“Ang Managsoon nga Nephi ug Lehi,” Mga Sugilanon sa Basahon ni Mormon (2023)
Ang Managsoon nga Nephi ug Lehi
Pagkadungog og tingog gikan sa langit
Si Nephi ug Lehi managsoon nga gusto nga ang tanan makahibalo sa ebanghelyo ni Jesukristo. Ang mga Nephita ug mga Lamanita adunay gubat, apan ang managsoon nagtudlo gihapon sa katawhan nga gikan sa duha ka pundok. Usa ka adlaw, samtang sila mipanaw aron magtudlo sa katawhan, usa ka kasundalohang Lamanita ang mibilanggo nila.
Helaman 3:20–21, 37; 4:4–5, 14; 5:4–21
Daghang adlaw human niana, ang kasundalohan miadto sa bilanggoan aron patyon si Nephi ug Lehi.
Sa wala pa ang bisan kinsa makapasakit ni Nephi ug Lehi, usa ka gilis sa kalayo ang mitunga palibot nila. Ang kalayo wala makasunog nila. Hinuon, ang Dios mihimo nilang luwas. Dayon ang yuta nauyog. Kini mabati nga mura og mangatumba ang mga bungbong sa prisohan. Sa wala madugay, usa ka mangitngit nga panganod ang mitabon sa tanan nga naa sa bilanggoan. Nahadlok kaayo ang mga tawo.
Usa ka tingog ang miabot gikan sa ibabaw sa mangitngit nga panganod. Kini hilom, sama sa usa ka hunghong, apan ang katawhan makabati niini diha sa ilang mga kasingkasing. Tingog kadto sa Dios. Ang Dios misulti nila nga maghinulsol.
Ang yuta ug ang bilanggoan padayon pa nga miuyog. Ang tingog miabot na usab ug gisultihan ang katawhan nga maghinulsol. Ang katawhan dili makalihok tungod sa panganod ug sa ilang kahadlok.
Usa ka tawo sa pundok sa katawhan ang ginganlan og Aminadab. Siya kaniadto nahisakop sa Simbahan sa Dios. Iyang nakita nga ang mga nawong ni Nephi ug Lehi misugod sa pagsanag sa hilabihan. Mura sila og mga anghel tan-awon. Mura og nakig-istorya sila sa usa ka tawo sa langit. Gisultihan ni Aminadab ang tanan nga tan-awon si Nephi ug Lehi.
Ang katawhan nangutana ni Aminadab kon unsa ang ilang mahimo aron mawagtang ang mangitngit nga panganod. Gipakigbahin ni Aminadab kon unsa ang iyang nakat-onan mahitungod sa Dios ug ni Jesus. Iyang gisultihan ang katawhan nga maghinulsol, maadunay hugot nga pagtuo ni Jesus, ug mag-ampo sa Dios. Ang katawhan naminaw ni Aminadab. Sila nag-ampo hangtod nga ang kangitngit nawagtang.
Ang kalayo gikan sa Dios mipalibot sa tanang katawhan ug wala mosunog nila. Ang katawhan napuno sa Espiritu Santo ug nalipay kaayo. Misulti sila og makahingangha nga mga butang. Ang tingog mibalik na usab. Misulti kini kanila nga magbaton og kalinaw tungod sa ilang hugot nga pagtuo ni Jesus. Ang mga anghel miabot ug mibisita sa katawhan.
Si Nephi, si Lehi, ug tanan nga katawhan mibiya sa bilanggoan. Gisultihan nila ang daghang katawhan sa tibuok yuta kon unsa ang ilang nakita ug nadungog nianang adlawa. Kasagaran sa mga Lamanita mituo ug mipili nga mosunod ni Jesus. Mihunong sila sa pagpakiggubat. Hinuon, mitabang sila nga ang katawhan makabaton og hugot nga pagtuo ni Jesus ug maghinulsol.