ʻE ʻI ai e Tokotaha ʻe Mole ʻi he Taʻu Kahaʻú
ʻI he efiafi kimuʻa ʻi he Kilisimasí, ne u fakakaukau ki heʻeku ʻofa lahi ʻi homau kiʻi fāmilí. Hili iá ne u ongoʻi ha ongo makehe.
Tā fakatātā ʻe Kendra Binney
Ko e efiafi ʻeni kimuʻa he Kilisimasí. Ne toki maʻu mai pē homau ʻū vala mohe foʻoú, ko ha tukufakaholo ia ʻi homau kiʻi fāmilí. Naʻe tā ʻe he fānaú ha hiva Kilisimasi pea hulohula holo pē e tokotaha kotoa. Naʻe ʻikai ke fakaʻiteʻita ha taha; ne fiefia e taha kotoa, fofonga malimali pea fakalata. ʻI he ʻiloʻi ko ia ʻoku ʻamanaki ke u fanauʻi mai ha kiʻi pēpē ʻe tahá, naʻá ku fakakaukau ai ki he ʻofa lahi ʻoku ou maʻu ki hoku fāmilí mo e vēkeveke naʻá ku maʻu ʻi he teuaki ke talitali ha pēpē foʻoú.
Hili iá ne u ongoʻi ha ongo makehe. Ne fanafana mai e Laumālié kiate au, ʻoku ʻi ai ha taha ʻi homau fāmilí he ʻikai ke mau kau fakataha ʻi he taʻu kahaʻú.
Kimui ange ʻi he pō ko iá, ʻi heʻema fetuku e ʻū meʻaʻofá ki he lalo ʻakaú mo hoku husepāniti ko Timí, naʻá ne talamai kiate au ʻa e ongo naʻá ne maʻu kimuʻa ʻi he efiafi ko iá, ʻe ʻi ai e tokotaha ʻi homau fāmilí ʻe ʻikai ke mau kau fakataha ʻi he efiafi kimuʻa ʻi he Kilisimasi ka hoko maí. Naʻá ku vahevahe ange kia Timi, naʻá ku maʻu ha ongo tatau.
Kimuʻa pea mau mavahe ʻi ha folau hili ʻa e Kilisimasí ke ʻaʻahi ki ha fāmili ʻi ha siteiti ʻe taha, ne talanoa ʻa Timi ki heʻema fānaú fekauʻaki mo ʻenau nofo malu lolotonga ʻemau folaú. Naʻá ma faingataʻaʻia ʻi he fakakaukau ʻe ʻi ai ha taha ʻi he fāmilí ʻe mole lolotonga ʻemau folaú, ka naʻá ma ongoʻi ʻe lelei pē e meʻa kotoa. Ne mau folau, feohi fiefia mo e fāmilí, pea ne mau foki malu mai ki ʻapi.
Ne ʻikai fuoloa mei ai kuo taimi ke fai ʻeku sivi feitamá. Naʻe fakahoko mai ʻe he toketaá ha ongoongo fakamamahi. Ne fakapapauʻi ʻe ha fakaʻata kuo mālōlō e pēpeé ʻi ha uike ʻe ua kimuʻa pea mau folaú.
ʻI heʻema foki loto-mamahi mo Timí ki ʻapí, naʻá ma fakatokangaʻi ko e uike ʻe ua kimuʻá ko e efiafi ia kimuʻa he Kilisimasí. ʻOku ʻikai ke tau ʻilo fakapapau e taimi ʻoku hū ai e laumālié ki he sinó, ka naʻá ku ongoʻi mo Timi ne kau fakataha ʻema kiʻi pēpeé mo homau fāmilí ʻi he efiafi ko ia kimuʻa he Kilisimasí, neongo kapau ne lau momeniti pē, ʻo hulohula fiefia takai holo mo e taha kotoa. Naʻá ma ongoʻi ha fiefia lahi, pea ne ma ongoʻi naʻe kau mai mo e pēpeé ki ai. ʻI he taimi naʻá ne mavahe ai meiate kimautolu, ʻoku mau tui naʻá ne hoko ko e mēmipa homau fāmilí he ʻikai ke mau kau fakataha ʻi he efiafi kimuʻa he Kilisimasi ka hoko maí. ʻOku ou tui ʻe ʻi ai e ʻaho te mau toe femātaaki ai mo ʻemau kiʻi pēpeé. ʻOku ou houngaʻia ʻi he nonga ʻoku ou maʻu mei aí.