“Ol Brata Nifae mo Lihae,” Ol Stori blong Buk blong Momon (2023)
Ol Brata Nifae mo Lihae
Stap harem wan voes i kam long heven
Nifae mo Lihae tufala i brata we oli wantem evriwan blong save abaot gospel blong Jisas Kraes. Ol Man blong Nifae mo Ol Man blong Leman oli stap long wo, be tufala brata ia i gohed nomo blong tijim ol pipol blong tugeta grup. Wan dei taem tufala i stap travel blong tijim ol pipol, wan ami blong Ol Man blong Leman oli putum tufala long kalabus.
Hileman 3:20–21, 37; 4:4–5, 14; 5:4–21
Plante dei afta, ami ia oli kam blong kilim ded Nifae mo Lihae.
Bifo eniwan i save mekem nogud long Nifae mo Lihae, wan sekol blong faea i kamaot raon long olgeta. Faea ia i no bin bonem olgeta. Be, God i kipim tufala i sef. Afta graon i seksek. I olsem se ol wol blong kalabus bae oli foldaon. I no longtaem, wan klaod we i tudak i kavremap evriwan long kalabus. Ol pipol oli fraet tumas.
Wan voes we i kam antap long klaod ia we i tudak. Hem i kwaet, olsem wan man i stap toktok slo, be ol pipol oli filim long hat blong olgeta. Hem i voes blong God. God i talem long olgeta blong oli sakem sin.
Graon mo ol kalabus i seksek moa. Voes ia i kam bakegen mo i talem long ol pipol blong oli sakem sin. Ol pipol oli nomo save muv from klaod ia mo fraet blong olgeta.
Wan man long grup blong ol man ia, nem blong hem Aminadab. Hem i bin stap long Jos blong God fastaem. Hem i bin luk se fes blong Nifae mo Lihae oli stat blong saen strong. Oli luk olsem se oli ol enjel. I luk olsem se oli stap toktok long wan man long heven. Aminadab i talem long evriwan blong oli lukluk Nifae mo Lihae.
Ol pipol oli askem Aminadab wanem oli save mekem blong karemaot tudak blong klaod ia. Aminadab i bin serem wanem hem i save abaot God mo Jisas. Hem i talem long ol pipol blong sakem sin, gat fet long Jisas, mo prea long God. Ol pipol oli lisin long Aminadab. Oli prea kasem taem tudak ia i gowe.
Faea we i kam long God i raonem evri pipol mo i no bonem olgeta. Ol pipol oli fulap long Tabu Spirit mo oli glad tumas. Oli talem ol gudgudfala samting. Voes ia i kam bakegen. Hem i talem long olgeta blong gat pis from fet blong olgeta long Jisas. Ol enjel oli kam daon mo visitim ol pipol.
Nifae, Lihae mo evri pipol oli aot long kalabus. Oli talem long plante pipol raon long graon abaot wanem oli bin luk mo harem long dei ia. Plante long Ol Man blong Leman oli biliv mo oli jusum blong folem Jisas. Oli stop blong faet agensem ol pipol long wo. Be, oli helpem ol pipol blong gat fet long Jisas mo sakem sin.