Haʻu, ʻo Muimui ʻIate Au: Tohi ʻa Molomoná
Te u lava fēfē ʻo fekumi ki ha ngaahi meʻa-foaki fakalaumālie?
(14–20 Tīsema)
ʻOku foaki mai ʻe he ʻOtuá ʻa e ngaahi meʻa-foaki fakalaumālié ʻo fakafou ʻi he Laumālie Māʻoniʻoní ke ʻaonga maʻatautolu (vakai, Molonai 10:8). Kuo tāpuekina ʻaki kitautolu ha ngaahi meʻafoaki fakalaumālie mei he ʻOtuá, pea ʻoku lahi ha ngaahi meʻafoaki te tau lava ʻo maʻu.
ʻOku ʻi ai ha ngaahi meʻa-foaki fakalaumālie ʻe niʻihi ʻoku hā ʻi he ngaahi folofolá (vakai, Molonai 10:9–16; Tokāteline mo e Ngaahi Fuakava 46:13–25); ka ʻoku ʻi ai e niʻihi ʻoku ʻikai hā ai. ʻE lava fēfē ke ke ʻiloʻi mo fakatupulaki e ngaahi meʻa-foaki fakalaumālie kuo foaki atu ʻe he ʻOtuá? ʻE lava fēfē ke ke fakatupulaki e ngaahi ngaahi meʻa-foaki kehé? Ko ha ngaahi fakakaukau ʻeni ke tokoni atu:
Kole
Lotu ʻo kole ki he ʻOtuá pe ko e hā e ngaahi meʻafoaki fakalaumālie kuó Ne tāpuekina ʻaki koé pe ko e ngaahi meʻafoaki fē te ke feinga ki aí. Te Ne tokoniʻi koe. ʻE lava ke tokoni atu foki ho tāpuaki fakapēteliaké ke ke ʻilo hoʻo ngaahi meʻafoaki fakalaumālié. Kapau ʻoku teʻeki ke ke maʻu ho tāpuaki fakapēteliaké, fakakaukau leva ke talanoa ki hoʻo pīsopé pe palesiteni fakakoló ki hono maʻu iá.
Ako
ʻOku fie maʻu e ngāué kae lava ke maʻu e ngaahi meʻafoaki fakalaumālié. Lolotonga hoʻo feinga ki ha meʻaʻofa paú, fakakaukau ke ako lahi ange ki ai mei he ngaahi folofolá, ko hoʻo tāpuaki fakapēteliaké, pe ngaahi lea ʻi he konifelenisi lahí. Te ke lava foki ʻo ʻekeʻeke ki he niʻihi kehé kau ki heʻenau ngaahi ʻausiá.
Ngāue
ʻOku tokoni hono ako e ngaahi meʻa-foaki fakalaumālié, ka ʻoku fie maʻu ke ke fakaʻaongaʻi e ʻilo ko iá. ʻI he taimi ʻokú ke ngāue ʻaki ai e tui kia Sīsū Kalaisí, fakatomala, pea tauhi hoʻo ngaahi fuakavá, ʻokú ke feʻunga leva ke maʻu e ngaahi meʻa-foaki fakalaumālié. Fekumi foki ki ha ngaahi tūkunga te ke lava ʻo fakaʻaongaʻi ai hoʻo ngaahi meʻa-foaki fakalaumālié. Manatuʻi, he ʻikai ngata pē ʻi he ʻaonga ʻa e ngaahi meʻa-foaki ko ʻení kiate koé, ka ʻe toe ʻaonga foki ia ki he niʻihi kehé (vakai, Tokāteline mo e Ngaahi Fuakava 46:26). Te ke fakaʻaongaʻi fēfē hoʻo ngaahi meʻa-foaki ke tokoniʻi e niʻihi kehé?