“Abish,” Mga Sugilanon sa Basahon ni Mormon (2023)
Abish
Mitabang sa iyang katawhan nga motuo ni Jesus
Si Abish nagtrabaho alang sa rayna nga usa ka Lamanita. Si Abish nakat-on mahitungod ni Jesukristo gikan sa usa ka panan-awon sa iyang amahan. Sa daghang katuigan, siya mituo ni Jesus ug gusto nga mosunod Kaniya. Apan wala pa niya sultihi ang ubang mga Lamanita.
Usa ka adlaw, usa ka Nephita nga ginganlan og Ammon ang miabot sa gingharian aron magtudlo sa mga Lamanita mahitungod ni Jesus ug sa Dios. Ang rayna ug hari mituo sa unsay gitudlo ni Ammon. Ang rayna ug hari nakahibalo nga si Jesus moabot sa kalibotan, ug gihimo kini aron ang tanan nga mituo Kaniya mapasaylo.
Alma 17:12–13; 18:33–36, 39–40; 19:9, 13
Ang rayna ug hari mibati sa Espiritu Santo ug nalipay kaayo nga sila natumba sa yuta. Si Ammon ug ang mga sulugoon natumba usab. Si Abish mao lang ang nag-inusarang nagbarog.
Gustong sultihan ni Abish ang katawhan mahitungod niini nga milagro. Naglaom siya nga ang katawhan motuo sa gahom sa Dios sa dihang sila nakakita unsay nahitabo. Mao nga si Abish midagan gikan sa usa ka balay ngadto sa laing balay. Gisultihan niya ang katawhan nga moadto ug tan-awon kon unsa ang gihimo sa Dios alang sa rayna ug hari.
Daghang katawhan ang miadto sa balay sa rayna ug hari. Natingala sila tungod kay mora og ang rayna, ang hari, ug tanan nilang sulugoon patay na.
Ang katawhan nahibulong. Naglalis sila mahitungod sa unsay nahitabo sa rayna ug hari.
Pagbalik ni Abish, nakita niya ang katawhan nga naglalis. Naguol siya tungod kay wala nila makita ang gahom sa Dios. Dayon iyang gikuha ang kamot sa rayna, ug mibarog ang rayna ug midayeg ni Jesus.
Gikuha sa rayna ang kamot sa iyang bana, ug mibarog siya. Ang hari misulti sa katawhan mahitungod ni Jesus. Dayon si Ammon ug ang uban nga mga sulugoon mibarog. Silang tanan misulti sa katawhan nga si Jesus miusab nila. Sila karon ganahan na nga mohimo og maayo nga mga butang. Daghang tawo ang mituo nila.
Sama sa gilaoman ni Abish, nakita sa katawhan ang gahom sa Dios. Pipila ka tawo ang mituo ug nabunyagan. Sila aduna sa Espiritu sa Ginoo diha kanila. Gitukod pa gani nila ang Simbahan sa ilang yuta. Nakita nila nga si Jesus nagtabang ni bisan kinsa nga maghinulsol ug motuo Kaniya.