“Si Alma ug ang Iyang Katawhan,” Mga Sugilanon sa Basahon ni Mormon (2023)
Si Alma ug ang Iyang Katawhan
Kalig-on gikan sa Dios sa mga panahon sa kalisod
Si Alma ug ang iyang katawhan nagpuyo sa usa ka matahom nga yuta. Nagtanom sila og mga liso ug nagtukod og mga panimalay. Si Alma usa ka pari sa Dios. Gitudloan niya ang iyang katawhan nga higugmaon ang usag usa. Ang katawhan naminaw ni Alma ug nagtuman sa mga sugo sa Dios. Milambo ang ilang mga pamilya ug nagtukod sila og siyudad.
Usa ka adlaw, usa ka kasundalohan sa mga Lamanita ang miabot. Nasaag sila. Ang mga Lamanita misaad nga pasagdan nila ang katawhan ni Alma kon tabangan sila ni Alma nga makatultol sa ilang dalan pauli. Gipakita ni Alma sa mga Lamanita unsaon nga sila makabalik sa ilang yuta.
Ang mga Lamanita wala motuman sa ilang saad. Hinuon, ilang gisakmit ang yuta ug gipabantayan og mga guwardya ang katawhan ni Alma. Gihimo usab nila ang usa ka Nephita nga si Amulon nga hari sa katawhan ni Alma. Si Amulon usa ka lider sa mini nga mga pari. Siya ug ang iyang mga pari mipatay sa propeta sa Dios ug mibuhat og daghan pang daotan nga mga butang.
Mosiah 17:12–13; 23:31–32, 37–39; 24:9
Si Amulon nasuko ni Alma. Iyang gipatrabaho og maayo ang katawhan ni Alma ug istrikto kaayo ngadto nila. Lisod kadto alang sa katawhan ni Alma.
Nag-ampo sila sa Dios alang sa tabang. Si Amulon misulti nila nga mohunong sa pag-ampo. Miingon siya nga si bisan kinsa nga mag-ampo kay patyon.
Si Alma ug ang iyang katawhan mihunong sa pag-ampo og kusog. Hinuon, nag-ampo sila diha sa ilang mga kasingkasing. Ang Dios nakadungog sa ilang mga pag-ampo. Siya mihupay kanila ug misaad nga tabangan silang makaikyas. Gihimo sa Dios nga mas sayon ang ilang lisod nga buluhaton. Ang katawhan nagmapailobon ug malipayon samtang naminaw sila sa Dios. Sila nahibalo nga Siya mitabang nila.
Ang katawhan ni Alma misalig sa Dios ug adunay dako nga pagtuo diha Kaniya. Usa ka adlaw, ang Dios misulti nila nga oras na aron mobiya. Nianang gabhiona, si Alma ug ang iyang katawhan nangandam. Ilang gipundok ang tanan nilang kahayopan ug pagkaon. Pagka-buntag, gipakatulog og maayo sa Dios ang mga Lamanita. Dayon si Alma ug ang iyang katawhan miikyas ug mipanaw tibuok adlaw.
Nianang gabhiona, ang tanang kalalakin-an, kababayen-an, ug kabataan mipasalamat sa Dios. Nakahibalo sila nga ang Dios lamang ang makatabang nila. Sila nagpadayon sa pagpanaw sulod sa daghang adlaw ug miabot sa yuta sa Zarahemla. Ang mga Nephita miabiabi kanila, ug si Alma nagtudlo sa tanan mahitungod sa pagbaton og pagtuo diha ni Jesukristo. Daghang katawhan ang mituo ug nabunyagan.