“Ol Antae-Nifae-Lihae,” Ol Stori blong Buk blong Momon (2023)
Ol Antae-Nifae-Lihae
Ol pipol we oli jusum blong lavem ol enemi blong olgeta
Plante Man blong Leman oli lanem abaot God aot long Amon mo ol brata blong hem. Ol Man blong Leman ia oli gat strong fet long Lod mo oli obei long ol komanmen blong God. Oli wantem wan niu nem, mekem se oli singaotem olgetawan Ol Antae-Nifae-Lihae be i no Ol Man blong Leman.
Ol Antae-Nifae-Lihae oli jenis from fet blong olgeta long God. Oli sakem sin from ol nogud samting we oli bin stap mekem. Oli save se God i lavem olgeta mo Hem i fogivim olgeta.
Ol Man blong Leman oli kros mo oli stap redi blong go agensem Ol Antae-Nifae-Lihae. Ol Antae-Nifae-Lihae oli no faet, be oli mekem wan promes long God. Oli talem se bae oli nomo mekem nogud long ol pipol bakegen. Blong soem hemia, oli berem ol tul blong faet blong olgeta. Oli jusum blong lavem ol enemi blong olgeta, be i no blong mekem nogud o kilim ded olgeta.
Ol Man blong Leman we oli no biliv long God oli go agensem Ol Antae-Nifae-Lihae.
Ol Antae-Nifae-Lihae oli gat fet se sapos oli kilim olgeta, bae oli stap wetem God. Oli bin kipim promes blong olgeta long God mo oli no faet agensem Ol Man blong Leman.
Ol Antae-Nifae-Lihae oli no faet, be oli prea. Taem Ol Man blong Leman oli luk hemia, plante long olgeta oli stop blong faet. Oli filim nogud blong stap kilimded ol pipol ia. Ol Man blong Leman ia oli jusum tu blong nomo mekem nogud long ol pipol bakegen. Oli joenem Ol Antae-Nifae-Lihae.
Taem taem i stap go, moa pipol oli faet. Amon mo ol brata blong hem oli no hapi se Ol Antae-Nifae-Lihae oli stap safa. Oli askem king blong tekem ol pipol blong hem mo go stap wetem Ol Man blong Nifae. King i talem se bae oli go sapos Lod i wantem olgeta blong go. Amon i prea. Lod i talem se oli mas go mo se bae Hem i kipim olgeta i sef.
Ol Man blong Nifae oli givim graon long Ol Antae-Nifae-Lihae blong oli stap long hem mo oli protektem olgeta. Ol Antae-Nifae-Lihae oli givim kaekae i go long Ol Man blong Nifae from oli lukaot long olgeta. Ol Antae-Nifae-Lihae oli gat bigfala fet mo lavem God. Oli ones wetem evriwan mo oli kipim ol promes blong olgeta mo oli neva faet. Oli bin stap fetful long ful laef blong olgeta.