“Alma nga Batan-on,” Mga Sugilanon sa Basahon ni Mormon (2023)
“Alma nga Batan-on,” Mga Sugilanon sa Basahon ni Mormon
Alma nga Batan-on
Usa ka dako nga kausaban
Si Hari Mosiah mihatag ni Alma og gahom aron mangulo sa Simbahan sa Zarahemla. Gitudloan ni Alma ang katawhan sa paghinulsol ug pagbaton og hugot nga pagtuo sa Ginoo.
Si Alma adunay anak nga lalaki nga ginganlan usab og Alma. Si Alma nga Batan-on wala motuo sa gitudlo sa iyang amahan.
Si Mosiah dunay mga anak nga lalaki nga wala usab motuo sa Ginoo. Mga higala sila ni Alma nga Batan-on. Tanan sila gusto nga ang katawhan mobiya sa Simbahan. Si Alma ug ang mga anak nga lalaki ni Mosiah midala og daghang mga tawo sa paghimo og mga butang nga supak sa mga sugo sa Dios.
Usa ka adlaw, ang Ginoo mipadala og usa ka anghel sa pagsanta kanila. Ang anghel misulti kanila nga ihunong ang pagsulay sa pagdaot sa Simbahan. Si Alma ug ang mga anak nga lalaki ni Mosiah labihan ang kahadlok hinungdan nga nangatumba sila sa yuta.
Si Alma dili makasulti o makalihok sulod sa tulo ka adlaw ug tulo ka gabii. Ngil-ad kaayo ang iyang gibati tungod sa tanang sayop nga butang nga iyang nahimo. Nabalaka usab sila kay iyang nadala ang daghang tawo palayo sa Ginoo.
Si Alma mibati og labihan nga kasakit tungod sa iyang mga sala. Dayon nahinumdoman niya ang iyang amahan nga naghisgot mahitungod ni Jesukristo, ang Anak sa Dios.
Si Alma nag-ampo alang kang Jesus nga pasayloon siya. Human sa iyang pag-ampo, dili na niya mahinumdoman ang iyang kasakit. Nasayod siya nga gipasaylo siya sa Ginoo. Wala na siya mobati og dili maayo mahitungod sa iyang mga sala. Kondili, si Alma mibati og labihang kalipay.
Mosiah 27:24, 28–29; Alma 36:18–22
Si Alma naulian sa iyang kusog. Siya ug ang mga anak nga lalaki ni Mosiah mihukom nga maghinulsol ug naningkamot nga mawagtang ang mga kasakit nga nahimo tungod kaniya. Miserbisyo sila sa Ginoo gikan niana nga panahon pinaagi sa pagtabang sa uban nga makahinulsol. Mibiyahe sila latas sa yuta nga gidumala ni Mosiah ug mitudlo sa katawhan mahitungod ni Jesus.
Mosiah 27:20–24, 32–37; Alma 36:23–26
Si Alma ug ang mga anak nga lalaki ni Mosiah gustong mopakigbahin sa kalipay nga gidala sa mga pagtulun-an ni Jesus diha sa ilang kinabuhi. Naningkamot sila pag-yo sa pagserbisyo sa Ginoo ug sa katawhan. Ang mga anak nga lalaki ni Mosiah mipili nga mobiya ug motudlo sa mga Lamanite mahitungod ni Jesus. Si Alma mipili nga magpabilin ug padayong motudlo sa mga Nephite.