“Mga Timailhan sa Pagkatawo ni Jesus,” Mga Sugilanon sa Basahon ni Mormon (2023)
Mga Timailhan sa Pagkatawo ni Jesus
Hugot nga pagtuo sa mga gipanudlo sa propeta
Mga lima na ka tuig ang milabay sukad nga si Samuel nga propeta nagtudlo mahitungod sa mga timailhan sa pagkatawo ni Jesukristo. Daghang tawo ang mituo ug nagbantay sa mga timailhan. Ang ubang tawo miingon nga sayop si Samuel ug ang panahon alang sa mga timailhan milabay na. Gibugal-bugalan nila ang mga tumutuo ug miingon nga si Jesus dili moabot.
Ang mga tumutuo nabalaka apan aduna silay hugot nga pagtuo. Nagpadayon sila sa pagbantay alang sa mga timailhan. Usa ka timailhan mao ang usa ka gabii nga dili mongitngit. Kini mahimong sama kahayag sa adlaw bisan human na og salop ang adlaw. Ang gabii nga walay kangitngit maoy timailhan nga si Jesus matawo pagka-sunod adlaw sa lain nga yuta.
Ang mga tawo nga wala motuo naghimo og plano. Mipili sila og adlaw ug miingon nga kon ang timailhan dili mahitabo nianang adlawa, ang mga tumutuo patyon.
Usa ka tawo nga ginganlan og Nephi mao ang propeta niining higayona. Naguol kaayo siya nga ang ubang mga tawo gusto nga patyon ang mga tumutuo.
Si Nephi miyukbo ngadto sa yuta ug nag-ampo sa Dios alang sa mga tumutuo nga hapit na mamatay tungod sa ilang hugot nga pagtuo. Nag-ampo siya tibuok adlaw.
Isip tubag sa iyang pag-ampo, si Nephi nakadungog sa tingog ni Jesus. Si Jesus miingon nga ang timailhan mahitabo nianang gabhiona ug dayon Siya matawo pagka-sunod adlaw.
Nianang gabhiona walay kangitngit bisan og misalop na ang adlaw. Ang katawhan nga wala motuo sa mga pulong ni Samuel nakurat kaayo mao nga nanghapa sila sa yuta. Nahadlok sila tungod kay wala sila motuo. Ang katawhan nga mituo wala patya.
Pagkasunod adlaw, ang adlaw misubang pag-usab ug ang kalangitan nagpabilin nga hayag. Tanang katawhan nakahibalo nga kini mao ang adlaw nga matawo si Jesus.
Ang katawhan nakakita og lain nga timailhan. Usa ka bag-ong bitoon nagpakita sa kalangitan. Tanang timailhan nga gipamulong ni Samuel natinuod. Daghan pa nga katawhan ang mituo ni Jesus ug nabunyagan.