“Mahitungod sa Basahon ni Mormon,” Mga Sugilanon sa Basahon ni Mormon (2023)
Mahitungod sa Basahon ni Mormon
Si Jesukristo ug ang Iyang katawhan sa Amerika
Ang Basahon ni Mormon usa ka kasulatan. Nagtudlo kini kanato mahitungod sa Ginoo nga si Jesukristo ug sa Iyang pagbisita didto sa Amerika dugay na. Gikan sa Basahon ni Mormon, makakat-on kita mahitungod sa ebanghelyo ni Jesus. Nagtudlo kini kanato unsaon sa pag-angkon og kalinaw ug unsaon nga makapuyo kita og balik uban sa Dios ug ni Jesus ugma damlag.
Ulohan nga pahina sa Basahon ni Mormon; pasiuna sa Basahon ni Mormon; 3 Nephi 11
Ang Basahon ni Mormon mga sinulat sa mga propeta sa Dios. Nagsulat sila diha sa metal nga mga pahina nga gitawag og mga palid. Ang ilang mga istorya ug mga pagpamatuod makatabang nato sa pag-angkon og hugot nga pagtuo kang Jesus. Nagsulat sila mahitungod sa daghang pundok sa katawhan kinsa nagpuyo sa Amerika dugay na.
Ulohan nga pahina sa Basahon ni Mormon; pasiuna sa Basahon ni Mormon
Usa ka pundok naggikan sa Jerusalem ngadto sa Amerika mga 600 ka tuig sa wala pa matawo si Jesus. Nahimo silang duha ka nasod nga gitawag og mga Lamanite ug mga Nephite.
Pasiuna sa Basahon ni Mormon; 1 Nephi 1:4
Sa mas una nga panahon, lahi nga pundok ang miabot gikan sa Tore sa Babel ngadto sa Amerika. Gitawag sila og mga Jaredite.
Pasiuna sa Basahon ni Mormon; Ether 1:33–43
Ang mga propeta sa Dios nagtudlo sa katawhan. Dihang ang katawhan naminaw ug misunod sa mga sugo sa Dios, Siya mitabang kanila. Ang mga propeta nagtudlo mahitungod ni Jesus ug nag-ingon nga Siya matawo sa Jerusalem. Ang mga Nephite ug mga Lamanite nakahibalo nga si Jesus mobisita kanila human sa Iyang kamatayon.
2 Nephi 1:20; 25:12–14; 26:1, 3, 9; Mosiah 3:5–11; Alma 7:9–13; Helaman 3
Si Jesus miabot sigon sa giingon sa mga propeta. Human si Jesus namatay ug nabanhaw, gibisitahan Niya ang katawhan. Gipahikap Niya ang matag tawo sa mga agi sa lansang diha sa Iyang mga kamot ug mga tiil. Nasayod sila nga si Jesus mao ang Anak sa Dios. Gitudlo Niya ang Iyang ebanghelyo, ug ang mga tawo misulat niini. Naghisgot sila mahitungod sa pagbisita ni Jesus sa dugay nang katuigan.
3 Nephi 11:7–15, 31–41; 16:4; 4 Nephi 1:1–6, 13–22
Si Mormon usa ka propeta kinsa nagpuyo pipila ka gatos ka tuig human sa pagbisita ni Jesus. Sa kapanahonan ni Mormon, ang mga tawo mihunong sa pagsunod ni Jesus. Si Mormon naghupot sa mga sinulat sa mga propeta kinsa nagpuyo dinhi una kaniya. Gipamutang niya ang ilang daghan nga sinulat ngadto sa usa ka hut-ong sa mga palid. Kini nga mga palid nahimo nga Basahon ni Mormon.
Pasiuna sa Basahon ni Mormon; Mga Pulong ni Mormon 1:2–9; Mormon 1:2–4, 13–17
Sa wala pa mamatay si Mormon, iyang gihatag ang mga palid ngadto sa iyang anak nga lalaki nga si Moroni. Sa kapanahonan ni Moroni, ang mga tawo naghimo og ngil-ad kaayong mga butang. Gusto nilang patyon si bisan kinsa nga motuo kang Jesus. Si Moroni gustong motabang sa mga tawo sa umaabot, mao nga gidugangan niya ang pagsulat diha sa mga palid ug gilubong kini aron paghimo niini nga luwas.
Pasiuna sa Basahon ni Mormon; Mga Pulong ni Mormon 1:1–2; Mormon 8:1–4, 14–16; Moroni 1
Daghang tuig human niadto, niadtong 1823, si Moroni miadto kang Propeta Joseph Smith isip usa ka anghel. Gisultihan ni Moroni si Joseph kon asa makita ang mga palid. Pinaagi sa tabang sa Dios, gihubad ni Joseph ang unsay mga nasulat sa mga palid.
Pasiuna sa Basahon ni Mormon; Joseph Smith—Kasaysayan 1
Ipadala sa Dios ang Espiritu Santo aron sa pagtabang nimo nga mahibalo kon ang butang tinuod. Kon mobasa ka sa Basahon ni Mormon, mahimo kang mag-ampo ug mangutana sa Dios kon kini tinuod ba. Sa samang paagi, mahibaloan nimo nga si Jesus imong Manluluwas ug nga Siya nahigugma kanimo.