“Jacob ug Sherem,” Mga Sugilanon sa Basahon ni Mormon (2023)
Jacob ug Sherem
Usa ka pagpamatuod sa usa ka propeta mahitungod ni Jesukristo
Si Jacob usa ka propeta kinsa nakakita ni Jesukristo. Gusto niya nga ang katawhan motuo ni Jesus. Gitudloan ni Jacob ang katawhan sa pagtuman sa mga sugo sa Dios. Naningkamot siya sa pagtudlo sa katawhan mahitungod ni Jesus.
2 Nephi 11:2–3; Jacob 1:1–8, 17–19
Usa ka adlaw, ang usa ka tawo nga ginganlan og Sherem nagsugod sa pagtudlo sa katawhan. Apan si Sherem nagtudlo nga si Jesus dili tinuod. Maayong manulti si Sherem, ug daghang Nephite ang mituo sa iyang gisulti. Tungod kaniya, daghang tawo ang mihunong sa pagtuo kang Jesus. Si Sherem gusto usab nga si Jacob mohunong sa pagtuo kang Jesus.
Miingon si Sherem nga walay tawong makahibalo unsay mahitabo sa umaabot. Miingon siya nga nagpasabot kini nga walay usang masayod kon si Jesus tinuod ba, kay si Jesus wala pa makaanhi sa yuta. Apan miingon si Jacob nga ang mga kasulatan ug tanang propeta nagtudlo mahitungod ni Jesus. Ang Dios mipakita ngadto kang Jacob nga si Jesus moanhi sa yuta.
Si Sherem dili gihapon motuo. Gusto niya nga si Jacob mopakita kaniya og timailhan nga si Jesus tinuod.
Miingon si Jacob nga si Sherem nasayod nga moanhi si Jesus ug wala magkinahanglan og timailhan. Apan miingon si Jacob nga ang Dios mohimo kang Sherem nga makuyapan aron makita nga ang Dios dunay gahom ug si Jesus tinuod.
Sa kalit lang, si Sherem nasakit ug nahagsa sa yuta. Human sa daghang adlaw, nasayod siya nga mamatay na siya. Gisultihan niya ang mga tawo nga nabitik siya ni Satanas. Miingon siya nga namakak siya sa Dios. Nasayod siya sa tanang panahon nga si Jesus tinuod. Dayon si Sherem namatay. Ang mga tawo mibasa sa mga kasulatan ug mituo ni Jesus.