“Ita we i Profet,” Ol Stori blong Buk blong Momon (2023)
Ita we i Profet
Woning blong Lod long wan nesen
Lod i bin karem brata blong Jared mo famli blong hem i go long promes graon. Oli bin gat tingting we i stap daon mo oli obei long ol komanmen blong God. Grup blong olgeta oli bin gro blong plante yia, mo oli bin wantem wan king blong lidim olgeta. Brata blong Jared i bin wonem olgeta se blong gat wan king bae i save lidim olgeta i go long trabol, be hem i letem olgeta blong jusum wan king.
Blong handred blong ol yia, ol man blong Jared oli bin stap long promes graon. Samtaem ol king blong olgeta oli lidim olgeta blong mekem gud, mo samtaem oli no lidim gud olgeta. Ol profet blong God bae oli wonem ol pipol blong sakem sin. Taem ol pipol oli lisin mo obei long ol komanmen blong God, Hem i blesem olgeta. Las profet we i wan man blong Jared, nem blong hem Ita.
Ita 7:23–27; 9:26–30; 10:16–17, 28; 11:1–8, 12–13, 20–22; 12:2
Ol pipol oli no stap obei long God. Be Spirit blong Lod i bin stap wetem Ita. Hem i bin tijim olgeta stat long moning kasem naet. Hem i talem long olgeta blong biliv long God mo sakem sin sapos no bae oli prapa spolem olgeta. Sapos oli gat fet, bae oli save hop blong stap wetem God bakegen mo gat paoa blong mekem ol gudfala samting. Ol pipol oli no bin biliv.
Ita i luk wanem we ol pipol oli bin mekem. Hem i haed long wan hol blong ston long dei taem mo i raetem daon wanem hem i stap luk. Ol pipol oli no bin sakem sin mo oli stat blong faet wetem wanwan long olgeta.
Ita i luk se king blong Ol Man blong Jared, Koriantum, i mas faet wetem plante pipol we oli wantem blong kam king. Koriantum i yusum ami blong hem blong protektem hemwan.
Wan dei, Lod i talem long Ita blong wonem Koriantum mo ol pipol blong hem blong oli sakem sin. Sapos oli mekem, bae Lod i helpem ol pipol mo bae i letem Koriantum i kipim kingdom blong hem. Sapos no, bae ol pipol oli spolem olgeta wanwan bakegen. Koriantum bae i laef long taem inaf blong luk se ol toktok blong Lod oli bin tru. Afta bae hem tu i ded.
Koriantum mo ol pipol blong hem oli no sakem sin. Ol pipol oli traem blong kilim ded Ita, be Ita i ronwe i go long hol blong ston blong hem. Wan man we nem blong hem Sis i faet agensem Koriantum. Ol pipol oli jusum blong joenem ami blong Sis o Koriantum. Tufala ami ia oli gat plante faet. Plante pipol oli bin ded.
Koriantum i tingbaot wanem we Ita i bin talem. Hem i harem nogud se plante long ol pipol blong hem oli bin ded. Hem i tingbaot se evri profet oli bin wonem hem se bae samting ia i hapen. Hem i stat blong sakem sin mo i sendem wan leta i go long Sis. Hem i talem se bae hem i givim kingdom blong hem sapos Sis i save lego ol pipol blong hem i sef. Be Sis i wantem faet.
Ol pipol blong Koriantum oli kros mo oli wantem blong faet. Ol pipol blong Sis oli kros tu mo oli wantem blong faet. I no gat wan i wantem blong sakem sin. Ita i luk se evriwan i go blong faet. Plante moa pipol oli bin ded.
Koriantum i wantem blong stopem wo ia. Hem i askem Sis blong tekem kingdom mo no mekem nogud long ol pipol blong hem. Be evriwan i kros. Oli no bin gat Spirit blong Lod wetem olgeta. Ita i luk se evriwan i stap gohed blong faet kasem taem Koriantum hemwan nomo i Man blong Jared we i laef i stap. Afta ae blong Koriantum i tudak.
Ita i luk se evri samting we Lod i talem, i bin hapen. Ita i finis blong raetemdaon wanem we i bin hapen. Afta hem mekem sua se bae ol pipol oli save faenem ol raeting blong hem sapos hem i ded. Ita i trastem God mo i lukluk fored blong stap wetem Hem wan dei.