“Ang Bandila sa Kalingkawasan,” Mga Sugilanon sa Basahon ni Mormon (2023)
Ang Bandila sa Kalingkawasan
Pagpanalipod sa katungod nga motuo sa Dios
Si Amalickiah usa ka dako, lig-on nga Nephita. Gusto niyang mahimong hari. Siya misaad nga mohatag og gahom sa mga tawo nga mitabang niya. Daghang katawhan ang ganahan niya ug misulay sa pagpasunod sa uban kaniya. Si Amalickiah nangulo sa katawhan sa pagbuhat og daotan nga mga butang. Gusto niya ug sa iyang mga sumusunod nga patyon ang mga tawo nga nagtudlo mahitungod ni Jesukristo.
Si Kapitan Moroni, ang pangulo sa kasundalohan sa mga Nephita, nagtuo ni Jesus. Siya nakahibalo nga ang mga Nephita napanalanginan tungod kay sila nagtuman sa mga sugo sa Dios. Siya nasuko kaayo nga gipalayo ni Amalickiah ang katawhan gikan sa Dios, nagmatinguhaon nga mahimong hari, ug nagmatinguhaon sa pagpasakit og mga tawo.
Gigisi ni Moroni ang iyang sapot. Gisulat niya niini nga ang katawhan kinahanglan nga mahinumdom sa ilang Dios, ilang kagawasan, ug ilang mga pamilya. Dayon iya kining gihigot sa usa ka tukon ug gitawag kini og bandila sa kalingkawasan. Si Moroni nag-ampo alang sa panalangin sa Dios. Gipakita niya sa mga Nephita ang bandila sa kalingkawasan ug mihangyo nila nga mokuyog niya sa pagpakig-away ni Amalickiah.
Ang katawhan misul-ob sa ilang mga taming ug midagan ngadto ni Moroni. Sila andam nga makig-away alang sa Dios ug sa ilang mga panimalay, mga pamilya, ug kagawasan. Sila mihimo og pakigsaad, o espesyal nga saad, kauban sa Dios nga sila kanunay nga mosunod kaniya. Dayon sila nangandam aron makig-away ni Amalickiah.
Dako ang kasundalohan ni Moroni. Nahadlok si Amalickiah. Misulay siya sa paglayas kauban sa iyang mga sumusunod. Apan daghan nila ang nabalaka nga si Amalickiah nakig-away alang sa sayop nga mga hinungdan. Daghan ang dili na mosunod kaniya. Gipugngan sa kasundalohan ni Moroni kadtong mga misunod gihapon ni Amalickiah, apan si Amalickiah ug pipila nga uban pa nakaikyas.
Si Amalickiah miadto sa yuta sa mga Lamanita. Gusto niya nga ang mga Lamanita motabang niya nga makig-away batok sa mga Nephita. Dayon siya makaangkon og mas dako, mas lig-on nga kasundalohan. Iyang napahimo ang daghang Lamanita nga masuko sa mga Nephita. Ang hari sa mga Lamanita misulti sa tanang Lamanita nga mangandam aron makig-away sa mga Nephita.
Ganahan ang hari ni Amalickiah. Gihimo niya si Amalickiah nga usa sa mga pangulo sa kasundalohang Lamanita. Apan gusto ni Amalickiah ang dugang pa nga gahom.
Si Amalickiah naghimo og plano aron magmando sa mga Lamanita. Iyang nailog ang tibuok kasundalohang Lamanita. Dayon iyang gisugo ang iyang mga sulugoon nga patyon ang hari ug namakak mahitungod sa kon kinsa ang mihimo niini.
Nagpakaaron-ingnon si Amalickiah nga nasuko nga gipatay ang hari. Ganahan ang mga Lamanita ni Amalickiah. Iyang gipakaslan ang rayna ug nahimong bag-o nga hari. Gusto niyang magmando usab sa mga Nephita. Miistorya siya og dili maayo mahitungod sa mga Nephita aron ang mga Lamanita masuko nila. Sa wala madugay, daghang Lamanita ang gusto nga makig-away nila.
Samtang si Amalickiah nakakuha og gahom pinaagi sa pagpamakak, si Moroni miandam sa mga Nephita nga mosalig sa Dios. Iyang gibutang ang bandila sa kalingkawasan sa matag tore sa yuta aron mopahinumdom nila sa ilang saad. Giandam usab sa kasundalohan ni Moroni ang mga siyudad sa mga Nephita alang sa gubat. Nagtukod sila og mga paril ug nagkalot og mga kanal aron mahimong luwas ug lig-on ang mga siyudad.
Sa dihang miabot ang mga Lamanita aron makig-away, dili sila makasulod sa mga siyudad sa mga Nephita. Napugngan sila sa mga paril ug mga kanal nga gitukod sa kasundalohan ni Moroni. Daghang Lamanita ang namatay sa dihang misulong sila sa mga Nephita. Nasuko kaayo si Amalickiah. Misaad siya nga patyon si Moroni.
Ang mga Nephita nagpasalamat sa Dios sa pagtabang ug pagpanalipod nila. Gihimo nila nga mas luwas pa ang ilang mga siyudad ug nagtukod og dugang nga mga siyudad. Ang gubat batok sa mga Lamanita nagpadayon, apan ang Dios mitabang ni Moroni ug sa iyang kasundalohan nga ipabiling luwas ang mga Nephita. Malipayon kaayo ang mga Nephita. Misunod sila sa Dios ug nagpabiling matinud-anon ngadto Kaniya.