Haʻu, ʻo Muimui ʻIate Au: Tohi ʻa Molomoná
Ko e hā ha meʻa te tau lava ʻo ako mei he tohi ʻa Molonaí?
(30 Nōvema–6 Tīsema)
Naʻe moʻui ʻa Molonai ʻi ha ngaahi taimi faingataʻa. Naʻá ne mātātonu ki hono fakaʻauha fakaʻosi ʻo e kau Nīfaí, ne pekia ai ʻene tamaí ʻi he taú (vakai, Molomona 8:3), pea ko e kau Nīfai ne ʻikai ke nau fakaʻikaiʻi ʻa Sīsū Kalaisí ne tāmateʻi (vakai, Molonai 1:2). Naʻe taʻeloto foki mo Molonai ke “fakaʻikaiʻi ʻa e Kalaisí” (Molonai 1:3). Naʻá ne hola holo ke hao pea nofo toitoi ʻi ha ngaahi taʻu lahi.
“ʻOku ou tohi mo ha ngaahi meʻa siʻi ʻe niʻihi” (Molonai 1:4)
Lolotonga e taimi ko ʻení, ne fakakaukau ʻa Molonai kuo ʻosi ʻene tohi ʻi he ʻū lauʻi peletí, ka ko e finangalo ia ʻa e ʻEikí ke ne “tohi mo ha ngaahi meʻa siʻi ʻe niʻihi, heiʻilo naʻa ʻaonga ʻapē ia ki hoku kāingá … ʻi ha ʻaho ʻamui” (Molonai 1:4).
Ko e hā e meʻa naʻá ne tohí?
Naʻe toe tānaki atu ʻe Molonai e vahe 8 mo e 9 ki he Tohi ʻa Molomoná, fakakau atu mo ʻene fakanounouʻi e tohi ʻa ʻEtá, pea tānaki atu ʻene tohi pē ʻaʻana (ko e Tohi ʻa Molonaí) ki he ʻū lauʻi peleti ʻa Molomoná.
ʻOku ʻi ai ha ngaahi meʻa lahi ʻi he tohi ʻa Molonaí ʻoku ʻaonga kiate kitautolu. Naʻá ne tohi fekauʻaki mo e ngāue ʻa e Siasí (vakai, Molonai 1–6), fakakau ai mo e ngaahi akonaki mei heʻene tamai ko Molomoná (vakai, Molonai 7–9), pea lekooti mo ʻene fakamoʻoni fakaʻosí (vakai, Molonai 10).
Ko e hā e ʻuhinga naʻá ne tohi ai iá?
ʻI hono ʻiloʻi ʻe Molonai e ngaahi taumuʻa fakalangi ʻo e Tohi ʻa Molomoná, naʻe pau ai ke ne filifili lelei e meʻa naʻá ne tohí. Hili hoʻo lau e tohi ʻa Molonaí, fakakaukau ke ke fehuʻi angé pe ko e hā ne fili ai ʻe Molonai ke ne lekooti e meʻa naʻá ne faí. Ko e hā e meʻa naʻá ne ongoʻi ne mahuʻingá? ʻOku tākiekina fēfē hoʻo ngaahi ongó ʻe he fakamoʻoni fakaʻosi ʻa Molonai fekauʻaki mo e Tohi ʻa Molomoná?