“Hari Noah ug Hari Limhi,” Mga Sugilanon sa Basahon ni Mormon (2023)
Hari Noah ug Hari Limhi
Pag-ikyas gikan sa mga Lamanita
Si Hari Noah nagmando og usa ka grupo sa mga Nephita. Mihimo siya og daghang daotan nga mga butang, ug pipila ka tawo ang nasuko niya. Usa ka tawo nga ginganlan og Gideon nakig-away ni Noah gamit ang espada. Midagan si Noah ug misaka sa usa ka tore. Gikan sa tore, iyang nakita ang kasundalohan sa mga Lamanita nga nagsingabot. Si Noah nagpakaaron-ingnon nga siya nahadlok alang sa iyang katawhan, mao nga gipasagdan siya ni Gideon nga mabuhi.
Si Noah ug ang iyang katawhan nanglayas. Apan gigukod sila sa mga Lamanita ug nagsugod sa pagsulong nila. Gisultihan ni Noah ang kalalakin-an nga biyaan ang ilang mga pamilya ug mokuyog niya.
Pipila ka kalalakin-an ang mibiya uban ni Noah. Apan daghan sa kalalakin-an ang mipili nga magpabilin kauban sa ilang mga pamilya. Ang anak nga lalaki ni Noah nga si Limhi mipili usab nga magpabilin.
Daghang mga anak nga babaye ang mibarog atubangan sa kasundalohan ug mihangyo sa mga Lamanita nga dili pasakitan ang ilang mga pamilya. Ang mga Lamanita naminaw sa ilang mga anak nga babaye ug gitugotan ang mga Nephita nga mabuhi. Hinuon, ang mga Lamanita midakop sa mga Nephita.
Gusto sa kalalakin-an nga milayas nga mobalik sa ilang mga pamilya. Gisulayan sila og pugong ni Noah, mao nga gipatay siya sa kalalakin-an. Dayon mibalik sila sa ilang mga pamilya.
Ang kalalakin-an malipayon kaayo nga luwas ang ilang mga pamilya. Ilang gisultihan si Gideon unsa ang nahitabo ni Noah.
Ang katawhan mipili ni Limhi nga mahimong ilang bag-ong hari. Misaad si Limhi sa hari nga Lamanita nga sila mobayad sa mga Lamanita og katunga sa tanan nga ilang gipanag-iya. Isip ganti, ang hari sa Lamanita misaad nga dili niya pasakitan ang katawhan ni Limhi.
Sila nagpuyo sa kalinaw sulod sa pipila ka tuig. Dayon ang mga Lamanita nagsugod sa pagtratar og dili maayo sa katawhan ni Limhi. Ang katawhan ganahan nga mahimong gawasnon na usab. Gisulayan nila sa pagpakig-away sa mga Lamanita, apan napildi sila. Ang katawhan nag-ampo sa Dios alang sa tabang.
Usa ka adlaw, usa ka Nephita nga ginganlan og Ammon ang mibisita ni Limhi ug sa iyang katawhan. Si Ammon gikan sa usa ka yuta nga gitawag og Zarahemla. Malipayon si Limhi nga makita si Ammon.
Si Ammon makagiya sa katawhan ni Limhi ngadto sa Zarahemla, apan kinahanglan usa nila nga makaikyas gikan sa mga Lamanita. Dunay plano si Gideon.
Pagka-gabii, si Gideon mihatag sa Lamanita nga mga guwardya og daghan kaayo nga bino aron sila makatulog. Samtang ang mga guwardya natulog, si Limhi ug ang tanan niyang katawhan miikyas sa siyudad.
Miadto sila sa Zarahemla ug miipon sa mga Nephita didto. Si Limhi ug ang iyang katawhan nakat-on og dugang mahitungod sa Dios. Sila mihimo og pakigsaad, o espesyal nga saad, sa pagserbisyo sa Dios ug motuman sa Iyang mga sugo. Sila nabunyagan ug nahimong kabahin sa Simbahan sa Dios. Sila nahinumdom nga ang Dios mitabang nila mga makaikyas gikan sa mga Lamanita.