“Teancum ug Moroni,” Mga Sugilanon sa Basahon ni Mormon (2023)
Teancum ug Moroni
Nagpakita og dakong kaisog
Human mamatay si Amalickiah, ang iyang igsoong lalaki nga si Ammoron nahimong hari sa mga Lamanita. Padayon nga nakig-away si Ammoron sa mga Nephita. Ang gubat milungtad og mga tuig. Ang mga Nephita nagsugod og daog, mao nga tanang kasundalohang Lamanita midagan ngadto sa usa ka siyudad. Si Moroni, si Teancum, ug lain nga kapitan nga Nephita migukod sa mga Lamanita kauban ang ilang kasundalohan.
Alma 52:3–4; 54:16–24; 62:12–35
Nasuko si Teancum nga si Amalickiah ug Ammoron ang nakaingon niining dako, taas nga gubat. Tungod sa gubat, daghang tawo ang namatay ug gamay ra kaayo ang pagkaon. Gusto ni Teancum nga mahunong na ang gubat. Miadto siya sa siyudad pagka-gabii aron pangitaon si Ammoron.
Si Teancum mikatkat sa paril sa siyudad. Miadto siya gikan sa usa ka dapit ngadto sa usa ka dapit sa siyudad hangtod nga nakit-an niya kon asa natulog si Ammoron.
Si Teancum milabay og bangkaw ngadto ni Ammoron. Miigo kini kaniya duol sa kasingkasing. Apan napukaw ni Ammoron ang iyang mga sulugoon sa wala pa siya mamatay.
Gigukod sa mga sulugoon ni Ammoron si Teancum ug gipatay siya. Ang ubang mga pangulo sa mga Nephita naguol og maayo nga namatay si Teancum. Maisogon siyang nakig-away alang sa kagawasan sa iyang katawhan.
Bisan tuod og siya namatay, si Teancum nakatabang sa mga Nephita nga modaog sa gubat. Iyang nahimo nga mawagtangan og pangulo ang mga Lamanita. Pagka-sunod buntag, nakig-away si Moroni sa mga Lamanita ug midaog. Ang mga Lamanita mibiya sa yuta sa mga Nephita, ug natapos ang gubat.
Sa kataposan aduna nay kalinaw. Naningkamot og maayo si Moroni nga himoong mas luwas gikan sa mga Lamanita ang yuta sa mga Nephita. Dayon mipauli si Moroni aron magpuyo sa kalinaw. Ang mga propeta nagtudlo sa ebanghelyo ug nangulo sa Simbahan sa Dios. Ang katawhan misalig sa Ginoo, ug Siya mipanalangin kanila.