“Liahona mo Bonara We I Brok,” Ol Stori blong Buk blong Momon (2023)
Liahona mo Bonara We I Brok
Stap Lukaotem help blong Lod
Ol famli blong Lihae mo Ismael oli bin travel long waelples blong plante yia. Lod i bin lidim olgeta tru long ol pat blong graon we oli moa gud. Oli mas go lukaotem animol mo karem kaekae folem rod. Hem i bin wan had wokbaot.
Lod i bin promes blong lidim ol famli i go long wan gudfala graon sapos oli obei long ol komanmen. Oli no bin save olsem wanem blong faenem graon, be Lod bae i lidim olgeta.
Long wan moning, Lihae i sapraes taem i faenem wan bol we oli wokem wetem bras, aotsaed long tenet blong hem. Bol ia oli singaotem Liahona. Insaed long Liahona ia, i gat wan aro we i poenem rod we grup i nidim blong travel folem. Samtaem oli stap faenem ol mesej we i kam long Lod we oli raetem long Liahona. Hemia i olsem wanem Lod i bin lidim olgeta.
1 Nifae 16:10, 16, 26–29; Alma 37:38
Wan dei taem hem Nifae i stap lukaotem animol, bonara blong hem we oli wokem long aean i brok. Ol famli blong olgeta i no save karem kaekae sapos oli nogat bonara ia. Ol brata blong Nifae oli kros long hem mo long Lod.
Olgeta evriwan oli taet mo oli hanggri. Sam long olgeta oli harem nogud mo oli komplen. Oli fraet se bae oli ded hanggri. Lihae tu i komplen long Lod.
Nifae i mekem wan niu bonara aot long wud. Hem i bin gat fet long Lod se bae Lod i helpem hem blong faenem kaekae.
Nifae i askem Lihae weaples blong hem i go lukaotem animol long hem. Lihae i sori se hem i bin komplen. Hem i sakem sin mo askem Lod blong help. Lod i talem long Lihae blong lukluk Liahona. Oli raetem wan mesej long hem. Ol famli oli bin lanem se Liahona i wok nomo taem oli gat fet long Lod mo obei long ol komanmen.
Samtaem Lod i stap jenisim mesej long Liahona blong helpem olgeta long taem blong travel blong olgeta. Liahona i bin helpem Nifae blong save weaples blong lukaotem animol. Hem i bin karembak kaekae blong kakae, mo olgeta evriwan oli hapi. Oli bin sakem sin mo talem tangkyu long Lod.