Meʻaʻofa Kilisimasí pe Vahehongofulú?
ʻOku ou tui ki hono moʻoni ʻo e ongoongoleleí, ka te u lava nai ʻo totongi vahehongofulu?
Tā fakatātā ʻa Allen Garns
Naʻá ku fekumi ki ha siasi pea toki fakafeʻiloaki mai ʻe he kau faifekaú kiate au ʻa e Siasi ʻo Sīsū Kalaisi ʻo e Kau Māoniʻoni ʻi he Ngaahi ʻAho Kimui Ní. Naʻe papitaiso pea hilifakinima au ʻi he hili ha māhina ʻe taha mo e konga. Ko e taha ʻo e ngaahi meʻa ne akoʻi mai ʻe he ongo faifekaú, ko e tefitoʻi moʻoni ʻo e vahehongofulú.
Naʻá na talamai kiate au, “Te ke maʻu ha ngaahi tāpuaki kapau te ke totongi vahehongofulu.”
Ko ha mātuʻa taautaha au ʻi he taimi ko iá. Naʻe ʻikai haʻaku paʻanga feʻunga ke fakatau mai ʻaki ha meʻakai mo totongi ʻeku ʻū moʻuá. Naʻe faʻa hoko ia ko ha meʻa ke [fili] pe ʻe totongi e vahehongofulú pe fakatau mai ha meʻakai, totongi ʻeku ngaahi moʻua ʻuhilá pe totongi ʻeku meʻalelé.
Ne laui taʻu lahi ʻeku foua ha ngaahi tuʻunga kehekehe ʻo e feinga ke totongi vahehongofulú. Ne faifai peá u pehē, “Kapau ʻokú ke tui ʻoku moʻoni ʻa e ongoongoleleí, ta ʻoku fie maʻu ke ke fakahoko ia. Ko hoʻo lava pē ʻo fakahoko iá, ʻe lava ʻe he ʻOtuá ʻo tāpuekina koe.”
Naʻe $500 hoku moʻua vahehongofulú, ka naʻe toe fie maʻu foki ke totongi mo ha ngaahi moʻua naʻe $503. Naʻe ʻikai ke u ʻiloʻi pē ʻe anga fēfē, ka naʻá ku pehē, “Te u feinga pē.” Naʻá ku totongi ʻeku vahehongofulú. Naʻe ʻikai ʻilo ia ʻe ha taha naʻá ku fie maʻu ha $503, ka naʻe ʻi ai ha tokotaha naʻá ne meili mai ha taki laʻi $100 ʻe nima kiate au.
Ko ha liliuʻanga ia kiate au. Naʻá ne liliu fakalaumālie au. Naʻá ku ʻiloʻi ʻoku ʻofa ʻa e ʻOtuá ʻiate au, ʻokú Ne tokanga mai kiate au pea ʻokú Ne finangalo ke u lavameʻa. Talu mei he taimi ko iá, kuó u totongi ʻeku vahehongofulú. Ka naʻe ʻikai ke faʻa faingofua maʻu pē.
ʻI ha Kilisimasi ʻe taha ʻi he ngaahi taʻu kuohilí, naʻe manatuʻi ʻe hoku ʻofefine lahí ʻene fanongo ki heʻeku pehē he ʻikai ke u lava ʻo totongi vahehongofulu mo fakatau mai mo ha ʻū meʻaʻofa Kilisimasi maʻana mo hono ngaahi tokouá.
Ne toki talamai ʻe hoku ʻofefiné kiate au kimui ange, “Ne mau ʻiloʻi he ʻikai ke mau maʻu ha meʻa, ka naʻe sai pē ia. Naʻa mau fakakaukau ne mau loto ke ke totongi hoʻo vahehongofulú.”
Hangē pē ko ia naʻe faʻa hokó, ne fakakakato mai ʻe he ʻEikí, pea naʻe ʻikai ke nau taʻe maʻu ha meʻaʻofa Kilisimasi.
Ko ha fuʻu meʻa lahi ia ka lava ʻe ha faʻē taautaha ʻo tokoniʻi ʻene fānaú mo totongi vahehongofulu. Talu mei heʻeku fili ke totongi vahehongofulú, kuo faitāpuekina au. ʻOku ʻikai ke u koloaʻia, ka ʻoku ʻomi maʻu pē ʻe he ʻEikí ha founga maʻaku.
Kuo faitāpuekina au ʻi ha ngaahi founga kehekehe foki. Kuo tokoni e ngaahi tā sīpinga lelei ʻa e kāingalotu ʻo e Siasí mo e fāmilí kiate au mo ʻeku fānaú ke mau kei mālohi ai ʻi he Siasí. Naʻá ku talaange kiate kinautolu, ko e konga kotoa pē ia ʻo e tāpuaki kuo talaʻofa mai ʻe he ʻEikí—ʻe fakaava mai e ngaahi matapā ʻo e langí kiate kitautolu.