“Ang Hari sa Tanang Lamanite,” Basahon ni Mormon (2023)
“Ang Hari sa Tanang Lamanite,” Mga Sugilanon sa Basahon ni Mormon
Ang Hari sa Tanang Lamanite
Gustong masayod mahitungod sa Ginoo
Ang mga Lamanite dunay hari nga nangulo sa tanan nilang uban pa nga mga hari. Siya ang amahan ni Hari Lamoni. Nagtuo siya nga ang mga Nephite mga kaaway. Usa ka adlaw, nakita niya si Lamoni kauban ni Ammon. Ang hari nangutana ni Lamoni unsay iyang gihimo uban sa usa ka Nephite. Gisultihan ni Lamoni ang hari nga ilang buhian ang mga igsoong lalaki ni Ammon gikan sa pagkabilanggo.
Ang hari nasuko. Nagtuo siya nga ang mga Naphite namakak aron sa pagsulay sa pagpangawat gikan sa mga Lamanite. Giingnan niya si Lamoni nga patyon si Ammon ug mokuyog kaniya.
Si Lamoni dili mopatay ni Ammon. Gisultihan niya ang hari nga si Ammon ug ang iyang mga igsoong lalaki mga propeta sa Dios. Miingon siya nga tabangan niya ang mga igsoong lalaki ni Ammon.
Ang hari miibot sa iyang espada aron pasakitan si Lamoni, apan gipugngan siya ni Ammon. Ang hari miatake hinoon ni Ammon. Gipanalipdan ni Ammon ang iyang kaugalingon. Iyang napasakitan ang kamot sa hari aron ang hari dili makasukol. Nahadlok ang hari tungod sa kakusgan ni Ammon. Gisaaran niya si Ammon nga ihatag ang katunga sa iyang gingharian kon dili siya patyon ni Ammon.
Si Ammon dili ganahan sa gingharian. Hinoon, gihangyo niya ang hari nga buhian ang iyang mga igsoong lalaki gikan sa pagkabilanggo. Gihangyo usab niya ang hari nga hunongon ang iyang pagkasuko kang Lamoni. Miingon si Ammon nga ang hari kinahanglang motugot ni Lamoni nga magmando sa paagi nga sa iyang hunahuna maoy labing maayo.
Natingala ang hari kon unsa ka pinangga ni Ammon si Lamoni. Miuyon siya nga himoon ang tanan nga gihangyo ni Ammon.
Ang hari gustong makahibalo pa og dugang sa unsay gisutli ni Ammon ug Lamoni kaniya mahitungod sa Dios. Gihangyo niya si Ammon ug ang iyang mga igsoong lalaki sa pag-adto ug pagtudlo kaniya.
Si Ammon ug Lamoni nangadto sa yuta sa Middoni. Ang mga igsoong lalaki ni Ammon nabilanggo didto. Gigapos sila og mga pisi ug wala hatagi og pagkaon o tubig. Gikumbinser ni Lamoni ang pangulo sa Middoni nga buhian ang mga igsoong lalaki ni Ammon.
Dihang nabuhian na sila, ang mga igsoong lalaki ni Ammon nangadto sa amahan ni Lamoni. Nangyukbo sila sa hari ug mihangyo nga mahimo niyang mga sulugoon. Mibalibad ang hari. Hinoon, gusto siya nga sila motudlo kaniya mahitungod sa ebanghelyo. Usa sa mga igsoong lalaki ginganlan og Aaron. Gibasahan niya sa mga kasulatan ang hari ug mitudlo kaniya mahitungod sa Dios ug ni Jesukristo.
Ang hari mituo kang Aaron. Miingon siya nga talikdan niya ang iyang tibuok gingharian aron makaila sa Dios. Gipangutana niya si Aaron unsay gikinahanglan niyang buhaton. Gisultihan ni Aaron ang hari sa paghinulsol ug mag-ampo sa Dios uban sa hugot nga pagtuo. Ang hari naghinulsol sa iyang tanan nga sala ug nag-ampo.
Ang hari natumba sa yuta. Ang mga sulugoon sa hari nagdinaganay aron sultihan ang rayna.
Miadto ang rayna ug nakit ang hari nga naa sa yuta. Nagtuo siya nga gipatay ni Aaron ug sa iyang mga igsoong lalaki ang hari. Nasuko ang rayna.
Ang rayna miingon sa iyang mga sulugoon nga patyon si Aaron ug ang iyang mga igsoong lalaki. Apan nahadlok ang mga sulugoon. Miingon sila nga si Aaron ug ang iyang mga igsoong lalaki labihan ka kusgan. Karon nahadlok ang rayna. Gipadala niya ang mga sulugoon aron pahibaloon ang katawhan sa siyudad sa nahitabo. Nanghinaot siya nga ang katawhan mopatay ni Aaron ug sa iyang mga igsoong lalaki.
Nasayod si Aaron nga masuko ang katawhan. Nasayod usab siya nga ang hari dili patay. Gitabangan niya ang hari sa pagbarog. Naulian ang hari sa iyang kusog ug mibarog. Ang rayna ug ang mga sulugoon natingala.
Ang hari mitudlo sa rayna ug sa mga sulugoon mahitungod ni Jesus. Tanan sila mituo kang Jesus. Ang hari gusto nga ang iyang tanan nga katawhan makakat-on mahitungod ni Jesus. Mihimo siya og balaod nga si Aaron ug ang iyang mga igsoong lalaki motudlo sa ebanghelyo bisan asa sa iyang gingharian. Gitudloan nila ang katawhan ug mitawag og mga pari ug mga magtutudlo diha sa yuta.