Haohaoa ʻia Kalaisi

ʻOku haʻu e maama mo e moʻui fakalaumālié ʻi he toutou tokangaʻi ʻo e ngaahi meʻa fakalotu ʻokú ne ʻomi ke tau ofi ange ki heʻetau Tamai Hēvaní mo hotau Fakamoʻui ko Sīsū Kalaisí. ʻOku tau maʻu e ngaahi talí, tuí, mo e mālohi ke fehangahangai mo e ngaahi faingataʻa mo e faingamālie fakaʻahó ʻi he faʻa kātaki, fakakaukau foʻou, mo e fiefia ʻaki e talangofua fakaʻahó.

ʻI heʻetau fekumi ki ha ngaahi founga foʻou mo māʻoniʻoni ange ke ʻofa ki he ʻOtuá mo tokoniʻi kitautolu mo e niʻihi kehé ke teuteu ke feʻiloaki mo Iá, ʻoku tau manatuʻi ko e haohaoá ʻoku ʻia Kalaisi, kae ʻikai ʻiate kitautolu pe ko e fie haohaoa ʻa māmaní.

ʻOku fonu e ngaahi fakaafe ʻa e ʻOtuá ʻi he ʻofa mo e faʻa malava koeʻuhí he ko Sīsū Kalaisi “ko e halá, mo e moʻoní, pea mo e moʻuí” (Sione 14:6). Kiate kinautolu ʻoku nau ongoʻi mafasiá, ʻokú Ne fakaafeʻi, “Ha‘u kiate au,” pea kiate kinautolu ʻoku haʻu kiate Iá, ʻokú Ne talaʻofa, “Te u foaki ʻa e fiemālié kiate kimoutolu” (Mātiu 11:28). “Haʻu kia Kalaisi, pea hoko ʻo haohaoa ʻiate ia, … ʻofa ki he ʻOtuá ʻaki homou iví, ʻatamaí, mo e mālohí kotoa pē, pea ʻe toki feʻunga ʻa ʻene ʻaloʻofá kiate kimoutolu, koeʻuhí ke tupu ʻi heʻene ʻaloʻofá ʻa hoʻomou haohaoa ʻia Kalaisí” (Molonai 10:32).

ʻOku ʻi he fakapapau foki ko ʻení, “ke tupu ʻi heʻene ʻaloʻofá ʻa hoʻomou haohaoa ʻia Kalaisí” ʻa e nongá, melinó, mo e talaʻofa te tau lava ʻo hokohoko atu ʻi he tui mo e loto-falala ki he ʻEikí ʻo aʻu ki he taimi ʻoku ʻikai hoko ai ʻetau ngaahi ʻamanakí, fakaʻānauá, pe mahalo mo e meʻa ʻoku totonu ke tau maʻú, neongo ʻoku ʻikai ko hotau foʻui, pea naʻa mo e hili ʻetau fai hotau lelei tahá.

ʻI ha ngaahi taimi mo e founga kehekehe, ʻoku tau ongoʻi kotoa ʻoku tau taʻefeʻunga, taʻepauʻia, mo taʻetaau nai. Ka ʻi heʻetau ngaahi ngāue faivelenga ke ʻofa ki he ʻOtuá mo ngāue fakaetauhi ki hotau kaungāʻapí, te tau lava ai ʻo ongoʻi e ʻofa ʻa e ʻOtuá mo e ueʻi fakalaumālie ʻoku fie maʻu ki heʻenau moʻuí mo ʻetau moʻuí.

ʻOku fakalotolahiʻi kitautolu ʻe he Fakamoʻuí mo talaʻofa mai te tau lava ʻo “vivili atu ki muʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa, mo ha ʻofa ki he ʻOtuá mo e kakai fulipē” (2 Nīfai 31:20). ʻE lava ʻe he tokāteline ʻo Kalaisí, Fakalelei ʻa hotau Fakamoʻuí, mo ʻetau muimui ʻaki e kotoa ʻo hotau lotó ki Heʻene hala ʻo e fuakavá, ʻo tokoniʻi kitautolu ke ʻiloʻi ʻEne moʻoní mo fakatauʻatāinaʻi kitautolu (vakai, Sione 8:32).

ʻOku ou fakamoʻoni ki Heʻene hala ʻo e fuakavá ʻoku tataki atu ki he meʻaʻofa maʻongoʻonga taha kuo talaʻofa mai ʻe heʻetau Tamai Hēvani ʻofá: “Te mou maʻu ʻa e moʻui taʻengatá” (2 Nīfai 31:20).