“Si Ether nga Propeta,” Mga Sugilanon sa Basahon ni Mormon (2023)
Si Ether nga Propeta
Ang pasidaan sa Ginoo ngadto sa usa ka nasod
Ang Ginoo midala sa igsoong lalaki ni Jared ug sa iyang pamilya ngadto sa gisaad nga yuta. Sila mapaubsanon ug nagtuman sa mga sugo sa Dios. Ang ilang pundok milambo sa daghang katuigan, ug ganahan sila og hari nga mangulo nila. Gipasidan-an sila sa igsoong lalaki ni Jared nga ang pagkaadunay hari mahimong mopadulong sa kagubot, apan sila gipapili niya og hari.
Sa gatosan ka mga tuig, ang mga Jaredita nagpuyo sa gisaad nga yuta. Usahay ang ilang mga hari mangulo nila sa pagbuhat og maayo, apan sa ubang mga higayon sila wala magbuhat niini. Ang mga propeta sa Dios mopasidaan sa katawhan nga maghinulsol. Dihang sila naminaw ug mituman sa mga sugo sa Dios, Siya mipanalangin kanila. Ang kataposang Jaredita nga propeta mao si Ether.
Ether 7:23–27; 9:26–30; 10:16–17, 28; 11:1–8, 12–13, 20–22; 12:2
Ang katawhan wala magsunod sa Dios. Apan ang Espiritu sa Ginoo anaa ni Ether. Siya nagtudlo nila gikan sa buntag hangtod sa gabii. Siya misulti nga motuo sa Dios o sila pagalaglagon. Kon sila adunay hugot nga pagtuo, sila makalaom nga mopuyo pag-usab uban sa Dios ug maadunay kalig-on sa pagbuhat sa maayo nga mga butang. Ang katawhan wala motuo.
Gitan-aw ni Ether kon unsa ang gibuhat sa katawhan. Mitago siya sa usa ka langob atol sa adlaw ug gisulat kon unsa ang iyang nakita. Ang katawhan wala maghinulsol ug nagsugod sa pagpakig-away sa usag usa.
Nakita ni Ether nga ang Jaredita nga hari, si Coriantumr, kinahanglan nga makig-away og daghang tawo nga gustong mahimong hari. Gigamit ni Coriantumr ang iyang kasundalohan aron panalipdan ang iyang kaugalingon.
Usa ka adlaw, ang Ginoo misulti ni Ether nga pahimangnoan si Coriantumr ug ang iyang katawhan sa paghinulsol. Kon ila kining buhaton, ang Ginoo motabang sa katawhan ug motugot nga magpabilin ni Coriantumr ang iyang gingharian. Kon dili, ang katawhan molaglag sa usag usa. Si Coriantumr mabuhi og dugay aron makita nga tinuod ang mga pulong sa Ginoo. Dayon siya mamatay usab.
Si Coriantumr ug ang iyang katawhan wala maghinulsol. Ang katawhan misulay sa pagpatay ni Ether, apan si Ether naka ngadto sa iyang langob. Usa ka tawo nga ginganlan og Shiz ang nakig-away batok ni Coriantumr. Ang katawhan mipili sa pagtipon sa kasundalohan ni Shiz o sa kasundalohan ni Coriantumr. Ang duha ka kasundalohan adunay daghan nga gubat. Daghang tawo ang namatay.
Ether 13:22–25; 14:17–20; 15:2
Si Coriantumr nahinumdom sa unsay gisulti ni Ether. Naguol siya nga daghan kaayo sa iyang katawhan ang namatay. Nahinumdom siya nga tanang propeta mipahimangno nga kini mahitabo. Nagsugod siya sa paghinulsol ug nagpadala og sulat ngadto ni Shiz. Miingon siya nga iyang itugyan ang gingharian kon ang iyang katawhan maluwas. Apan si Shiz gusto nga makig-away.
Ang katawhan ni Coriantumr nasuko ug gusto nga makig-away. Ang katawhan ni Shiz nasuko usab ug gusto nga makig-away. Walay usa nga gustong maghinulsol. Nakita ni Ether nga matag usa ka tawo miadto aron makiggubat. Daghan pa nga mga tawo ang namatay.
Gusto ni Coriantumr nga ihunong na ang gubat. Iyang gihangyo si Shiz nga kuhaon ang gingharian ug dili pasakitan ang iyang katawhan. Apan ang tanan nasuko. Wala nila ang Espiritu sa Ginoo. Nakita ni Ether nga ang tanan nagpadayon sa pagpakig-away hangtod nga si Coriantumr mao na lang ang nagpabiling Jaredita nga buhi. Dayon si Coriantumr nakuyapan.
Nakita ni Ether nga ang tanang butang nga gisulti sa Ginoo natuman. Nahuman si Ether og sulat sa unsay nahitabo. Dayon iyang giseguro nga makaplagan sa katawhan ang iyang mga gisulat human nga siya mawala. Misalig si Ether sa Dios ug naglaom nga makauban Siya sa umaabot nga adlaw.