“Abinadi ug Hari Noah,” Mga Sugilanon sa Basahon ni Mormon (2023)
Abinadi ug Hari Noah
Usa ka mensahe gikan sa usa ka propeta
Si Hari Noah naghari sa mga Nephita nga nagpuyo sa yuta sa Nephi. Gipahatag ni Noah ang iyang katawhan og daghan nga kwarta ngadto niya ug dayon gigasto kini sa nindot nga mga butang alang sa iyang kaugalingon. Nagtawag siya og mga pari nga mapagarbohon kaayo aron motabang niya sa pagmando. Si Noah wala magtuman sa mga sugo sa Dios. Hinuon, naghimo siya og daotan nga mga butang.
Si Noah nangulo sa iyang katawhan nga mahimo usab nga daotan. Wala sila magsunod sa Ginoo.
Usa ka propeta sa Dios nga ginganlan og Abinadi ang nagpuyo sa yuta. Gipadala sa Ginoo si Abinadi aron sultihan si Noah ug ang iyang katawhan sa paghinulsol.
Si Abinadi misulti ngadto sa katawhan nga gusto sa Ginoo nga sila maghinulsol. Kon dili sila maghinulsol, ang Ginoo motugot nga ang ilang mga kaaway moabot sa ilang yuta ug maghari kanila. Ang ilang mga kaaway mopahimo sa kinabuhi nga lisod kaayo alang ni Noah ug sa iyang katawhan.
Nasuko ang katawhan kang Abinadi tungod sa iyang gisulti. Sila gustong mopatay niya, apan gihimong luwas sa Ginoo si Abinadi ug gitabangan siya nga makaikyas.
Gusto usab nga patyon ni Noah si Abinadi. Si Noah wala motuo sa Ginoo. Siya ug ang iyang katawhan wala maghinulsol.
Paglabay sa duha ka tuig, ang Ginoo mipadala og balik ni Abinadi aron sa pagpasidaan sa katawhan. Gisultihan ni Abinadi ang katawhan nga ang ilang mga kaaway moilog sa yuta tungod kay wala sila maghinulsol. Nasuko ang katawhan kang Abinadi. Miingon sila nga wala silay gihimo nga sayop ug dili maghinulsol. Gigapos nila si Abinadi ug gidala siya ngadto ni Noah.
Si Noah ug ang iyang mga pari nakahimo og usa ka plano. Ang mga pari misulay sa paglingla ni Abinadi pinaagi sa pagpangutana niya og daghan. Apan si Abinadi maisogong mitubag kanila. Ang mga pari natingala sa mga tubag ni Abinadi. Sila dili makalingla niya. Gisultihan ni Abinadi ang mga pari nga mas gihatagan nila og bili ang kwarta kay sa paghimo sa matarong.
Gisultihan ni Noah ang iyang mga pari nga patyon si Abinadi. Apan si Abinadi mipasidaan nila sa dili paghikap kaniya. Ang iyang nawong mihayag tungod sa gahom sa Dios. Miingon si Abinadi nga ang mga pari wala magtudlo sa mga balaod sa Dios. Gitudloan sila ni Abinadi nga si Jesukristo matawo, mamatay alang kanato, ug mabanhaw. Miingon siya nga si Jesus mopasaylo kanila kon sila maghinulsol.
Gitapos ni Abinadi ang mensahe nga gisugo sa Ginoo nga iyang ihatag. Nasuko pa gihapon si Noah. Iyang gisultihan ang iyang mga pari nga dakpon si Abinadi ug patyon.
Usa ka pari, si Alma, mituo ni Abinadi. Gisulayan ni Alma sa pagluwas si Abinadi. Apan karon si Noah nasuko usab ni Alma ug mipugos niya sa pagbiya.
Ang mga pari miingon ni Abinadi nga mabuhi siya kon mosulti siya nga ang iyang gitudlo dili tinuod. Apan si Abinadi miingon nga iyang gitudlo ang kamatuoran. Si Noah ug ang iyang mga pari nasuko na usab. Ilang gipatay si Abinadi pinaagi sa kalayo. Ang mga guwardya ni Noah misulay usab sa pagpatay ni Alma. Apan si Alma mitago ug gisulat ang tanang pulong ni Abinadi.