“King Benjamin,” Ol Stori blong Buk blong Momon (2023)
King Benjamin
Stap givim seves long ol pipol mo God
King Benjamin i wan profet blong God we i rul long graon blong Sarahemla. Hem i wok had blong givim seves long ol pipol blong hem mo tijim olgeta abaot God. Wetem help blong ol nara profet blong God, Benjamin i bin mekem Sarahemla i kam wan ples we i gat pis mo sef blong laef long hem.
Ol Toktok blong Momon 1:17–18; Mosaea 1:1–7
Benjamin i kam olfala. Hem i askem boe blong hem Mosaea blong karem ol pipol oli kam tugeta. Benjamin i wantem blong talem long olgeta se Mosaea bae hem i niu king blong olgeta.
Plante pipol oli kam long evri ples long graon ia. Oli setemap ol tenet blong olgeta kolosap long tempol blong lisin long Benjamin.
Benjamin i bin toktok antap long wan taoa mekem se plante pipol oli save harem hem. Benjamin i talem se God i bin helpem hem blong lidim olgeta. Olsem king, hem i bin tijim olgeta blong stap obei ol komanmen blong God. Hem i no bin tekem mane blong olgeta o mekem olgeta oli wok blong hem. Be, hem i bin wok blong givim seves long ol pipol blong hem mo God.
Benjamin i bin talem long ol pipol se taem oli givim seves long wanwan long olgeta, oli stap givim seves long God tu. Afta hem i talem long olgeta se evri samting we oli gat i kam long God. Mo blong givim i gobak, God i wantem olgeta blong obei long ol komanmen blong Hem. Taem oli obei, God i givim moa blesing.
Benjamin i talem long olgeta se hem i nomo save stap olsem king o tija blong olgeta. Boe blong hem Mosaea bae hem i niu king blong olgeta.
Afta Benjamin i talem long ol pipol blong hem se wan enjel i bin visitim hem. Enjel ia i talem se Pikinini blong God, Jisas Kraes, bae i kam long wol. Bae hem i mekem ol merikel mo hilim ol pipol. Bae hem i safa long harem nogud mo bae i ded blong sevem evri pipol. Benjamin i tijim se Jisas bae i fogivim evriwan we oli gat fet long Hem mo oli sakem sin.
Ol pipol oli bin bilivim wanem we Benjamin i tijim long olgeta abaot Jisas. Oli save se oli nidim blong sakem sin. Evri pipol oli prea mo askem God blong fogivim olgeta. Afta we oli prea, Spirit blong God i bin stap wetem olgeta. Oli bin filim glad mo oli save se God i fogivim olgeta from fet blong olgeta long Jisas.
Ol pipol oli filim defren mo niu insaed long olgeta from se oli gat fet long Jisas. Naoia oli wantem blong mekem ol gudfala samting evri taem. Oli mekem wan promes blong solem ol komanmen blong God long ful laef blong olgeta. From we oli bin biliv long Jisas mo mekem promes ia, oli singaotem olgeta ol pipol blong Jisas.