“Ang Kahoy sa Kinabuhi,” Mga Sugilanon sa Basahon ni Mormon (2023)
“Ang Kahoy sa Kinabuhi,” Mga Sugilanon sa Basahon ni Mormon
Ang Kahoy sa Kinabuhi
Ang dinasig nga damgo ni Lehi
Usa ka gabii, dunay damgo si Lehi gikan sa Ginoo. Gisultihan niya ang iyang pamilya mahitungod sa damgo.
Sa iyang damgo, si Lehi nakakita og tawo nga nagsul-ob og puti nga kupo. Ang tawo misulti kang Lehi sa pagsunod kaniya.
Nakita ni Lehi nga naa siya sa mangitngit ug walay sulod nga dapit. Naglakaw siya sulod sa daghang oras. Apan ang kangitngit wala mahanaw. Sa kataposan, nag-ampo si Lehi og panabang.
Dihang nahuman sa pag-ampo si Lehi, nakakita siya og lapad nga umahan. Niana nga umahan adunay kahoy nga may puti nga bunga. Nagtuo si Lehi nga ang bunga makapalipay niya, mao nga mikaon siya niini. Napuno sa kamaya ang iyang kalag.
Ang bunga mas lamian kay sa ubang bunga. Tam-is kini ug lamian. Gusto ni Lehi nga ipakigbahin kini sa iyang pamilya. Nasayod siya nga makapalipay usab nila kini. Nakita ni Lehi si Sariah, Sam, ug Nephi nga nagbarog dapit sa usa ka suba. Makita nga ingon og nangasaag sila. Gitawag sila ni Lehi sa makusog nga tingog. Siya mihangyo kanila sa pagduol ug pagkaon sa bunga.
Si Sariah, Sam, ug Nephi nangadto sa kahoy ug nangaon sa bunga. Gitan-aw ni Lehi si Laman ug Lemuel. Gusto niya nga matagamtam usab nila ang bunga. Apan dili sila moduol ug mokaon sa bunga.
Dayon nakakita si Lehi og usa ka dalan nga dunay gunitanan nga puthaw padulong sa kahoy. Nakakita siya og daghang tawo nga naglakaw subay sa dalan. Sa kalit, usa ka baga nga kangitngit ang miabot. Ang kangitngit naghimo nga lisod ang pagkakita. Ang bugtong paagi aron makaabot sa kahoy mao ang paggunit sa gunitanan nga puthaw.
Pipila ka tawo mibiya sa dalan ug nangawala. Ang uban hugot nga migunit sa gunitanan nga puthaw ug mipadayon sa unahan.
Dihang miabot na sila sa kahoy, mikaon sila sa bunga.
Mihangad si Lehi ug nakita ang usa ka dako nga bilding nga puno sa daghang tawo. Gibugalbugalan nila ang mga tawo nga nangaon sa bunga. Ang pipila nga nakakaon sa bunga mibati og dili maayo dihang gibugalbugalan sila sa uban, mao nga mibiya sila sa kahoy. Nangasaag sila ug nangawala.
Sa iyang damgo, nakita ni Lehi ang daghan pang tawo kinsa hugot nga migunit sa gunitanan nga puthaw. Mipadayon sila sa unahan, lakang matag lakang hangtod nga nakaabot sila sa kahoy. Dayon nangluhod sila dapit sa kahoy ug nangaon sa bunga. Wala sila maminaw sa mga tawo nga anaa sa bilding. Gipili nila nga magpabilin sa kahoy.
Sa pagmata ni Lehi, nabalaka siya mahitungod ni Laman ug Lemuel. Sa iyang damgo wala sila mokaon sa bunga. Gihigugma ni Lehi si Laman ug Lemuel. Nanghinaot siya nga magpaduol sila sa Ginoo. Iya silang gidapit sa pagtuman sa mga sugo sa Dios.