“Si Alma sa Katubigan sa Mormon,” Mga Sugilanon sa Basahon ni Mormon (2023)
Si Alma sa Katubigan sa Mormon
Pagkahimong katawhan sa Dios
Si Alma kaniadto usa ka pari alang sa hari nga ginganlan og Noah. Si Alma misulay sa pagluwas ni Abinadi, usa ka propeta sa Dios, nga patyonon ni Noah. Apan si Noah nasuko ni Alma ug gustong patyon usab si Alma. Si Alma midagan palayo ni Noah aron magpabiling luwas. Atol sa adlaw, si Alma mitago duol sa dapit nga gitawag og Katubigan sa Mormon.
Si Alma mituo sa unsay gitudlo ni Abinadi mahitungod ni Jesukristo. Siya mihangyo sa Dios sa pagpasaylo niya sa iyang mga sala ug mga sayop.
Si Alma pribado nga nakigtagbo og mga tawo ug gitudloan sila mahitungod ni Jesus. Gitudloan niya ang tanan kinsa maminaw.
Daghang tawo ang mituo ni Alma. Miadto sila sa Katubigan sa Mormon aron maminaw ni Alma nga magtudlo.
Ang mga tumutuo gusto nga tawagon nga katawhan sa Dios, motabang sa uban nga nanginahanglan, ug moistorya sa katawhan mahitungod sa Dios. Mao nga si Alma midapit kanila nga magpabunyag. Pinaagi sa pagpabunyag, sila mohimo og pakigsaad, o saad, uban sa Dios nga mag-alagad Kaniya ug maghupot sa Iyang mga sugo. Isip ganti, ang Dios mopanalangin kanila sa Iyang Espiritu.
Malipayon kaayo ang katawhan. Namakpak sila ug miingon nga gusto nilang magpabunyag. Si Alma mibunyag sa matag usa kanila sa Katubigan sa Mormon. Silang tanan napuno sa Espiritu sa Dios ug mibati sa gugma sa Dios alang nila. Nahimo silang mga miyembro sa Simbahan ni Kristo.
Nakita ni Noah nga pipila sa iyang katawhan ang mibiya sa iyang yuta. Mipadala siya og mga sulugoon aron bantayan sila. Nakita sa mga sulugoon nga ang katawhan miadto sa yuta sa Mormon aron maminaw sa mga gitudlo ni Alma. Nasuko kaayo si Noah. Iyang gipadala ang iyang kasundalohan aron patyon si Alma ug ang katawhan nga iyang gitudloan.
Gipasidan-an sa Dios si Alma mahitungod sa kasundalohan. Uban sa tabang sa Dios, luwas nga nakabiya sa yuta si Alma ug ang iyang katawhan. Ang mga kasundalohan dili makadakop kanila. Naglakaw sila sulod sa walo ka adlaw sa kamingawan ug miabot sa usa ka maanindot nga yuta. Naghimo sila og bag-o nga mga panimalay didto. Gitudloan ni Alma ang katawhan, ug sila nagtuman sa ilang saad sa Dios.