“Ammon,” Mga Sugilanon sa Basahon ni Mormon (2023)
Ammon
Usa ka mapaubsanon nga sulugoon
Si Ammon ug ang iyang igsoong mga lalaki gusto nga motudlo sa mga Lamanita mahitungod sa Ginoo. Miadto sila sa yuta diin nagpuyo ang mga Lamanita. Sa ilang pagpaingon ngadto, nagpuasa sila ug nag-ampo aron mohangyo sa Ginoo alang sa tabang. Ang Ginoo mihupay kanila. Siya misulti kanila nga magmapailobon ug mahimong maayo nga mga ehemplo. Sila nagtinagsa-tagsa og adto sa lain-lain nga dapit aron sa pagtudlo.
Miadto si Ammon sa dapit nga gitawag og Ishmael. Ang katawhan didto migapos kaniya ug gidala siya ngadto ni Hari Lamoni. Si Ammon misulti ni Lamoni nga gusto siya nga mopuyo kauban sa mga Lamanita. Si Lamoni ganahan ni Ammon ug gibuhian siya. Gusto niya nga minyoan ni Ammon ang usa sa iyang mga anak nga babaye, apan si Ammon mipili hinuon nga mahimong sulugoon ni Lamoni.
Si Lamoni misulti ni Ammon sa pag-atiman sa iyang mga hayop. Usa ka adlaw, si Ammon ug pipila sa ubang sulugoon midala sa mga hayop aron makainom og tubig. Samtang nag-inom ang mga hayop, miabot ang mga tulisan ug mipatibulaag kanila. Ang ubang sulugoon nahadlok nga sila silotan tungod sa pagkawala sa mga hayop ni Lamoni.
Si Ammon nakahibalo nga kini usa ka kahigayonan aron mapakita ang gahom sa Ginoo. Iyang gisultihan ang ubang sulugoon nga dili mabalaka ug mitabang nila sa pagpangita sa nawala nga mga hayop.
Ang mga tulisan mibalik aron tibulaagon na usab ang mga hayop. Apan niining higayona, si Ammon misulti sa ubang sulugoon nga magpabilin ug pugngan ang mga hayop aron dili maka-ikyas.
Si Ammon miadto aron babagan ang mga tulisan sa pagpatibulaag sa mga karnero. Ang mga tulisan wala mahadlok ni Ammon. Nagtuo sila nga mas kusgan sila kay kaniya. Apan wala sila masayod nga ang Ginoo nagtabang ni Ammon.
Gilabay og mga bato ni Ammon ang mga tulisan gamit ang iyang saplong. Ang uban kanila namatay. Kini nakapasuko sa ubang tulisan, ug gusto nila nga patyon si Ammon. Natingala sila tungod kay dili nila maigo si Ammon sa ilang kaugalingon nga mga bato. Wala sila magdahom nga siya gamhanan kaayo.
Ang mga tulisan misulay sa pag-igo ni Ammon sa ilang mga bunal. Apan matag higayon nga sila mosulay, si Ammon motigbas sa ilang mga kamot gamit ang iyang espada aron nga sila dili na makasukol. Sa wala madugay, sila nahadlok pag-ayo nga mopadayon sa pagpakig-away ug midagan palayo.
Gisultihan sa mga sulugoon si Lamoni kon giunsa pagluwas ni Ammon ang mga hayop. Nahingangha si Lamoni. Nagtuo siya nga si Ammon mao ang Gamhanang Espiritu, nga adunay dakong gahom ug nakahibalo sa tanang butang.
Gusto ni Lamoni nga makig-istorya ni Ammon, apan nabalaka usab siya.
Si Ammon miadto aron makigkita ni Lamoni, apan si Lamoni wala makahibalo unsay isulti. Ang Ginoo mitabang ni Ammon nga makahibalo sa mga hunahuna ni Lamoni. Misulti si Ammon nga dili siya ang Gamhanan nga Espiritu. Gisultihan niya si Lamoni nga ang Gamhanang Espiritu mao ang Dios. Gusto ni Lamoni nga makat-on og dugang pa mahitungod sa Dios.
Misulti si Ammon nga ang Dios ang mihimo sa kalibotan ug sa tanan nga anaa niini. Dayon si Ammon misulti ni Lamoni nga ang Dios adunay plano sa kaluwasan. Isip kabahin niana nga plano, si Jesukristo moabot. Mituo si Lamoni sa gisulti ni Ammon. Nag-ampo si Lamoni ug nangayo nga maluoy ang Dios niya ug sa iyang katawhan.