Ko e Fuʻu ʻAkau Haohaoá
“Sīsū ē Ne ʻAloʻi, mai ʻi he maʻulaló, ka kuo hoko ʻeni ʻo maʻu hono ʻafioʻanga fakaʻeiʻeikí” (Ngaahi Himí, fika 107).
“Mama, sio mai ki heni!” Ne tuhu ʻa Sōsiua ki he fuʻu ʻakau Kilisimasí. Naʻe lōloa mo pakau pea ʻi ai mo hono fanga kiʻi talatala lanu mata fakaʻofoʻofa.
Ne kiʻi tuʻu ʻa Mama ʻo sio ki he totongí. Naʻe kalokalo ange hono ʻulú. “ʻIkai, he ʻikai ke lava ia.”
Ne māpuhoi ʻa Sōsiua mo lue pē. Naʻe tokolahi ʻa e māketí ʻi he ngaahi fakatauʻanga meʻakaí mo e ngaahi fuʻu ʻakau Kilisimasí. Naʻe fonu he ngaahi fāmilí ko e fakatau mai ʻenau fanga fuʻu ʻakau mo e ʻū meʻa ke ngaohi ʻaki e fanga kiʻi fakaneifua ifo hangē ko e bûche ti Noël (fakaneifua Yule log). Ne haʻu ʻa Mama mo Sōsiuá ke fakatau mai ha meʻakai, ka naʻe fakamamaʻu pē e sio ʻa Sōsiuá ki he ngaahi fuʻu ʻakau Kilisimasí. Naʻe ʻi ai ha ngaahi fuʻu ʻakau ne lōloa mo sino iiki. Ko ha niʻihi ne nounou mo tapotopoto. Naʻe aʻu ʻo sio ʻa Sōsiua ki ha fuʻu ʻakau naʻe māʻolunga tatau pē mo iá!
Naʻe talaange ʻe Mama naʻe ʻikai ke lahi ʻenau paʻanga he taʻu ní. Mahalo pē he ʻikai ke nau lava ʻo fakatau mai ha fuʻu ʻakau. Naʻe kiʻi loto-mamahi ʻa Sōsiua. Ko e taimi pē naʻá ne ʻalu ai ki he māketí mo Mamá, naʻá ne toutou fakasio pē ha fuʻu ʻakau Kilisimasi ʻoku haohaoá. Mahalo pē, mahalo pē te na maʻu ha fuʻu ʻakau ke na foki mo ia ki ʻapi.
Naʻe piki pē ʻa Sōsiua he nima ʻo Mamá ʻi heʻena lue ki he ʻotu hono hokó. Naʻe ʻohovale ʻa Sōsiua. Naʻá ne sio ki he fuʻu ʻakau haohaoá!
Naʻá ne lele tamuʻomuʻa leva ʻo ala ki he fuʻu ʻakaú. Naʻe ʻikai ke loko lanu mata. Naʻe ngangana hono talatalá. Naʻe ʻikai ke loko māʻolunga. Ko hono moʻoní, naʻe piko ʻaupito ia ʻo hangē ha motuʻa vaivai ʻoku falala ki ha tokotokó.
“Mama, ʻoku fakaʻofoʻofa!” Ko e lea ange ia ʻa Sōsiuá. “ʻE lava ke ta ʻave ia ki ʻapi? Fakamolemole muʻa?”
Naʻe hila ʻa Mama ki he totongí. “ʻIo, ʻoku ʻikai ke loko mamafa ia. Pea ʻoku ou tui ʻe lava ʻo hao ia ki heʻeta kaá.”
Ne ʻikai ke faʻa tatali ʻa Sōsiua! Naʻá ne vaʻivaʻinga ʻaki e tapa hono koté lolotonga ʻene tali kia Mama ke totongi ʻa e fuʻu ʻakaú. Ne haʻu leva ha tangata angalelei ʻo tokoni ki hono faʻo e fuʻu ʻakaú ki he kaá. ʻI heʻena aʻu ki ʻapí, ne tokoni ʻa hono tokoua ko Mātiú mo Papa ke fakahifo e fuʻu ʻakaú mei he kaá. Naʻa nau hiki e fuʻu ʻakaú ki loto pea fokotuʻu ia ʻi he tuliki ʻo honau loki ʻi muʻá.
Naʻe pehē ange ʻe Mātiu, “ʻOku fie maʻu ke tau ʻuluaki tau e ʻuhilá.”
Ne faingataʻa ke tautau e sisiʻuhilá ki ʻolunga koeʻuhí ko e piko ʻa e fuʻu ʻakaú. Naʻe tau ʻe Mātiu ʻa e sisiʻuhila ki ʻolungá. Kae fokotuʻu ʻe Sōsiua ʻa e sisiʻuhila ʻi he konga ki laló. Ne na hoko atu leva ki hono tautau ʻo e ʻū meʻa teuteu faka-Kilisimasí. Pea toki tokoni leva ʻa Papa kia Sōsiua ki hono fokotuʻu ʻo e foʻi fetuʻú ʻi ʻolungá.
Naʻe palaki ʻe Papa ʻa e sisiʻuhilá peá ne piki kia Mama. Ne malimali ʻa Sōsiua ki he fuʻu ʻakaú. Naʻe hanga ʻe he maama ʻo e fuʻu ʻakaú ʻo fakamāfanaʻi mo ʻomi ha ongo fakalata ki he lokí. Naʻá ne tangutu ʻi lalo ʻi he fuʻu ʻakaú ʻo sio hake ki he ngaahi meʻateuteu ngingilá. Naʻe ʻikai ke hā ngali piko ua mo mata mamahi e fuʻu ʻakaú he taimí ni. Naʻe fakaʻofoʻofa ia. Naʻe haohaoa ia.
Naʻe pehē ange ʻe Sōsiua, “Ko ha fuʻu ʻakau haohaoa ia maʻa Sīsū.”
“Ko e hā hoʻo ʻuhingá?” Ko Mama ange ia.
Ne pehē ange ʻe Sōsiua, “ʻOku hangē pē ʻetau fuʻu ʻakaú ko Sīsuú. Naʻe ʻaloʻi ʻa Sīsū ʻi ha ʻaiʻangakai fakaʻofa mo ʻuli. Naʻe fakaʻofa mo mata mamahi ʻetau fuʻu ʻakaú ʻi he māketí. Ka ʻoku fakaʻofoʻofa mo fakaʻeiʻeiki e fuʻu ʻakaú ia he taimí ni, ʻo hangē pē ko e hoko ʻa Sīsū ko ha tuʻi fakaʻofoʻofá.”
Naʻe pehē ange ʻe Papa, “Ko ʻetau fuʻu ʻakau haohaoa maʻa Sīsuú. ʻOku ou saiʻia ai.”
Naʻe malimali ʻa Sōsiua. ʻE hoko ʻeni ko ha Kilisimasi makehe ʻaupito.