻapi ʻi he hoʻatā ko iá ʻo fai ʻene ngaahi ngāue fakaʻapí mo e ngāue fakaakó. Naʻá ne maʻu ha ʻū pepa mo e afo mo ha ʻū peni fakaʻilonga mo e ʻū sitika naʻá ne maʻu ʻi hono faiʻahó. Naʻá ne fetuku kotoa ia ki hono lokí pea tāpuni e matapaá.
Naʻe mei kata ʻa ʻAna ʻi he taimi naʻá ne fakakaukau ai ki ha ʻohovale hono fāmilí. Naʻá ne ʻuluaki peluki e laʻipepá pea haʻihaʻi fakataha ʻaki e afó ke faʻu ha fanga kiʻi tohitufa ʻe fā. Naʻá ne fili ha foʻi sitika fetuʻu ke fakapipiki ʻi he kiʻi tohitufa ʻa e Fineʻeikí pea mo ha foʻi palanite maʻá e Tangataʻeikí. Naʻá ne ʻai ha kiʻi kulī ʻi he tohitufa ʻa Tēvitá pea mo ha foʻi lōketi maʻa Lopi.
Ne kamata leva ʻa e tā fakatātā ʻa ʻAná. Naʻá ne tā ha fakatātā ʻo ʻene Fineʻeikí ʻokú ne tafi ʻa e falikí. Naʻá ne tā ha fakatātā ʻoʻona ʻoku fai ʻene feimeʻatokoni mo e Tangataʻeikí, mo ha fakatātā ʻe taha ʻokú ne vaʻinga soka mo Tēvita, mo hano fakatātā ʻokú na laukonga mo Lopi. Naʻe ʻaho lahi ʻene feinga ke fakafonu e tohitufa takitaha ʻaki ha ʻū fakatātā.
Ne faifai pea aʻu ki he efiafi kimuʻa ʻi he Kilisimasí, pea tuku fakalelei ʻe ʻAna ʻa e ʻū tohitufá ʻi he lalo ʻakaú.
ʻI he pongipongi hono hokó, naʻá ne foaki ki he tokotaha takitaha ʻi hono fāmilí ha kiʻi tohitufa. Naʻe pehē ange ʻe Tēvita, “ʻOku ou saiʻia ʻi he ʻū fakatātā ko ʻení. ʻOku ou saiʻia he ʻakapulú.”
Naʻe pehē ange fiefia ʻe ʻAna, “ʻOku ʻikai ko ha fakatātā ʻataʻatā pē ia. Ko ha ʻū kūponi ia! ʻOku fakahaaʻi atu ʻe he ʻū fakatātaá ʻa e meʻa kotoa te u fai maʻaú.”
Naʻe pehē ange ʻe he Fineʻeikí ʻi heʻene huke hake ʻa e kiʻi tohitufá, “Ko e meʻaʻofa lelei taha ʻeni kuó ke foaki mai maʻamautolú.” Naʻe houngaʻia ʻa ʻAna ʻi he tokoni ʻa e Tamai Hēvaní ke ne fakakaukau ki hono ngaohi ʻo e ʻū kūponi ki he Kilisimasí. Ne ʻamanaki ke ʻi ai ha pēpē foʻou, pea ʻi he tokoni ʻa e Tamai Hēvaní, ʻe lelei e meʻa kotoa pē.