Mālō e lelei mei Falanisē!
Salut! Ko Mako mo Paolo kimaua!
ʻOkú ma fononga takai holo he māmaní ke ako fekauʻaki mo e fānau ʻa e ʻOtuá. Kau fakataha mo kimaua ʻi heʻema ʻaʻahi ki Falaniseé!
ʻOku meimei ke ʻi he toko 40,000 ʻa e kāingalotu ʻo e Siasí ʻi Falaniseé! Ne ʻosi ʻa e temipale Pālesi, Falaniseé ʻi Mē 2017.
Ko ha Tohi ʻa Molomona ʻeni ʻi he lea faka-Falaniseé.
Ko e Louvre, ʻi Pālesí ʻa e misiume ʻaati lahi taha ʻi māmaní! ʻOku ʻi ai ha ngaahi ngāue fakaʻaati ʻe 380,000 tupu.
ʻI he fakatonga ʻo Falaniseé, ʻoku teuteu e kakaí ki he Kilisimasí ʻaki hano faʻu ha “crèche,” pe fakatātā ʻo e ʻaloʻí. ʻOku fonu ʻa e feituʻu ko iá ʻi he kakai ʻoku nau tatali ke ʻaloʻi ʻa Sīsū Kalaisi. ʻI he efiafi kimuʻa ʻi he Kilisimasí, ʻoku nau fokotuʻu ha ʻīmisi ʻo e valevale ko Sīsuú ʻi he crèche!
ʻOku manako e fānau Falaniseé ke vaʻinga “escargot.” ʻOkú te puna ʻi ha foʻi fuo takatakai ke aʻu ki he ngataʻangá!
ʻOku ʻiloa ʻa Falaniseé ko hono maá mo e sīsí. ʻOku tokolahi e kakai ʻoku nau fakatau mai e mā foʻoú mei he boulangeries (fale taʻo mā) ʻi he ʻaho kotoa pē.
Feʻiloaki mo ha niʻihi homa ngaahi kaungāmeʻa mei Falaniseé!
ʻOku ou manako ʻi he meʻa kotoa pē fekauʻaki mo e Palaimelí—ʻa e ʻū hivá, kau faiakó, ngaahi ʻekitivitií, mo e ngaahi meʻa ʻoku ou ako fekauʻaki mo Sīsū Kalaisí. ʻOku ou mātuʻaki saiʻia ʻi he taimi ʻoku mau talamonū fiefia ai ki he ʻaho fāʻeleʻi ʻo e fānaú. ʻOku ou vēkeveke maʻu pē ke ʻalu ki he Palaimelí ʻi he uike kotoa pē.
Suli B., taʻu 10, Haute-Kalone, Falanisē
Ko e talanoa ʻoku ou saiʻia taha ai ʻi he Tohi ʻa Molomoná ʻoku fekauʻaki ia mo hono fakamolemoleʻi mo ʻofaʻi ʻe Nīfai ʻa hono ngaahi tokouá. Mālō mo e sīpinga ʻa Nīfaí, ʻoku tokoniʻi lahi au ʻe he konga ko ʻeni ʻo e folofolá ke faingofua ange ʻeku kole fakamolemole ki hoku ngaahi tokouá ʻi he taimi ʻoku mau kē aí pea mo fakamolemoleʻi foki.
ʻEvelini N., taʻu 6, Île-de-France, Falanisē
ʻOkú ke haʻu mei Falanisē? Tohi mai kiate kimaua! Te ma fiefia ke fanongo meiate koe.
Mālō hoʻo fie mamataʻi ʻa Falanisē mo kimauá!