Ko e Mālohi ʻo e Lotú ʻi he Fale Fakapōpulá
Te u manatuʻi maʻu pē ʻa e efiafi ko ʻeni kimuʻa ʻi he Kilisimasí.
Tā fakatātā ʻa Phil Art
Naʻá ku ngāue pōpula ʻi ha taʻu ʻe fā mo e konga ko e kākā ʻi he fakatau ʻapí. Ko e tokolahi taha ʻo e kakai fefine ne ʻi aí, naʻa nau anga fakalongolongo mo fakaʻapaʻapa. Ne toki hiki ange ha kau fafine ʻe toko 10 ki he loki pilīsone ne hanga mai ki hoku lokí.
Naʻa nau faʻa ʻā fuoloa ʻo aʻu ki he valengapoó ʻo kakata mo fanongo hiva longoaʻa. Naʻe ʻikai ke nau tokanga kinautolu ki hono uesia heʻenau tōʻongá ʻa e niʻihi kehé. Ne kole mai ʻe hoku ngaahi kaungā lokí ke u talanoa kiate kinautolu, ka ko e ngaahi fepōtalanoaʻaki pehení ne ʻikai ke faʻa ola lelei ia ʻi pilīsone. Ko ia ai naʻá ku lotua e houʻeiki fafine ko ʻení ke liliu ʻenau tōʻongá pea ke toe maʻu e nongá, ka naʻe fakaʻau ke toe kovi ange ia.
Lolotonga ʻeku lotu ʻi ha pō ʻe taha, ne u fakatokangaʻi ne teʻeki ke u feinga au ke maheni mo hoku ngaahi kaungāʻapí. Naʻá ku ʻalu ki honau lokí ʻi he ʻaho hono hokó ʻo talanoa mo kinautolu. Naʻa nau fakaʻaliʻali mai ha ʻū tā honau ngaahi fāmilí mo honau ngaahi ʻofaʻangá. Ne nau kole fakamolemole mai ʻi heʻenau fuʻu longoaʻá. Talu mei ai, mo ʻenau fofonga fiefia mo taʻataʻalo mai ʻi he taimi ʻoku nau sio mai ai kiate aú.
ʻI ha ngaahi uike siʻi kimuʻa he Kilisimasí, ne nau fakaafeʻi au ke mau maʻu meʻatokoni efiafi fakataha ʻi he efiafi kimuʻa he Kilisimasí. Naʻa mau palani foki ke fevahevaheʻaki ha ngaahi aʻusia fakalaumālie ne mau maʻu. ʻI he efiafi kimuʻa he Kilisimasí, ne mau fakatahataha mai ʻo tautau ha fanga kiʻi pepa teuteu. Naʻe ʻikai ke ʻi ai haʻamau fuʻu ʻakau Kilisimasi, ka ne mau ongoʻi ha laumālie ʻo e nongá. Hili ʻemau maʻu meʻatokoni efiafi ko e ika tuna mo e pateta fakapakú, ne mau fevahevaheʻaki leva ʻemau ngaahi ʻausiá. Ne mau haʻu kotoa pē mei ha ngaahi tui fakalotu kehekehe pea naʻe makehe ʻemau ngaahi talanoá takitaha, ka naʻe fehokotaki homau ngaahi lotó pea ne ʻi ai foki mo e Laumālié.
Ne vahevahe mai ʻe ʻEpeleli kiate kimautolu, ne malōlō ʻene faʻeé koeʻuhí koe fuʻu tōtuʻa e faitoʻo konatapú ʻi he kei taʻu 14 ʻa ʻEpelelí. Naʻe nofo pē ʻa ʻEpeleli ʻi he veʻehalá pea naʻe ʻi ai mo haʻane kiʻi pēpē ʻi hono taʻu 15, ʻa ia naʻá ne ʻave ke pusiakiʻi. Naʻá ne fefaʻuhi mo e maʻunimā ia ʻe he faitoʻo konatapú, kamata ke fefakatauʻaki e faitoʻo konatapú, pea aʻu pē ʻo ʻave ia ki he fale fakapōpulá.
Naʻe pehē ʻe ʻEpeleli, “Naʻá ku fifili ʻi ha ʻaho ʻe taha pe ko e hā koā e ʻuhinga ʻoku ou kei moʻui aí. He ʻikai hano fuʻu faikehekehe ʻo kapau te u mate. Naʻe ʻikai ʻilo ʻe ha taha naʻá ku ʻi he fale fakapōpulá. He ʻikai teitei fakatokangaʻi ʻe ha taha ia kuó u mate.” Naʻá ne lotua leva ʻo ʻeke ki he ʻOtuá pe ʻokú Ne ʻafioʻi ia.
ʻI he uike hono hokó, ne mono ange ʻe he tokotaha faifaleʻi ʻa e pilīsoné ha tohi mei he kiʻi taʻahine naʻá ne ʻave ke pusiakiʻí.
Naʻe pehē ange ʻe he tokotaha faifaleʻí, “Pau pē ʻoku tokangaʻi koe ʻe he ʻOtuá.”
Naʻe pehē ʻe ʻEpeleli, “ʻOku ou lolotonga fetohiʻaki mo hoku ʻofefiné, pea naʻá ne ʻosi ʻaʻahi tuʻo taha mai kiate au. ʻOku ʻikai lahi ʻeku ʻilo ki he tui fakalotú, ka ʻoku ou ʻiloʻi ʻoku tokanga mai e ʻOtuá kiate au koeʻuhí naʻá Ne tali ʻeku lotú.”
Hili e vahevahe ʻe ʻEpeleli ʻene talanoá, naʻa mau tangutu fakalongolongo kotoa pē mo loʻimataʻia.
Naʻá ku fakahaaʻi hoku loto moʻoní ʻi he lotu ʻo kole ki heʻetau Tamai ʻi he Langí ke Ne tokaimaʻananga mo maluʻi hoku fāmilí lolotonga ʻeku ʻi he fale fakapōpulá. Ka ʻi he taimi naʻá ku lotua ai hoku ngaahi kaungāʻapi ʻi he fale fakapōpulá, naʻe kamata ke u fakatokangaʻi honau ivi malava fakalangí peá u ongoʻi kakato ange ʻa e ʻofa mo e ʻaloʻofa ʻa hotau Fakamoʻuí.
Naʻe fakaʻofoʻofa ʻa e efiafi ko ia kimuʻa ʻi he Kilisimasí ʻi he fale fakapōpulá.