“Alma, Amulek, ug Zeezrom,” Mga Sugilanon sa Basahon ni Mormon (2023)
Alma, Amulek, ug Zeezrom
Pagpili nga motuo sa ug motuman sa Dios
Nakita ni Alma nga daghan sa mga miyembro sa Simbahan wala magtuman sa mga sugo sa Dios. Mao nga miadto si Alma sa matag siyudad nagtudlo sa pulong sa Dios. Daghang tawo ang naghinulsol. Dayon miadto si Alma sa siyudad nga gitawag og Ammonihah. Ang mga tawo didto wala maminaw kaniya. Ila siyang gilud-an ug migukod kaniya paggawas sa siyudad.
Si Alma mibati og kasubo samtang mibiya siya sa siyudad. Nabalaka siya alang sa katawhan. Dayon ang anghel miadto kaniya. Ang anghel miingon nga si Alma mahimo rang maglipay kay gituman niya ang Dios. Ang anghel misulti kang Alma sa pagbalik sa siyudad ug mopasidaan sa katawhan. Kon dili sila maghinulsol, mangalaglag sila. Mibalik dayon si Alma.
Dihang si Alma miadto sa siyudad, gigutom kaayo siya. Nagpuasa siya sulod sa daghang adlaw. Mihangyo si Alma og pagkaon sa tawo nga ginganlan og Amulek.
Si Amulek misulti ni Alma mahitungod sa usa ka panan-awon nga iyang nakita. Diha sa panan-awon, usa ka anghel misulti kang Amulek nga si Alma propeta sa Dios. Si Amulek gustong motabang ni Alma.
Gidala ni Amulek si Alma sa balay ug mihatag kaniya og pagkaon. Si Alma mipuyo sa balay ni Amulek sulod sa daghang adlaw. Ang Dios mipanalangin ni Amulek ug sa iyang pamilya. Wala madugay, ang Dios misulti kang Alma ug Amulek nga sultihan ang katawhan sa siyudad sa paghinulsol. Si Alma ug Amulek mituman. Gihatagan sila sa Dios sa Iyang gahom nga makatabang nila sa pagtudlo.
Usa sa mga tawo nga nakadungog kanila nga nagtudlo ginganlan og Zeezrom. Utokan kaayo siya ug gustong mobitik ni Alma ug ni Amulek. Si Zeezrom miingon kang Amulek nga mohatag siya og daghang kwarta kaniya kon moingon siya nga ang Dios dili tinuod. Gusto siya nga mamakak si Amulek aron ang mga tawo dili motuo sa gitudlo ni Amulek ug Alma.
Alma 10:29–32; 11:21–25; 12:4–6
Apan si Amulek dili mamakak mahitungod sa Dios. Miingon siya nga ang Dios tinuod. Si Amulek ug Alma nasayod sa mga hunahuna ni Zeezrom. Natingala si Zeezrom ug gipangutana sila og daghang pangutana. Gitudloan nila si Zeezrom nga ang Dios dunay usa ka plano sa katawhan. Mituo si Zeezrom sa gitudlo ni Alma ug Amulek mahitungod sa Dios ug ni Jesukristo.
Alma 11:23–46; 12:1–18, 24–34; 14:6–7; 15:6–7
Nasubo kaayo si Zeezrom sa dili maayong mga butang nga iyang nahimo. Nasakit siya. Si Alma ug Amulek mibisita kaniya. Miingon si Alma nga mamaayo si Zeezrom tungod sa hugot nga pagtuo ni Zeezrom kang Jesus. Si Alma mihangyo sa Dios sa pag-ayo kaniya. Si Zeezrom kalit nga mibarog. Naayo siya! Nabunyagan siya ug mitudlo sa katawhan hangtod sa kataposan sa iyang kinabuhi.